غیاسه‌ددین نه‌قشبه‌ندی
وه‌كی چێڕوكان:
چار مۆتیڤ ژ كه‌توارێ دیاسپۆڕا كوردی:
ده‌روێشێ عه‌بدی
د گه‌ل هه‌ر رامالینه‌كا گێسكێ وه‌كی ملهێبێ، كۆمه‌كا به‌لگێت زه‌ر و پرته‌قالی دگه‌ل بێهنا بارانێ و شهـ و خوناڤێ دهاتنه ڤی ڕه‌خی. گه‌نجو، دۆسكیێ رزگاربویێ ئه‌نفالێ و خه‌باتا پێشمه‌رگاتیێ دگه‌ل كارێ خو یێ نوی لێڕاهاتبوو، چاوا وان به‌لگان بكه‌ته د ناڤ به‌ڕمیلێ ب تایه‌ردا و ببه‌ته جهێ تایبه‌ت یێ پاشماوێ باخچه‌یان.
گه‌نجوی كارێ خو دكر و هێزا له‌شێ خۆ بكاردئینا، لێ ته‌نێ له‌شێ وی ل وێرێ بوو، بیره‌وه‌ری ل كوردستانا ئه‌نفالكریبوون و هه‌ست د گه‌وریێ دا دخه‌ندقی، نه كه‌سه‌ك هه‌بوو ل گه‌ل بئاخڤیت و نه چ دیوانێن گه‌رم وه‌كی یێن كوردستانێ و نه نووچه‌یه‌ك پشتی ئه‌نفالێ.
ل گه‌ل ته‌مامبوونا ده‌مێ كارێ وی ل وی وه‌ڵاتێ ساڕ و سه‌قه‌م، وی و هه‌ڤالێ خۆ ئه‌وێ هه‌مان باگراوند و هه‌مان دیرۆك و هه‌مان هه‌ست هه‌ین، له‌شێ خۆ یێ ماندی و هه‌ستا خۆ یا پووتی به‌ره‌ڤ وان شوقاه‌ین ئه‌وێت لێ دژیان ڕادكێشا، كو قه‌د نه‌شیاینه ناڤێ وێ بكه‌نه مال، هه‌رده‌م دگه‌ل هه‌ڤالێ خۆیێ كه‌ڤنه پێشمه‌رگه كو دوو بلۆكان وێڤه‌تر دشوقه‌كێ ڤه‌بوو دگۆت: وه‌ره نك من شوقێ، دێ چمه‌ڤه شوقێ، قه‌د نه‌گۆتیه دێ چمه‌ڤه مال، ئان وه‌ره نك من مال.
پیره‌ژنا سكه‌نده‌ناڤی هه‌ڤسویا وی سلاڤ لێكر: “هێی گه‌نجۆ هورماردو ئیداگ
Hej Ganjo hur mar du idag?، ویژی ب سویدیه‌كا بێ چه‌نگو په‌ڕ به‌رسڤا وێ دا: باشم سپاس.
دگه‌ل ڤه‌كرنا ده‌رگه‌هێ شوقێ، بایه‌كێ سار و بێ بێهن و هه‌ست، خو لسه‌روچاڤێت وی دا و هاڤیبوونێ ده‌ستێت خۆ لدور حه‌فكا وی ئالاندنه‌ڤه، چ چاره نه‌مان و كه‌لا گریێ خو لحه‌فكا وی دا؛ گه‌نجو یێ بته‌نێ بو وه‌كی داربه‌ڕویه‌كا كه‌ڤنار.
ژنشكیڤه سترانا ده‌روێشێ عه‌بدی وه‌ك رزگاركه‌ره‌ك هاته تانا وی، ویژی ماشا خو دانا سه‌ر ئاگری و ده‌روێشێ عه‌بدی بهه‌می ده‌نگێخوڤه دگه‌ل هنده‌ك روندكان ستراند و كه‌ڤته دناڤ جیهانه‌كا سوفیدا، كو ته‌نێ ئه‌و دشێت ژانا غه‌ریبیێ لسه‌ر سڤككه‌ت، قێڕكرێ:
وه‌ره هه‌ی لۆ هه‌ی لۆ هه‌ی لۆ هه‌یلۆ لۆلۆ لۆلۆ لۆلۆ .. ئااااااااااااااااا، هییییییییییییییی.
لۆلۆ ده‌روێشۆ ئه‌ز نه‌یا بمالم و نه‌یا بمێرم..
ئه‌ز ره‌به‌نا خودێ خویشكا حه‌فت برا و دوازده پسمامێ مینا شێرم..
حه‌فت برا ودوازده پسمامێ خو سه‌رێ ته‌شیا خو ڤه‌شێرم.
ئااااااههههههههههاااااااااااا هه‌ی لۆلۆ .
عه‌دولێ گۆت: من چ مالێ زه‌حفی گران ناڤێت، ئه‌ز عه‌ڤدالا خودێ ئه‌ز دبێژم كلێ چاڤێ عه‌دولێ من كه‌سه‌ك دی ناڤێ.
ب شه‌ڤێ ده‌لال ب رۆژێ ده‌لال هه‌می ده‌ما ده‌لال.
