فەهمی مایی
ئەزێ ژ ڤێ گوتنا خوە دەست ب ڤی بابەتی کەم [ ئەگەر دهوک دلە زاخو کاکلە و ئەگەر زاخو دلە دهوک کاکلە….ئاگرێ عەشقا دهوک و زاخو ئێکە و دناڤ دلێ مەدا هەرێ هلە]!
هەلبەت واتەیا پەیڤا دەربی ژ پەیڤەک ئێنگلیزی هاتیە، کو ساڵێن بەرێ یاریەک ل باژێڕێ [Derby] ل بەڕیتانیا دکر ساڵانە و هەمی خەلکێ باژێڕی تێدا بەشدار دبون و ڕۆلێ خوە هەبو، لێ ئەڤ پەیڤە نوکە لجیهانێ هەمیێ بەر بەڵاڤە و دەما دوو یانەیێن باژێڕەکی دکەڤن بەرئێک دبێژنێ یاریا دەربی ئانکو هەردوو یانە یێن ئێک باژێڕی نە و لەوا ناڤێ [دەربیا بەهدینان] دانایە سەر و وەسا دانن کو یانەیێن ئێک باژێڕی نە ئانکو واتەیا هەردوک یێن ئێک پارێگەهێ نە کو پارێزگەها دهوکێ یە، ئڤجار دەما ئێک ژڤان هەردوو یانا د خوڵا عێراقێ دا یان جامێ عێراقێ دا سەربکەڤیت ئەو سەرکەفتنا باژێڕ یان پارێزگەها وانە و دڤیا خەلکێ پارێزگەهێ هەمی پێ کەیفخوەش ببیت بسەرکەفتنا وان د خولا عێراقێ دا، لێ دەما دکەڤن بەرئێک ئەڤ هەردوو یانە دڤیا وەکو دوو برا هەمبەرئێک یاریێ بکەن و بگیانەک وەرزشی دەستەداریێ دگەلئێک بکەن و ڕێڤەبەریا هەردوو یانا بڕۆلێ خوە ڕابیت و جەماوەرێ خوە تێبگەهینیت کو بگیانێ وەرزشی سەردەریێ دگەل ئێک بکەن و هەر ئەنجاما بیت بسینگەکێ بەرفرهە پێشوازیێ لێبکەن و سەرکەفتنا هەرئێکی ژ وان سەرکەفتنە بو هەردووکا و ڕاستە ل هەمی جیهانێ یاریێن دەربی گەلەک هەستیارن و شەڕ و ئالوزی چێدبیت، ژبەرکو دئێک باژێڕدایە و جەماوەرێ هەردووک یانا ئامادە دبن و هەڤڕکی د مەیدانێ دا پێتر لێدهێت لێ دگەل هندێ دڤێت ژ هندەک سنورا دەربازنەبن و ئەو هەڤڕکی نەکڤیتە وارێ توند و تیژیێ و تێکدانا ڕەوشا باژێڕی و دەڤەرێ!
مخابن ئەڤا ئەم دبینین دڤان ساڵادا دەربیا بەهدینان، کەڤتیە ڕەوشەک تایبەتدا و گەلەک سنور هاتنە دەربازکرن ژلایێ هندەک کەسێن دویر ژ وەرزش و گیانێ وەرزشی و تشتێن بێ واتە تێکەلی فوتباڵێ کرنە وەک دەڤەرداری و ڕەگەزپەرستی و کریارێن دویری وەرزشێ ئێخستنە ناڤ ڤێ یاریا جوان و ناڤا خەلکێ مە، بڕێکا سوشیاڵ مەدیایێن جوەرە و جور و شیانە کەرب و کین و دوبەرەکیەک مەزن بێخن دناڤ خەلکێ مەدا و ژبەرکو ل دەستپێکێ چ توخیب ئان سزا بو ڤان جورە کەسا نەهاتن دانان لەوا ڕەوش گهەشتە ڤێ ڕادێ و مەتڕسیا مەزن ل سەر خەلکێ ئێک پارێزگەھ و ئێک جڤاک، لەوا پێدڤیە ئەم هەمی مێدیاکار،بەرپرسێن حکومی و دەزگایێن حکومی ب وێ بەرپرسیێ ڕابین و نەهێلین ئەو جورە کەس ڤێ تەناهی و پێکڤەژیانا جوانا دهوک و زاخو تێکبدەن و هەر ئێک لدویڤ شیانێن خوە هێزا خوە بێخیت کاری و هەوڵدەین گیانێ برایەتی و پێکڤەژیانێ و گیانێ وەرزشی بێخین دناڤ خەلکێ مەدا کو ڤێ یا دبێژنێ [دەربیا بەهدینان] بڕەنگەک جوان و میناکەک جوان نیشا دەڤەرێ و جیهانێ بدەین!
/فەهمی مایی
