م. شڤان رشید خانو
ئێك ژ ستاندارتێن پێشکەڤتنا زۆربەی وەلاتێن جیهانێ بەژداریکرنا کومەلگەهەکا مەدەنییە ل ناڤ پڕۆسەیا پەروەردە و فێرکرنێ، پڕانییا وەلاتان هەردەم ل خۆ گوهۆرینێ دانە و ل دیڤ ڕێکێن نوو دگەڕێن بۆ پێشخستنا پەروەردەیێ، ئێك ژ ئەوان ڕێکێن هەرە گرنگ، گرنگی دانە ب کومەلگەهێ و بەژدارکرنا ئەوانە ل ناڤ پڕۆسەیا پەروەردەیێ، مامۆستا دکارن ب ڕێکا کومەلگەهێ چەندین کێشە و گرفتێن قۆتابییان چارەسەر بکەن هەر وەکی دزانین پشکەکا زۆر یا قۆتابیێن لاواز هۆکارێ لاوازیا ئەوان ڤەدگەڕێت بۆ دەوروبەر و شێوازێ ژیانا ئەوی ل ناڤ خێزانێ دا هەر ژبەر ئەوێ یەکێ پێدڤییە مامۆستایان پەیوەندیێن بهێز هەبن دگەل سەمیانێن قۆتابییان ب جۆرەك قۆتابی ببیتە پرەك ل ناڤبەرا قۆتابخانێ و کومەلگەهێ دا، هەروەسا گەلەك یا پێدڤییە کومەلگەهـ پشکداربیت د چالاکیێن قۆتابخانێ و ئەوا ژ هەمیێ گرنگتر پێدڤییە مامۆستا بیر و بۆچوونێن سەمیانێن قۆتابییان وەربگریت و خالێن ئەرێنی مفای ژێ وەربگریت و گرنگیێ پێ بدەت بۆ پێشئێخستنا ئەڤێ پڕۆسەیێ، تاکە ڕێك بۆ پێشکەڤتنا وەلاتی پێشکەڤتنا قۆتابیانە و قۆتابی کاکلکا کۆمەلگەهێیە و کریار و شیانێن ئەوی وەکی مۆمەکێ ل ناڤ کومەلگەهێ ڕەنگ ڤە ددەت، ب حوکمێ هندێ کو چەندین سالە ل ناڤەندێن خواندنێ دا مامۆستا مە بۆ مە گەلەك یا ڕوونە و دکارین ئێك ب ئێکی ئەوان قۆتابییان هەلبژێرین ئەوێن ژ لایێ خێزانێن ئەوان ڤە گرنگیێ پێ ددەن و ژ گەلەك ڕوویانڤە جێوازن د گەل قۆتابییێن دی و پتر باوەری ب کەسایەتییا خۆ یا هەی واتە خێزانێ و کومەلگەهێ گەلەك کاریگەرییا خۆ یا هەی دوو چینێن ژێك دانەبڕینە، کەواتە هەر دەمێ قۆتابی پێشکەڤت کومەلگەهـ ژی دێ پێشکڤەیت.