ئه‌زێ بێژم لێ عه‌دولێ جوتێ مه‌مكێ من بكێری چو كه‌سێ ناهێن، لۆ ده‌لال
لێلێ یادێ ره‌به‌نێ
سه‌برا من توییی لێ لێ
به‌رخا من تویی لێلێ ئاخ ده‌لێلێ و ده‌لۆلۆ
ڤێ سبێ من گو خه‌وكا من تێ و ئه‌ز راكه‌تم ئه‌رێ دایێ دایێ سه‌برا من تویییییی لێ لێ به‌رخامن تویییی لێ لێ.. هاااااااااییییییییییی هههههاااا.
ته‌قته‌قا ده‌رگه‌هی هات، گه‌نجوی خو بێده‌نگكر بێهنه‌كێ، پاشی ده‌رگه‌هـ قایمتر هاته لێدان، گه‌نجوی ده‌رگه‌هـ ڤه‌كر، دیت پیره‌ژنا سویدیه یاهه‌ڤسویا ویه و دكتوره‌ك و پۆلیسه‌ك یێ دگه‌ل.
پیره‌ژنێ گۆتێ:ته چیه كوڕێ من جهه‌كێ ته دئێشیت؟
گه‌نجوی گۆتێ: نه‌خێر، ئه‌زێ باشم من چ نینه.
پیره‌ژنێ گۆتێ: كوڕێ من نه‌ترسه، شه‌رم نه‌كه، ئه‌ڤه دێ هاریكاریا ته كه‌ن.
گه‌نجوی گۆتێ: به‌س من چ نینه، ئه‌ز ناترسم و شه‌رمژی ناكه‌م، چ ل من نینه ئه‌زێ باشم.
پیرێ گۆتێ: نه كوڕێ من، تو نه‌یێ باشی، ئه‌ڤه بێهنه‌كا خوشه من گوهـ ل ته‌بووی تو ژبه‌ر ژان و ئێشێ یێ دنالی و دلۆرینی و ل قوڕیا دده‌ی.
گه‌نجوی گۆتێ: ئه‌و ژانا ل من و ل ملله‌تێ من ب دكتورێ ته و پۆلیسێ ته چاره‌نابن، ژانه‌كا كویره، بسه‌دان ساڵه نفشێ مه دنالینیت، چ جهێت من نائێشن، برینا ملله‌تێ من دئێشیت، هه‌ما هوین بێژنه حكۆمه‌تێت خو چه‌كی نه‌ده‌نه دژمنێت مه، مه پێ قڕكه‌ن، مه چ ئێش نامینن.
پیره‌ژن چ تێنه‌گه‌هشت و گۆتێ: ئه‌ز زوی نانڤم، كه‌نگی ته ڤیا گازی من بكه دێ هێمه تاناته.
گه‌نجوی ده‌رگه‌هـ لێ گرت و هاته‌ڤه تانا ماشا خو و ده‌روێشێ عه‌بدی ددلێ خودا ببێده‌نگی گۆت و گۆت.
ــــــــــــــــــــــــــــــــــــــــــــــــ
ب ماتۆرسكلێ هاته ئوسترالیا
ئه‌فسه‌رێ دائیرا مشه‌ختیێ یا ئوسترالیا بو جارا دویماهیێ پرسیارا هاشمی كر: تو چاوا هاتیه ئوستڕالیا؟
وه‌رگێڕی بكوردی بو هاشمی دوباره‌كر.
هاشمی گۆت: ئه‌ز، بماتورسیكلێ هاتم، ئه‌ڤه جارا ده‌هێیه ئه‌ز دبێژم.
ئه‌فسه‌ری گۆتێ چاوا ب ماتورسیكلێ؟ ئوستڕالیا گزیرته‌یه‌كه د نیڤا ئۆقیانوسی دا، رێكا هشكانه نینه.
هاشمی ئاخڤتنا وی بڕی گۆت: ئه‌ز دزانم.
ئه‌فسه‌ری گۆتێ: ئێ پا تو چاوا هاتی؟
هاشمی گۆت: ب ماتۆرێ.
ئه‌فسه‌ر گه‌له‌ك توڕه‌بوو، كو نابیت توڕه‌ببن به‌شه‌كه ژ شولێ وان و دمه‌شقداینه بو هندێ كو قه‌د توڕه‌نه‌بن. ئه‌فسه‌ر ڕابوو نه‌خشا ئوسترالیا ئینابوو هه‌لاویست گۆتێ ئهێ، ئه‌ڤه ئوسترالیایه، ئه‌م یێ لڤێرێ چ ڕێك نینن بهشكانی بهێی.
هاشمی گۆتێ: ئه‌ز دزانم، به‌س ئه‌ز یێ ماتوری هاتیم.
ئه‌فسه‌ر دیسان رابووڤه دوو وێنه ئینان ئێك یێ ماتورسكلێ و ئێك یێ ماتۆڕا د ناڤ ئاڤێدا جێت سكی، نیشاندا، به‌ری ئۆفیسه‌ر بئاخڤیت هاشمی گۆتێ: ئه‌ز دزانم، نه ئه‌وا ئاڤێ یا دی. ئه‌فسه‌ری گۆتێ: تو چه‌وا پێهاتی؟
گۆت: ئه‌ز لپشت قاچاغچی سیاربوم و هاتم.
