ئیسماعیل عەلی
جەماوەرێ ئەلهووێن چیای بسەرکەفتنا دیروکیا مەزن ل یاریا فیناڵا کەنداڤی یا یانەیان دژی قادسیە یا کووێتی باژێرێ دهۆکا رەنگین کرە ڤیستەڤاڵا دریشمێن زەرێن یانەیا قارەمان. مە دیت هەمی خەلکێ باژێری، ب پاڵپشتیا پرانیا خەلکێ باژێرێن کوردستانێ ئاهەنگێن کەیفێ گێراندن پشتی فیرکا دادڤانێ یاریا فیناڵێ ئەوا بئەنجامێ دو گوڵا بەرامبەر ئێکێ ب ئیمزاکرنا یاریکەرێ کورێ دهۆکێ سیابەند عەگید ی و هەروەسا مارلۆن دوستادوڤ ی بدوماهیک هاتی، و برێیا دو ئەسیستێن جوانێن یاریکەرێ کورێ دهۆکێ پیتەر گورگیس ی. ئەڤەژی بۆ دەسکەفتێ دووێ یێ گرنگ پشتی دەسکەفتێ ئێکێ ل ٢٠١٠ێ دەما دهۆک بۆیە قارەمانا یانەیێن پلەیا ئێکێ یا خولا عیراقێ.
دوێ شەڤا سەرکەفتنێدا، ئەسمانێ دهۆکا رەنگین رۆندکێن خۆشیێ باراندن و دلخۆشیەکا بێ توخیب کەتە ددلێ خەلکێ مەدا دناڤا باژێریدا.
هۆسا، تیمێ دهۆکێ دیروکەکا نوی برێیا راهێنەرێ خۆیێ گەنجێ کورد، هەلگرێ ناسناما سوویدی، مەسعود میرال ی تومار کر. ئەو راهێنەرێ، ب پشتەڤانیا کارگێرییەکا سەرکەفتی و خەمخور، یاریێن جوان و سەردەمانە و ب تەکتیک و هونەرەکێ لئاستەکێ بلند بۆ تیمێ خۆ ، چ ل ئاستێ خولا ستێرێن عیراقێ یان قارەمانیا کەنداڤی، پێشکێشکرین.
هۆسا، دەستەکا کارگێریا تیمێ دهۆکێ شیان گوهورینەکا ژ ڕه وریشالی دناڤ یانەیا دهۆکێ دا بکەن و مورالا جەماوەرێ دهۆکێ زێدە بلند بکەن و بکەنە یاریکەرێ ١٢ێ دیاریگەهێدا و رۆیێ یاریگەهێ ب جوش و خرۆشیا خۆ ڕەنگین بکەن.
بڤێ هەلکەفتێ، هەرێما کوردستانێ سەلماند و خۆیاکر کۆ راستی هەرێمەک نمونەیی یە نە بتنێ لسەر ئاستێ ئاڤەدانکرنێ و پێکڤەژیانێ و ئاشتیخوازیێ، بەلکی بۆ نمونەیەکا دی لسەر ئاستێ وەرزشێ ژی، تایبەت تەپا پێی، بۆ هەمی رۆژهەلاتا ناڤین، نەخاسمە پشتی سەرکەفتن دژی هەردو یانەیێن سعودی و کووێتێ تومارکرین و پێشوازییەکا گەرم ل مێهڤان و پشتەڤانێن وان تیمێن کەنداڤی بشێوازەکێ شارستانی کرین. ئەڤ سەرکەفتنە و دەستڤەئینانا جاما کەنداڤی ، زێدەباری هەڤرکیا تیما دهۆکێ و زاخۆ د خۆلا ستێرێن عیراقی دا، باشترین دیاری بوو ئەلهووێن چیای پیشکێشی هەمی کوردستانێ کرین.
پیروزە بۆ هەمی یاریکەرێن دهۆکێ یێن قارەمان، ئۆ لسەرێ لیستێ یاریکەرێ کورێ دهۆکێ؛ هارۆن ئەحمەد ی، یێ کۆ هاتیە هلبژارتن وەکۆ باشترین یاریکەرێ قارەمانیا کەنداڤی. پیروزە بۆ راهێنەر و کارگێریا تیما دهۆکێ. پیروزە بۆ هەمی گەلێ کوردستانێ لهەر جهەکی و بۆ پێشڤە و بەردەوامی بسەرکەفتن و دەستڤەئینانا قارەمانیا.
