سنور سیزار
بەرهەمێن ئەدەبی ل دەڤەرا بەهدینان دنوکەدا ئەگەر ئەم ب هەلسەنگینین نە ل وی ئاستێ پێدڤینە ب شێوەکێ ڕێژەی نە کو ب تەمامەن،چونکی دڤێت ژبیرنەکەین گەلەك بەرهەم هەنە کو ژوان بەرهەمانە چ جاران نامرن و ژ خواندنا وان بێزاری بۆ مرۆڤی پەیدانابیت و ژلایێ زانستی ژی د ئاست بلندن بەلێ کێماسی ژی هەنە،هەلبەت ئەڤ کێماسییە ژی بۆ هندەك ئەگەران دزڤریت، ئەم دشێن ئەوان ئەگەران بدەینە دیارکرن، نە وەرگرتنا ڕەخنێ ژلایێ نڤیسەران، دەمێ ڕەخنەگرەك ڕەخنێ ل بەرهەمێت وان دگرن هێرش دکەنە سەر و وەسا هزر دکەن کو بەرهەمێن وان ب لاوازی د هژمێرن و کەسایەتییا وان دشکێنن ئەڤە ژی هزرەکا شاشە، هەروەسا ئەو کەسێ ڕەخنێ ژی دگریت نابیت ب زمانەکێ زڤر ڕەخنێ بگریت دا نەبیتە ئەگەرێ کێمکرنا بهایێ نڤیسەری و بەرهەمێ وی لاسایکرنا بەرهەمێت بیانی یان ڕێژەکا زۆر یا وەرگێرانا بەرهەمێت بیانی، ئەم نەشێن ئەڤێ خالێ ب تەمامەن بکەینە ئەگەر بۆ کێماسییێ هەلبەت گرنگییا خۆ ژی هەیە، بەلێ دێ ب کێماسی دانین دەمێ نڤیسەر دکەڤیتە بن هزر و بیرێت ئەوی بەرهەمێ بیانی دبیت ئەو بەرهەمە دگەل جڤاکێ کوردی نە گونجیت، بەلێ دێ ب خالەکا باش دانین دەمێ نڤیسەڕێ کورد مفای ژ ئەوی بەرهەمی وەردگریت کو ب ڕێکا ئەوی بەرهەمی نویاتییەکێ دناڤ ئەدەبیاتا کوردیدا بکەت. دیسان دەرکەڤتنا ڕێژەکا مەزن یا نڤیسەرا وەکی ئەم دبینین ل کوردستانێ ب گشتی و ل دەڤەرا بەهدینان ب تایبەتی، ڕێژەکا مەزنا نڤیسەرا دەرکەڤتییە، کو ب ئازادانە چ تشتێ ل سەر هزرا وان هەی د داڕێژن و بەلاڤ دکەن بێ ل دویڤ چ ڕێك و میتودان بچن.
