زوھێر کۆرەمارکی
ئاریشا بووك و خەسوویا ئاریشەکا کەڤن و نوویە ،حەتا نووکە چارەسەر نەبوویە و ،ھەرتم لبەر ئێک و دوو رەشەنە و دراوەستاینە و ھەر ئێک دکەتە دستوویێ یادی و ئێک و دوو گونەھبار دکەن .ئەگەر ھەردووک ب ھزرو زانابوون بەرێ خۆ بدەنە ھەڤ و رفتارێ دگەل ھەڤ بکەن ،باوەر بکەن دێ ڤێ تاسبیێ و ناکۆکیێ شێن چارەسەرکەن یان چنەبیت دێ گەلەک کێم کەن .بووک ژ ھندەک داب و نەریت و سەرەدەریێن تایبەت ب مالا وێڤە دھێنە مالەکا نوو و ھندەک داب و نەریت و سەرەدەریێن نوو ،حەتا وانا دھێلیت و ڤانا دگریت ئانکو یێن مالا نوو دەم و وەخت پێ دڤێن ،ئەگەر بووک خەسوویا خۆ وەک دایکا خۆ تەماشە نەکەت و رێزو ڤیانێ ھەما چنەبت ژبەر زەلامێ خۆ نەدەتێ ،دێ ھەر ئەڤ گرژییە، یا بەردەوام بیت و دێ مالەکا نە ئارام و نەرحەت یا لکار بیت .خەسوو ژی ھزر دکەت ئەڤە ژنەکا نوو ھاتە دمالا وێدا حەزو ڤیانا کورێ وێ ھەمی بخۆ بر و کورێ وێ ژێستاند و ئەو ھێلا بێ کور ،ھەر ل سەری ھزر دھندێدا دکەت ڤێ بووکێ بێخیتە بن فەرمانا خۆ و ھەمی تشتا ب فەرمانا وێ بکەت لبن شیرەت و فەرمانێن وێ نەدەرکەڤیت.
ئەگەر خەسوو وەکی کچا خۆ سەرەدەریێ دگەل بووکا خۆ بکەت ھوسا بەرێ خۆ بدەتێ ژنەکا بچووک و نوویە یا بێ ئەزموون و تەجربەیە و دڤێت ل ھندەک شاشیێن وێ ببووریت ،دێ کاودان باشتر لێ ھێن و دێ حەز ژ ئێک و دوو کەن ،نە وەکی پشیک و مشکا دێ لبەر ئێک و دوو دراوەستیای بن و دەرگەھێن مالا وان بۆ شەری دێ ھەرێ لتاق بیت ،خەسوو خودان ئەزموونە و وەکی قوتابخانە و ماموستایەکی یە دڤێت دلێ وێ یێ مەزن بت و گیانێ لێبوورینێ پتر ھەبت و سەبرو تەحەملا قوتابیا نوو یا مالێ بکەت حەتا فێر دکەت و عەدەت و بەرنامەو رێکارێن مالێ ھەمیا نیشا ددەت و پێگیریێ پێ بکەت ،فەرە بووک ژی خۆ فێری کەشوھەوایێ مالا نوو بکەت و ھەر چەوا بیت خۆ دگەل بگونجینت و ھزر بکەت کو مالا وێ یا دورست ئەڤ مالەیە و نابیت ژ یاساو رێسایێن ڤێ مالێ ئێدی دەربکەڤیت ،بلا بزانیت ل مالا بابێ خۆ کچ بوو و دەستودارەکێ دی بوو ،لڤێ مالێ نووکە ژنە و قوناغا کچینیێ چوو و دڤێت وەکی ژنا بەرمالا رەفتارو تەعاملێ بکەت .بدیتنا مە دڤێت خەسوو یا پڕی دلوڤانی و ئینسانەت بیت و ب وی چاڤی بەرێ خۆ بدەتە بووکا نوو یا مالێ ،ھەروەسا بووک ژی دڤێت ب رێزو حورمەتڤە بەرێ خۆ بدەتە خەسوویێ و مالا خۆ یا نوو و ئێک و قەبیل بکەن و سەردەریا خۆ ھەر دووک بگھۆرن و سەرژنوو دارێژن .دڤێت ھەر دوو تێبگەھن کەرب و کین و نەڤیان چ مالا ئاڤا ناکەت و ڤیان و موحبەتێ پەیدا ناکەت و ئاریشەو قەیرانا پەیدادکەت .یا باشتر ئەوە ھەر دووک شێوازو رەفتارێن خۆ بگھۆرن و ل بەدیلەکێ گونجای بگەرن و ئێک و بگرن و ڤیان و حەزژێکرنێ دمالا خۆدا ئاڤا بکەن.
ژنەک کچەکا خۆ ددەتە شوو بەری ڤەگۆھێزن ھندەک شیرەتا ل کچا خۆ دکەت و دبێژیتێ کچا من خۆ بۆ زەلامێ خۆ بکە خودام و ئەو دێ بووتە بیتە خولام و وەکی دایکا خۆ سەرەدەریێ لگەل دایکا زەلامێ خۆ بکە ، جھێ چاڤ و دفنا زەلامێ خۆ بپارێزە ،بۆ ببە پارێزڤان و ب حالێ وی یا قانع بە ،چاڤێ خۆ بدە دەم و خارن و نڤستنا وی ،مالێ وی بپارێزە ،چجارا ئەمرێ وی نەشکێنە و نھێنییێن وی بەلاڤە نەکە ،وەختێ یێ بخەم لدەف کەنیا خۆ نەئینە و وەختێ یێ بکەنی خۆ لدەف عاجز نەکە سەرەدەریەکا جوان و لایق لگەل دایک و بابێ وی بکە ھەروەکی تۆ دگەل دایک و بابێ خۆ دکەی و برا و خووشکێن وی وەکی یێن خۆ سەرەدەریێ دگەل بکە ،ھەمیگاڤا یا لسەر خۆ و ئارام بە و جوان و ھەژی رەفتارا بکە و ھەمیگاڤا فاکتەرا چاکیێ و باشیێ بە و ئەو مالاتە یا دورستە، مالا بابێ تە ئێدی نەمالاتەیە ،ڤێجا مالا خۆ یا نوو ب ھەمی تشتێن وێڤە بپارێزە.
