سالمێ ڕەنگینێ
هەی کەدەرا منۆ وەلات
ئەڤ چ بوو بسەرێ تە هات
ل چیا وگوند وباژاڕێد تە
بوو ئەنفال ، وێران وشەوات
ئەڤ سەد سالە تو د نالی
کەس ڕۆندکێد تە نا مالی
نە بار ژ سەر مڵ ددە ئالی
هەتا کەنگێ تو وڤی حالی؟
دەردێ تە تو کەس نە بینێ
برین تاڤێژن ئاڤ و خوینێ
دل ب خەم وکۆڤانا ڕە دمینێ
عەین وەکە سالمێ ڕەنگینێ
تو چار پارجە کری دژمن
هەڕفاند ئەو میژۆیا کەڤن
بێ شەرم وعەیب وفەدی
چاندا تە بر لبەر چاڤێ من
رابه پارچێد خوە بدە هەڤ
خەبات بکە ب ڕۆژ و شەڤ
ببە یەک دل ببە یەک دەڤ
حەیران ژ مەیدانێ نە رەڤ
ملەتێ خوە بکە سەر فراز
بلند بفڕ عەین وەکی باز
ب خەملینە چیا ودەشتان
ڤالا بکە ژ هۆڤان وبەراز
ملەتێ خوە ب کەد وکار بکە
کەچ وخۆڕتێد خوە شیار بکە
دژمنێ خوین مژ بێ زار بکە
جانێ وی ب ژەهرا مار بکە
دوور بکە ژ خاکا خوە دەرین
سنوورێ خوە بگەهینە چین
دەستان لهەرچار پارچا ورین
ل هەر واری بلندکە ئالا ڕەنگین
