دیدار: هه‌لز عه‌لی سه‌لیم
ره‌وشه‌نبیرێ كورد عه‌بدولره‌حمان بامه‌رنی، ل سالا 1970 ل بامه‌رنێ هاتیه سه‌ر دونیایێ و ل ژیێ (17) سالیێ ئێكه‌م به‌رهه‌مێ خۆ د رۆژناما هاوكاری دا به‌لاڤه كریه و پشتی هینگێ كاروانێ وی دگه‌ل نڤیسینێ ده‌ستپێكرییه و هه‌تا نۆكه (23) په‌رتووكێن چاپكری هه‌نه.
پێنگاڤ: ئه‌گه‌ر بێژینه ته (عه‌بدولره‌حمان بامه‌رنی) كی یه؟
بامه‌رنی: ده‌ما ته ناسناڤێ من گۆتی، مه‌به‌ستا ته ئه‌ز وه‌ك نڤیسه‌ر یان رۆژنامه‌ڤان و ئه‌ز دێ بۆ ته به‌حس كه‌م. ل سالا 1970 ل بامه‌رنێ ئه‌ز هاتیمه سه‌ر دونیایێ و ل ژیێ (17) سالیێ، ئێكه‌م به‌رهه‌مێ من د رۆژناما هاوكاری دا به‌لاڤبوویه و پشتی هینگێ كاروانێ من دگه‌ل نڤیسینێ ده‌ستپێكرییه و هه‌تا نۆكه من (23) په‌رتووكێن چاپكری هه‌نه و ژبلی ئه‌ڤێن د رێزێ دا و خۆ ل ده‌رفه‌ته‌كێ دگرن كو بهێنه چاپكرن. ئه‌گه‌ر به‌حسا وان رۆژنامه و گۆڤاران بكه‌م یێن من بابه‌ت تێدا بلاڤكرین، تا نوكه من د (78) رۆژنامه كوڤارێن كوردی دا به‌رهه‌م به‌لاڤه‌كرینه و كارێ من یێ رۆژنامه‌ڤانی ژی، ل سالا 2005ێ ئه‌ز بوویمه سه‌ر نڤیسه‌رێ رۆژناما چاڤدێر و ل سالا 2011 ئه‌ز بوویمه سه‌ر نڤیسه‌رێ گۆڤارا چاڤدێر و ل سالا 2017 ئه‌ز بوویمه ئێك ژ ده‌سته‌كا نڤیسه‌ران ل رۆژناما (صباح كوردستان) و ل سالا 2020 ئه‌ز بوویمه سه‌رنڤیسه‌رێ مالپه‌رێ روانگه و ره‌خنه پشكا به‌هدینی و نوكه ئه‌ز سه‌رپه‌رشتیارێ كوردستانی نوێی بادینانم كو پاشكویێ رۆژناما كوردستانی نوێ یه و ئه‌ڤ تشتێن ل سه‌ر من گوتین ژی هه‌می د مالپه‌رێ من یێ تایبه‌ت دا د ئه‌رشیفكرینه (https://ebdulrehmanbamerni.blogspot.com/)، و ره‌نگه ئه‌ز ئێكه‌م نڤیسه‌رم بم بڤی ره‌نگی پتریا به‌رهه‌مێ من یێ نڤیسی یێ دیجیتال كری بیت.
پێنگاڤ: رۆژنامه‌گه‌ری و ئه‌ده‌بیات چه‌ند دگه‌ل ئێك دگونجن؟
بامه‌رنی: به‌ری به‌رسڤا ڤێ پرسیارێ ب به‌لێ یان نه‌خێر بده‌م، دڤێت تایبه‌تمه‌ندیێن هه‌ر ئێكێ ژوان بزانین، د رۆژنامه‌گه‌ریێ دا چ ده‌رفه‌ته‌ك بۆ خه‌یالێ و داهێنانێ و ده‌رڤه‌ی راستیێ نینه، دڤێت هه‌ر تشت یێ هه‌ست پێكری بیت و داتا دگه‌لدا بن و د دگه‌ل ئه‌ده‌بیاتێ ژی خه‌یالا هه‌ی، داهنێانا هه‌ی و یاریكرن ب په‌یڤان یا هه‌ی و لێ ئه‌گه‌ر ئه‌ز به‌رسڤێ بده‌م، دێ بێژم یێ بشێت هه‌ردووكان تێكه‌لی ئێك بكه‌ت و بزانیت بێخیته دخزمه‌تا به‌رهه‌مێ خوه‌دا، دێ تشته‌كێ جوانتر ژێ ده‌ركه‌ڤیت.
