مەهدی گلی
خۆشتڤییا من
ئەز ئەو بالندەیێ كوچەری وگەشتیاریمە
ل ئەسمانی ودكارێن دەستیدا
ل دویڤ رازیبونا تە دگەرێم.
هێژ ئەز ل دویڤ بیرەوەریێن خۆ
یێن دگەل تەدا دگەرێم
ئەوێن بەحسێ حەسرەت وسوتنیا من دكەن
ژمەرەقداریا ئەشقا تەدا
چ بیرەوەریان هاریكاریا من نەكر
ئاشوپە ژی نەگەهشتن بلنداهیێن تە
لەوما هێژتا بلند دفڕم
هەتا دگەهمە رۆژ وستێرا
بەلێ نەگەهشتم دوماهی وخوزیا
خۆشتڤییا من.
ژ دیناتیا ئەشقاتەدا
هەر دگەرم داكو تە ببینم
دێ ل تە گەرێم
دناڤ كولانیكێن گیانێ خۆدا
دناڤ حەسرەت وئاخینكێن خۆدا
داكو تە ببینم
خۆشتڤییا من
تو ددلێ مندا بەلاتینكەكی
ل دەمێ دنڤم
تو دناڤ گیانێ مندا
دخەو دچی
ئەی زالمێ
تە ژیانا من یا داگیركری
من تۆ دڤێی
بتنێ تو دناڤبەرا هەناسێن مندا
یا هەولاویستی
ددلێ مندا
ب دلسۆزی یا مای
هەر دەمێ دگەل تە دمینم
هەر تو یا دژوورێن مێشكێ مندا
مێشكێ من دغولغینی
خۆشتڤییا من
گیانێ من ژتە هەناسا خۆ هەلدكێشيت
تو یا دناڤ هەبونا خۆشیێن مندا
ئەڤیندارێ بێهن وهەناسا تەمە
تو یا دناڤ ئەڤینییا مندا
من تو هەر دڤێی
ئەز سەرگەردانێ ئەڤینا تەمە
دان پێدانێ دكەم
وەكو دین وهارا خەندقیم د دەریا كوڤانانێن تەدا ..
