شێرزاد نایف
من ئەڤ گۆتارا خۆ نڤیسی كو ببیتە جۆرەكێ تۆماركرنەكا بیرەوەریێن خۆ یێن سالا ١٩٨٣ و ببیتە دیاریەك بۆ گیانێ كەسەكا خۆشتڤی كو چوویە بەر رەحمەتا خودێ. هەلكەفتا ڤێ بیرەوەریێ ل ڤان رۆژان هاتە بیرا من، پشتی كو د ناڤ بانگەشەیا فیستەڤالا وەرزشی یا گێما هۆلانێ دا تیێدپەریم و ئالایێن زەر و رەنگین یێن یانەیا باژارێ من دهۆكا رەنگین من ددیتن كو بگەهیتە لۆتكەیا قارەمانیا كەنداڤی، بیرا من ل شیتكا كەمەرا من هات، وەختێ كو بۆ جارا ئێكێ دایك و بابێن من بۆ من خاكێن كوردی ژ سیكا دهۆكێ (سیكا درواران) كرین و ل گەل دۆخینەكا رەنگین ژی بۆ شداندانا شەلوالی، ب تنێ مابوو شیتكەكێ بۆ كەمەرا خۆ بكرم، هەلبەت گەلەك رەنگ هەبوون، لێ ئەز ل وی ژێ بچویك حەزا من هند ل سەر رەنگێ (زەر) ب تنێ هەبوو، ژ بەر كو رەنگێ پێشمەرگەی بوو، رەنگێ پارتی بوو، ل وی ژیێ منێ یێ بچویك تنێ ١١ سالی بووم و ئەڤ هەستە د سینگێ مە دا هاتبوو چاندن، كو دەمێ ئەو رەنگێ زەر ب دەست من كەفتی، هەر چەندە هینگی هەژاری بوو و پارە نەبوون هەمی كورد د فەقیر و ژار بوون، لێ من دونیا خرابكر كو ئیللا بۆ من وێ شیتكێ بكڕن!, وەختێ كو ب دەست من كەفتی و دایكا من یا دلۆڤان بۆ من ب مەكینا (بابیلۆن) دروی هینگی ماكینە ی پایدەرا و قایشێ بوون، هند كەیفا من پێ هات هەروەكو مزگینیا بحەشتێ بۆ من هاتی، ڤێجا وەختێ من خاكێن خۆ كرینە بەر خۆ و دۆخین د شەلوای هەلكێشای ب (مێچینكی) و ژ رەخیێ دی دەرئێخستی و بابێ من نیشا من دا كا چاوا دۆخینێ چەندین جاران د دەستێ خۆ بئالینم و پاش بكەمە (خلف) و پاشی ژۆردا بەردەمە ناڤ شەلوالی و رەخێن وی ژی جهێ بەریكان یێ ڤەكری بوو، كو هندێ دۆخەكێ تەنگاڤ چێببیت و ئاڤ ژێ دەربكەڤیت، پاشی ژی من شیتكا خۆ یا (زەر) د بەژن و بالا خۆ ئالاند، ل دەسپێیكێ بابێ من گۆت بەهدینی هۆسا گرێددەن وەكو گرێك ئێك د سەر یا دی ڕا، بەس پا چونكو یا كورت بوو و دو پارچە بەربوونە بەر ئێك نەچاربووم وەكو سۆرانیان گرێبدم هەما من تێ ئالاند، ڤێجا ژ ڤی رەخی ببە رەخێ دی و ڤی پیێ خۆ بلند كە دا سەرێ شیتكێ د بن را بچیت، هەتا داویێ لفكا زێدە ژۆردا بەردایە د سەرێ شیتكێ دا، هەر چەندە هینگی بابێ من ل نەفیێ بوو ل (سەماوە) ژبەر كو ل گەل بەرواریان هاتبوو سزادان (حەفت) سالان ل بیابانا (رومێسە) بوو، وەختێ ل پێشمەرگاتیێ و مامۆستایێ شۆرەشێ بوو، من تێر نە ددیت، ڤێجا من باش گوهێ خۆ ددایێ كا چاوا خاكا دكەنە بەر خۆ.. ڤێجا وەكی بوویە جەژن و نەورۆز داپیرا من یا هەلبەستڤان و دلۆڤان و دلنازك (مریەما پێدەیی ـ دایكا هەلبەستڤانێ كورد سەدیق شەرۆی) دیتی كو خاك یێن ل بەر من و شیتكا زەر یا د كەمەرا من، ژ كەیفا دا بەردا گریێ و گۆتە من دایۆ… تو ژی بوویە پێشمەرگە كۆرێ منێ ئێكانە! پاشی بۆ من ل سەر جل و بەرگ و بەرگیز و كالك و گۆرە و چۆخ و كولتۆرێ كوردی ئاخفت و هەمی تشت نیشا من دان، ئەز چو جاران وان رۆندكا ژبیر ناكەم و ئەڤرۆ هەمان ئەو رۆندك من ژی دارێتن وەختێ من دهۆكا زەر دیتیی! ڤێجا كەلا كوردینیێ یا ب ژانە و هزاران چیرۆكان ل گەل خۆ رادكەت، ئەو ب خۆ بیرەوەری دەمێ دهێنە بالا مرۆڤی، ب خۆ داخەكە د دلی دا، ڤێجا چاوا پیرۆزیێن وەلاتپارێزیێ بن؟!…یا ژ هەمیێ ب ژانتر مرۆڤی مراد بوو كەسێن وەغەركرین ژ دایك و داپیر و باپیران ژی ئەڤ دەستكەفتێن ئەڤرۆ ب چاڤێن سەرێ خۆ وان دیتبانە .. ئەڤە بوو نهێنيا ئیشقا من بۆ رەنگێ زەر!