پێنگاڤ: كیژان كار ب ساناهیتره رۆژنامه‌گه‌ری یان ئه‌ده‌بیات و بۆچی؟
بامه‌رنی: ئه‌ز نزانم تو به‌حسا چ شێوه‌بێ ساناهیێ دبێژی، ژبه‌ركو هه‌ر تشتێ بیت و د چ وار دا بیت، مه‌به‌ستا من نه كار و پیشه‌یێ زه‌ڤله‌كی بیت، حه‌ز و حه‌زژێكرن بۆ دڤێت و دڤێت مرۆڤ ژبۆ كار بكه‌ت و ژبه‌ركو من د هه‌ردوو بیاڤان دا كاركریه، ئه‌ز دێ ئه‌زموونا خوه بێژم، ده‌ما ئه‌ز مژویلی كارێ رۆژنامه‌گه‌ریێ، ئه‌ز كارێ ئه‌ده‌بیاتێ ژ مێشكێ خوه دئینمه ده‌ر و به‌روڤاژی، مه‌به‌ستا من ب ڤێ هاوكێشه‌ییێ، دڤێت مرۆڤ ل سه‌ر وی تشتی كار بكه‌ت ییێ دده‌ستێ مرۆڤیدا و هه‌ر چ كار بیت و دا مرۆڤ بشێت یێ سه‌ركه‌فتی بیت، دڤێت هه‌می هه‌ستێن مرۆڤی بتنێ ل سه‌ر وی كاری بن یێ مرڤ دكه‌ت و دا هێشتا نزیكتر بێژم، ده‌ما ئه‌ز كورته‌چیرۆكه‌كێ بنڤیسم، ئه‌ز هزرا خوه ل چ تشته‌كی دی ناكه‌م بتنێ وێ چیرۆكێ و هوسان تشته‌ك لده‌ف من نینه ب ناڤێ ساناهی به‌لكو ئه‌ز حه‌ز ژ هه‌ردووكان پێكڤه دكه‌م و ده‌ما ئه‌ز ژ نڤیسینێ دوماهی دهێم، ئه‌ز دزانم من كاره‌ك ئه‌نجامدا و ئه‌ڤه بۆ من خۆشه.
پێنگاڤ: وه‌ك ئه‌ز دزانم ته چار دیوانێن شعری هه‌نه و نۆكه تو چیرۆكێ دنڤیسی و ته دو رۆمان ژی هه‌نه، بۆ ئه‌ڤ گوهورینه؟
بامه‌رنی: (38) سالێن نڤیسینێ پیچه‌ك نینن و هه‌ر ل ده‌ستپێكێ ژی مه حه‌زا نڤیسینا چیرۆكێ هه‌بوو، لێ بۆچی ئه‌ز چوومه نڤیسینا شعرێ و بوچی ئێكه‌م به‌رهه‌مێ من یێ بلاڤكری شعر بوو، ئه‌وێ ژی چیرۆكا خوه‌هه‌یه، ل وی ده‌می خه‌ت ده‌ستێ من یێ جوان نه‌بوو و ئێدی من گوت ئه‌ز دێ شعرێ نڤیسم و من نڤیسی، وه‌ك ل پێشیێ ژی من گوتی، ئه‌و تشتێ مرۆڤ دنڤیسیت دڤێت مرۆڤ حه‌ژێبكه‌ت و من ژ شعرێ ده‌ست پێكر و چوار دیوانێن چاپكری یێن شعرێ من هه‌نه، لێ نۆكه ئه‌ز به‌ره‌ڤ ڤه‌گێرانێ هاتم، من كومه‌له‌كا كورته‌چیرۆكان بناڤێ (شۆكرۆیا عه‌زێ) هه‌یه و دوو رۆمان ئێك ب ناڤێ (ره‌شكۆ) و ئێك ژی ب ناڤێ (سمۆیێ باپیر).
پێنگاڤ: من گه‌له‌ك نڤیسینێن ته یێن ره‌خنه‌یی یێن دیتین و ته په‌رتووكه‌ك ژی دڤی بواریدا هه‌یه، گرنگیا ره‌خنێ چ تشته؟
بامه‌رنی: به‌لێ من گه‌له‌ك خواندنێن ره‌خنه‌یی دایه به‌رهه‌مێن نڤیسه‌رێن ده‌ڤه‌رێ، چ شعر بن یان چیرۆك بن یان دیوانێن شعری و رۆمانێ ژی و رێڤه‌به‌ریا چاپ و بلاڤكرنێ دده‌مێ خوه‌دا په‌رتووكه‌ك بناڤێ (تێكست و شرۆڤه‌كرنێ ره‌خنه‌ی) بۆ من چاپكر و دوێ په‌رتووكێدا من ل سه‌ر به‌رهه‌مێ (50) نڤیسه‌ران خواندنا ره‌خنه‌یی هه‌بوو، نۆكه ژی پرۆژێ په‌رتووكه‌كێ ل به‌ر سینگا منه و من ل سه‌ر 33 رۆمانێن ده‌ڤه‌رێ نڤیسییه و ئه‌گه‌ر ده‌رفه‌ت چێبوو دێ گه‌هینمه چاپێ و ئه‌ڤه ژبلی وێ چه‌ندێ به‌رده‌وام ئه‌ز بابه‌تێن ره‌خنه‌یی دنڤیسم و بدیتنا من ره‌خنه گرنگه، دێ بێژییه به‌رهه‌مێ باش باش و یێ خراب خراب و ده‌ما نڤیسه‌ر دبینیت ره‌خنه ل سه‌ر تێكستێ وی هاته كرنێ، ئه‌و دێ هه‌ولده‌ت بۆ جارا بهێت تشته‌كێ باشتر بنڤیسیت.
