دیدار: دلۆڤان هالۆ
کاڕۆژ نزار، مامۆستایێ وانا بیرکاریێ ل قۆتابخانا زاخۆ یا نێڤدەولەتی – سابیس د دیدارەکێ دا بۆ گۆڤارا (پێنگاڤ) دیار کر کو گەلەك جاران بیرکاری بتنێ وەکو بابەتەکێ تەکنیکێن سەیر دهێتە دیتن کو پەیوەندی ب ژمارەیان و ژمێریاریێ و ڕێسایێن تایبەت ڤە هەنە. لێ بیرکاریێ مفایێن سۆزداری و دەروونی ژی هەنە، چونکی فێربوون و زالبوون لسەر کێشەیێن سەخت یێن بیرکاریێ دا د بیتە ئەگەرێ دەردانا هۆرموونێ دۆپامینێ کو ماددەیەکێ کیمیایی یێ پاداشتا مێشکییە، ئەڤە ژی دشێت هاریکار بیت بۆ پەرەپێدانا خۆڕاگریێ و بهایێ بەردەوامیێ و چارەسەرکرنا ئاریشەیان بهێزتر لێ بکەت.
مامۆستایێ ناڤهاتی ئاماژە ب وێ چەندێ ژی کر کو ل دەمێ مرۆڤ هاوکێشەیەکا سادە یا بیرکاریێ شیکار دکەت یان ب رێکا تیۆرێن ئالۆز یێن زەحمەت کار بکەت، بەشێن جیاواز یێن مێشکی چالاك دبن و ل دەمێ کو مرۆڤ د کاودانەکێ دەروونی دا بیت مێشك دشێت بلەز و داهێنەرانە هزر بکەت و ئاریشەیان ب شێوەیەکێ کاریگەر چارەسەر بکەت، چونکی بیرکاری مێشکی نەچار دکەت خۆ دگەل نەخش و چوارچوڤەیێ نوودا بگونجینیت، بۆ نموونە ل دەمێ گۆهورین ل سەر بابەتەکێ وەکو ژماره و ئەندازە و ژمێریاری چێدبیت مێشك دشێت شێوازێ هزرکرنا خۆ ڕێکبێخیت ئەڤە ژی گوهۆرینا ئاستەنگان د زانینێدا بەرەڤ پێش دبەت. بڤی شێوەیی بیرکاری بتنێ مرۆڤی فێری کارامەیا ژمارە و ڕێسا و ئەندازەیێ ناکەت، بەلکو دشێت دەروونی پەروەردە بکەت بۆ ب ڕێڤەبرنا ڕەوشا ئالۆز و ڕاستەقینە یا جیهانێ.
گۆت ژی:”بیرکاریێ کاریگەریەکا مەزن لسەر مێشکێ مرۆڤی و شێوازێ هزرکرنێ هەیە. ب چەندین شێوەیان کاریگەری لسەر پڕۆسەیا زانینێ و هەر تشتەکێ دی هەیە د چارەسەرکرنا ئاریشەیان دا، چونکی گەلەك جاران بیرکاری ژ ژمارەیان و ژمێریاریێ و ڕێسایان مەزنترە. بیرکاری مێشکی چالاك دکەت و شیانێن چارەسەرکرنا ئاریشەیێن لۆژیکی بهێزتر دکەت، و د نیاسین و دانانا پلانێ دا بۆ گەشەکرنا سۆزداریێ و دەروونی ژی ڕۆلێ خۆ د گێڕیت. بیرکاری مێشکی ب شێوەیەکێ وەسا ئاراستە دکەت کو کارێن زانینێ باشتر لێ دکەت و سەرنج و بیردانکێ بهێز دکەت.”
