فیدراسیۆنی ژنانی دیاسپۆڕای کوردستانی نەرویج
٢١/٣/٢٠٢٥
ڕۆژی هەینی کاتژمێژ ١١ی سەرلەبەیانی، بەرواری ٢١/٣/٢٢٥ زاینی بەرامبەر یەکەم ڕۆژی ساڵی نوێ ی کوردی ٢٧٢٥، فیدراسیۆنی ژنانی دیاسپۆڕای کوردستانی لە نەرویج خاتوو دەریـــا قــادر خۆشــناو بۆ ڕێزلێنان و یادکردنەوەی جەژنی نەورۆز لە پەرلەمانی نەرویج ئامادەبوو!
نەورۆز تەنها ئاهەنگێک نییە، بەڵکو ڕۆژێکی گرنگی نەتەوەییە بۆ کورد. وەک لای هەمووان ئاشکرایە نەورۆز لەگەڵ کۆچبەران هاتۆتە نێو نەرویجیەکان و بەدرێژای چەندین ساڵ جێگیر بووە، ئێستا وەک بۆنەیەکی گرنگی لێهاتووە.
جێگای سەرنجە کە ئاهەنگی نەورۆز لەئاستێکی باڵادا و بۆیەکەم جار لەمێژووی وڵاتی نەرویجدا لەناو پەرلەماندا هاوشانی بەرپرسان و ئەندام پەرلەمانەکان بەڕێوەچوو،
کە لەلایەن ڕێزدار پەرویز ســەلــیمی و بەهاوکاری حیزبی سۆشــیال چەپی نەرویجی سازکرابوو.
مەبەست لەمە پاراستنی بەها گرنگەکانی وەک ئاشتی، پێکەوەژیان، یەکترقبووڵکردن، فرە کولتووری، و هەروەها
دروستکردنی پەیوەندی نێوان ئەو نەتەوانەن کە لە کۆمەڵگە جیاوازەکانەوە هاتوون، و کلتوور و پاشخانی جیاوازیان هەیە.
شایانی ئاماژە پێدانە کە لە ئاهەنگەکە ئەم بەڕێزانەی وتار و پیرۆزبایی جەژنی نەورۆزییان پێشکەش بە ئامادەبووان کرد ئەمانە بوون؛
Gjermund Baklien Skaar یــەرموند سکۆر سەرۆکی کۆمیتەی نێودەوڵەتی حیزبی سۆشیال چەپی نەرویجی،
ماریان حسێن جێگری سەرۆکی حیزبی سۆشیال چەپی نەرویجی،
ئان بێرگ ئەمینداری گشتی خاچی سووری نەرویج، و Andreas Sjalg Unneland ئەندریاس شالگ ئونێلاند، ئەندامی پەرلەمان بۆ حیزبی سۆشیال چەپ و ئەندامی لیژنەی داد،
بیژەن قەرەخانی سەرۆکی ئەنجومەنی فرە کولتوری لە شارەوانی پارێزگای بوسکەرود،
محموود ئەمیری موقەدەم، چالاکوانی مافی مرۆڤ، و پڕۆفیسۆری پزیشکی، و لێکۆڵەری مێشک و دەمار لە زانکۆی ئۆسلۆ،
Gunnar Ekeløve Slydal گونار ئێکێلۆڤ سلیدال، یاریدەدەری سکرتێری گشتی بۆ کۆمیتەی هێلسنکی نەرویج.
هاوکات ژمارەیەکی بەچاوی لە وتاربێژان نوێنەرانی کورد بوون، و کە لەوڵاتی جیا جیا بۆ مەبەستی بەرزڕاگرتنی جەژنی نەورۆز هاتبوون، لەوانە:
لە سویدەوە، ڕێزدار د. ئیسماعیل کامیل ئەندامی پێشووی پەرلەمان لە لیژنەی کاروباری دەرەوە لە سوید،
وانەبێژ لە زانکۆی ستۆکهۆڵم، و سەرۆکی کۆنفیدراسیۆنی ڕەوەندی کوردستانی،
لەکوردستانەوە ڕێزدار فەتحی ئەلمودەریس لەلایەن حکومەتی هەرێمی کوردستان،
ڕێزدار مانی حوسەینی، پەرلەمانتاری پارتی کرێکاران لە نەرویج.
هاوکات وەک میوان لە کوردستانەوە خاتوو کۆچەر یونس سادق سەرۆکی کۆمەڵەی دۆستایەتی کوردستان و سوید ئامادەی ئاهەنگەکەبوو.
هەروەها بەشداربووانی ئاهەنگی نەورۆز بریتی بوون لە نوێنەرانی گەلانی ڕۆژهەڵاتی ناوەڕاست کە یادی جەژنی نەورۆز ئەکەنەوە و نەورۆز بەشێکی گرنگە لە کولتوورەکەیان، لەوانە کورد، ئازەری، بەلوچ، تاجیک، ئەفغانی، ئێرانی، پاکستانی، و هیندی کە هەریەکە و لەماوەیەکی کورتدا باسی نەورۆز و چۆنیەتی بەڕێوەچوونی جەژنی نەورۆزیان لە وڵاتەکەیان کرد.
لەمیانەی پێشکەشکردنی چۆنیەتی و گرنگیەکانی نەورۆز بۆ نەتەوەی کورد لە کوردستان لەلایەن خاتوو ئاڤان ساڵح، داوا لە هەموو بەشداربووان کرا کە دەستی یەک بگرن و لەشوێنی خۆیانەوە هەڵپەرکێ بکەن بەدەم وتنەوەی ماڕشی نەورۆز “ئەم ڕۆژی ساڵی تازەیە، نەورۆزە، هاتەوەجەژنێکی کۆنی کوردە بەخۆشی و بەهاتەوە”، بەمەش جۆش و خرۆش و شادی کەوتە ناو هۆڵی پەرلەمانەوە.
کاتژمێر ١:٣٠ ی نیوەڕۆ کۆتایی بە ئاهەنگەکە هات.