پێنگاڤ: تو ئێك ژوان نڤیسه‌رانی ل سه‌ر سوشیالێ یێ چالاكی، دێ شێین زانین چ جوداهی د ناڤبه‌را نڤیسینێ بۆ سوشیالێ و دگه‌ل نیڤیسینێ بۆ كاغه‌زێ هه‌یه؟
بامه‌رنی: گه‌له‌ك جوداهییا هه‌ی، ده‌ما نڤیسه‌ر بۆ رۆژنامێ و گوڤارێ دنڤیسیت ب كه‌یفا خوه یه چه‌ند درێژ بنڤیسیت و نڤیسینا وی چ بیت دروسته و لێ بۆ سوشیالێ تشته‌كێ جوداتره، دڤێت په‌یڤێن ته و نڤیسینا ته یا كورت بیت و گه‌له‌ك شرۆڤڤه‌كرن نه‌بیت و یا راسته راست بیت و دڤێت بزانی خه‌لك دێ خوینیت و دێ كومێنت كه‌ت و دێ ته ره‌خنه كه‌ت چ باش چ خراب و ره‌نگه ئه‌و كونتاكا د سوشیالێ دا چ جاره‌كێ دگه‌ل كاغه‌زێ نه‌بیت و راسته ئه‌ز ل سوشیالێ یێ چالاكم و ب باوه‌را من دڤێت ئه‌م نڤیسه‌ر دگه‌ل خه‌لكێ خوه و خوانده‌ڤایێ خوه بین كونتاكه‌كا راسته راست دگه‌ل وان بكه‌ین و ئه‌ز مشه گۆرتارێ به‌لاڤدكه‌م و لدویڤ داتایێن فه‌یسبووك دده‌ته من بۆ نموونه به‌رهه‌مێ من ژی مشه دهێته خواندن و ئه‌ڤه باشه، یان كو ئه‌ز یێ دشێم تشته‌كی بكه‌م و خاله‌كا دی، ئه‌ڤه ئه‌ركێ مه‌یه وه‌ك نڤیسه‌ر و دڤێت به‌رهه‌مێ خوه ب هه‌ر رێكا هه‌یت بدانینه به‌ر سینگا خوانده‌ڤای و ئه‌گه‌ر كاغه‌ز بیت، ره‌نگه بتنێ یێن دناڤ سه‌نته‌رێ باژێریدا بوینن لێ ل سوشالیێ هه‌می و ل كیژ وه‌لاتێ دنیایێ بیت دێ شێت خوینیت.
پێنگاڤ: وه‌ك من تو ناسكری، تو هاریكارییا گه‌نجان دكه‌ی و ئه‌ز دشێم بێژم گه‌له‌ك ل سه‌ر ده‌ستێ ته یێن بووینه نڤیسه‌ر،گه‌نج یان كو چ؟
بامه‌رنی: ژبه‌ركو ئه‌م ژی گه‌نج بووینه، گه‌نج ب مه‌به‌ستا ئه‌وێن حه‌ز دكه‌ن ببنه نڤیسه‌ر و ل سه‌رده‌مێ مه كه‌سه‌ك نه‌بوو ده‌ستێ مه بگریت و رێكێ بۆ مه خۆش بكه‌ت ئه‌م بهێینه دجیهانا نڤیسینێ دا و ئه‌ز دشێم بێژم مه رێكا خوه یا ڤه‌كری و نوكه ئه‌م دڤێت ئه‌م وێ به‌ربه‌ستێ راكه‌ین، ئه‌م رێكێ بۆ گه‌نجان و قه‌له‌مێن نوی ڤه‌كه‌ین و ب حوكمێ كو ئه‌ز سه‌رنڤیسه‌رێ رۆژنامێ و گوڤارێ و مالپه‌رێ ئه‌له‌كترونیمه، به‌لێ من ده‌ستێ گه‌له‌كان یێ گرتی و نوكه خودان قه‌له‌ن و تشتێ جوان دنڤیسین و ب دیتنا مه دڤێت ئه‌ڤ زڤرۆكه یا به‌رده‌وام بیت و مه كه‌سێن ژزیره‌ك یێن هه‌ین ژ هه‌ردوو ره‌ه‌زان و حه‌زا نڤیسینێ یا هه‌ی و دڤێت خوه بیننه پێش.
