فـــەرید نوورەدین بــۆزۆ
دەسپێکێ دڤێت ئەڤێ چەندێ بدەینە خۆیاکرن، کو ئەگەرێ دەستنیشانکرنا زمانێ دایکێ ، ڤەدگەرێت بۆ سالا ١٩٥٢ ، دەمێ کۆمەکا قوتابییێن بەگلادشی، کو وی سەردەمی بەشەک بوو ژ پاکستان ، ل زانکۆیا ( داکا )، دژی سیاسەتا زمانییا پاکستانێ خوپیشاندان ئەنجامدا و دڤیا زمانێ وان ( زمانێ بەنگالی ) ببیتە زمانەکێ سەربەخۆ و فەرمی، لێ ئەو قوتابی ژلایێ پۆلیس و سوپایێ پاکستانێ هاتنە کوشتن . لەوڕا ل سالا ١٩٩٩ بۆ ئێکەمجار ڕۆژا ٢١ شوباتێ وەکی ڕۆژا جیهانییا زمانێ دایکێ ژلایێ ( ڕێکخراوا یۆنسکو ) هاتە دەستنیشانکرن، پاشی ل سالا ٢٠٠٨ ئەنجومەنێ گشتییێ نەتەوێن ئێکگرتی پشتەڤانیا خو ژبۆ چالاکیێن ئەوێ ڕۆژێ ڕاگەهاند، و هەر ل سالا ٢٠٠٨ ئەڤ ڕۆژە بوویە سالا نیڤدەولەتیا زمانان.
ئەم کورد چەوا ئەوێ ڕۆژێ ساخبکەین؟
ئاشکەرایە، کو مللەتێ کورد ب درێژاهییا دیرۆکێ ژ هەمی لایانڤە تووشی داگیرکرن و برسیکرن و دەربەدەری و کۆشتنێ…هتد بوویە، هەردیسان ئاخفتن و خواندن و نڤیسین ب زمانێ کوردی، لایەنەکێ دی بوویە کو بەردەوام ڕێگری لێ هاتییەکرن و نەهێلایە ئەم ب زمانێ خۆیێ شرین ب پەیڤین و بنڤیسین و بخوینین، لەوما فەرە پتر ژ هەر مللەتەکێ جیهانێ، ئەم گرنگیێ ب ئەوێ ڕۆژێ بدەین و ئەوێ ڕۆژێ ساخبکەین، هەردیسان د ئەوێ ڕۆژێدا چالاکی و کۆڕ و سمینارێن زمانڤانی ئەنجامبدەین، هەروەسا پیرۆزی و دەولەمەندییا زمانێ شرینێ کوردی نیشانی جیهانێ بدەین و بسەلمینین کو ئەمژی خودان زمانەکێ دەولەمەند و بهێزین، زمانێ مە خودان یاسا و دەستوورێن بهێز و ڕێکوپێکن ، زمانێ مە خودان دیرۆکەکا بهێزە، دیسان بۆ جیهانێ بسەلمینین کو زمانێ کوردی شیان هەنە ببیتە ئێک ژ زمانێن بهێزێن جیهانێ و تاکێن هەر جڤاکەکی دشێن خو فێربکەن کو پێ بپەیڤن.
دیسان مەدڤێت زمانڤان و زمانزانێت مەژی کار لسەر بەرفرەهکرن و دەولەمەندکرن و جیهانیبوونا زمانێ کوردی بکەن، بزاڤ بهێتەکرن کو پشکێن زمانێ کوردی ل ناڤەندێن خواندنێ ل دەرڤە بهێنە ڤەکرن، دیسان پرۆگرامێن زمانی ل زانکۆیێن ناڤخۆ بهێنە زێدەکرن، دیسان ڤەکۆلەرێن زمانی تشتێ نوو بهیننە دناڤ زمانێ مەدا، بەردەوام ڤەکۆلین و نوویاتیێ ئەنجامبدەن.
ژ لایێ تەکنەلوجیایێژی ڤە، داخازێ ژ بسپۆر و شەهرەزایێن ڤی بۆاری دکەین، کو بزاڤا زێدەکرن و تێکرنا زمانێ کوردی بۆ ناڤا سایتێن ئەلکترونی و تۆڕێن جڤاکی بکەن، چونکی ئەڤڕۆ سایت و تۆڕێن جڤاکی پتر ژ هەر ئامرازەکێ دی یێ هاریکارە ژبۆ ناساندنا، کەلتور ، کەلەپوور ، ئایین ، جڤاک و زمان…هتد.
ل دووماهیێ دبێژین، زمان ناسنامەیا مللەتانە، بزاڤکرن ژبۆ پێشڤەبرن و دەولەمەندکرنا زمانێ دایکێ ئێک ژ پیرۆزیانە، لەوڕا ئەرکێ مە کوردان ئەوە، ئەم خو ل زمانێ خویێ شرین بکەینە خودان، کار لسەر بەرفرەهکرن و ناساندنا زمانێ خو بکەین، دیسان دڤێت کاربدەست و شەهرەزایێن مە، بزاڤا تێکرن و زێدەکرنا زمانێ کوردی ژبۆ ناڤا سایتێن ئەلیکترونی بدەن. ب هیڤیا مفا وەرگرتنێ.
