نایف مەحموود
ڕەنگە هەموو خاندەڤانێ هێژا چیرۆکا بیکا بارانێ بزانن کا ژ چ هاتیە و ژبەر چ ڤێ چالاکیێ دگێرن. ئەڤ نەریتە گەلەک جاران دناڤ مەدا دهێتە دوبارەکرن و کا بیکا بارانێ بو چ مەبەست دهێتە گوتن و ڤەگێران و ئەنجامدان. وەکی هاتیە ڤەگێران ل دان سالەکێ باران نەهاتن و هشکەسالیێ وەرزێ بێ ئومێدی و بێزاریێ ل دەف خەلکی پەیداکر ژ بەر شین نەبوونا دەخل و دان و دەرامەتێ وان. دبێژن پشتی چەندین نڤێژێن بارانێ هاتینە کرن ژ لایێ خەلکی ڤە کو خودێ دلوڤانیێ و بارانێ ببارینیت لێ باران هەر نەهاتن، بو جارەکا دیژی بڕیارێ د دەن بو ئەنجامدانا نڤێژا بارانێ و خەلک دهێتە ئاگەهدارکرن و دچن لێ دیسان هەر باران نەهاتن، بەلێ پشتی ڤێ ئێکێ بڕیارێ ددەن ڕێ و ڕەسمێن بیکا بارانێ بگێرن و ڤێ چالاکیێ ئەنجام بدەن و زاڕۆکان بەژداربکەن، دەمێ دایکا زاڕۆکەکی دبێژیتە کچا خوە ڕابە دا دگەل زاڕۆکێن گوندی بچین بیکا بارانێ چونکی ئەڤە چەندەکا درێژە باران نە هاتین دا باران بهێت، ئەڤ زاڕۆکا کچ ژی بارانیا( سێهوانا ) خو دهەلگریت و دێ دگەل خوە بەتە ڤێ چالاکیێ بو هاتنا بارانێ، دەمێ دایکا وێ دبێژیتێ دایێ ئەو چ بارنیە د دەستێ تە دا و تە هەلگرتی؟ کچا زاڕۆک بەرسڤدا و گوتی دادێ ژبەر بارانێ دا شل نەبم، دایکا وێ گوتێ دگەل خوە نەئینە و دانە مال مانێ چ باران ناهێت و دنیا ساهیە و ژگەرمێ ئەم سوتین! کچا زاڕۆک ژی بەرسڤداڤە و گوتێ دادێ مانێ لەوا دێ بیکا بارانێ گێڕین و لاڤایا کەین باران بهێت، ڤێجا دێ باران هێت و ئەز دێ بارانیا خوە دگەل خوە ئینم و بڤێ ڕژدی و ڤێ ئومێدا ب هاتنا بارانێ، پشتی ب دوماهیئینانا ڕێ و ڕەسمێن بیکا بارانێ ئێکسەر بارانەکا دلوڤانیێ هات و وێ کچکێ ژی گوتە دەیک و بابێن خوە ما من نەگوتە هەوە دێ باران هێت! هەلبەت باوەری و گەشبینی هوکارێن گهەشتنا ئومێد و هیڤی و ئارمانجانە و گەلەک جاران خودایێ مەزن ل دویف هزر و نیازپاکیا مروڤی ب خودێ، خودێ وێ چەندێ ب مروڤی د بەخشیت” انا مع ظن عبدی” ئانکو دگەل هزرکرنا بەندەیێ خوە، لێ هەر دڤێت ئەگەر و کارکرن و هەولدان ژبو هەبن حەتا گوتنەکا مە یا جوان یا کوردەواری ژی هەیە ئەوا،دبێژیت” بو کەسێ ژ کولینکێ نە هاتیە خارێ ” هەلبەت گەر د بزاڤێ و کارکرنێ دا مروڤ یێ ب ئومێد و گەشبین بیت دێ گەهیتە ئارمانج و مەبەستێ. ژیان هوسا مە فێردکەت و پەروەردە دکەت کو نە د بێ ئومێد و ڕەشبین بین و بکەڤینە سەر چوکا و دەستان داهێلین و پاشی بەس کارێ مە ببیتە گازندە و خوە ب دەست بێ ئومێدیێ ڤە بەردەین و ژیانێ ل خوەبکەینە زیندانەکا تاری و خەونان ب مرنا خوە ڤە ببینین، هەلبەت ئەڤ وێ چەندێ دگەهینیت مە باوەری ب هزرا ئەرێنی و گەشبینیێ هەبیت نەکو ببینە ئێخسیرێن هزرێن دائێخستی کو بتنێ گرێدای کوژیەکێ هزرکرنێ بیت و بێی د ڕامانا مەزناهیێ خودێ بگەهین کا چ ژ مە دڤێت و چ گرنگە باوەریا خوە پێ گەرم بکەین.