ژ تووڕه‌بوون و هه‌لچوونا ئه‌فسه‌ری، ئێكسه‌ر نامه‌ك بۆ نڤیسی بوو خه‌سته‌خانا دینان.
سیكیورتیان ملێت وی گرتن و ژ ژورێ بره ده‌رڤه به‌ره‌ڤ خه‌سته‌خانا دینان، وه‌رگێڕ ژی بێهنه‌كێ ما دژورڤه و پاشی چوو.
پشتی ساڵه‌كێ لبازاڕی وه‌رگێڕی هاشم دیته‌ڤه، و سلاڤكرێ، هاشمی گۆتێ: ئه‌ز برمه خه‌سته‌خانا دینان و ژوێرێ شانده‌كێ كه‌نیسێ بو هاریكاریێ هات و ئه‌ز ئینامه ده‌رڤه ب سێ هه‌یڤا مافێ نیشته‌جێبونێ دا من، لده‌مه‌كی ئوسترالیا نیشته‌جێبونێ ناده‌ته وان ئه‌وێ ب قاچاغ دهێن به‌ری شه‌ش ساڵا د كه‌مپێ ڤه.
وه‌رگێڕی گۆتێ، پا نهو تویێ چاوانی حالێ ته چیه؟
هاشمی گۆتێ: ئه‌ز گه‌له‌كێ باشم، من خێزاناخوژی ئینا و بارودوخێ من گه‌له‌كێ باشه.
وه‌رگێڕی گۆتێ: ئێ باشه لسه‌رخێرێبیت، من پێخوشه تویێ باشی، به‌س براستی بێژه من تو چه‌وا هاتیه ئوستڕالیا؟
هاشمی گۆتێ: ب ماتوڕێ، بڕڕ بڕڕ بڕڕووووم !!!
ـــــــــــــــــــــــــــــــــــــــــــ
لۆجیكی زمان
حاكم بوو جاری كۆتایی داوای لێكرد ناو ی سیانی و شوێنی له‌دایكبوونی به وازحی بڵێته‌وه..
بێستون زۆر له‌سه‌رخۆ و وازح گۆتی: بێستون حه‌سه‌ن محمد.
وه‌رگێڕه‌كه ناوه‌كه‌ی دووباره‌كرده‌وه بۆ ئه‌فسه‌ری دائیره‌ی مشه‌ختیبون.
ئه‌فسه‌ره‌كه: بێستون پێمان بڵێ كو هاتیه ئه‌ڵمانیا؟
بێستون: ئه‌وجا كو نه‌هاتم!
ئه‌فسه‌ر: به‌كوێدا هاتی؟
بێستون: ئه‌وجا به‌كوێدا نه‌هاتم!
ئه‌فسه‌ره: كێت له‌گه‌ڵبو؟
بێستون: ئه‌وجا كێم له‌گه‌ڵنه‌بو!
ئه‌فسه‌ر: له‌كوێ مایه‌وه هه‌تا گه‌یشتیه ئێره؟
بێستون: ئه‌وجا له‌كوێ نه‌مامه‌وه!
ئه‌فسه‌ر: ته‌یاره‌كه چ ره‌نگبو؟
بێستون: ئه‌وجا چ ڕه‌نگنه‌بو!
ئه‌فسه‌ر: قه‌چاغچیه‌كه‌ت كێبو؟
بێستون: ئه‌وجا كێ قه‌چاغچینه‌بوو!
ئه‌فسه‌ره‌كه: چه‌ند پاره‌ت سه‌رفكرد به‌هه‌موی؟
بێستون: ئه‌وجا چم پێما!
ئه‌فسه‌ر لۆ هاتیه ئه‌ڵمانیا؟
بێستون: ئه‌وجا لۆ نه‌هێم؟
ئه‌وه دووا دیداری بێستونبو كه ئێستا له‌ئه‌ڵمانیا نیشته‌جێیه و له به‌له‌ده‌یه شارێكی گه‌وره ئیشده‌كات، ماڵو منداڵی هێنا و بوه هاوڵاتیی ئه‌ڵمانیا.
ئه‌فسه‌ره‌كه‌ش له خه‌فه‌تان كوشكێكی بچوكی له‌بانهوف كردیته‌وه و جگه‌ره و رۆژنامه ده‌فرۆشێت.
ـــــــــــــــــــــــــــــــــــــــــــ
هه‌ر به‌ره‌ك ل جهێ خۆ یێ ب قه‌دره
عه‌بدولا یێ د كونجه‌كا تاریڤه كفكفا ویه و نزانیت كه‌نگی دبیته شه‌ڤ و كه‌نگی دبیته رۆژ، دا بێژی میموریا وی یاهاتیه ژێبرن و ته‌نێ ئێك رسته دزانیت و هه‌ر وێ دبێژیت و دبێژیته‌ڤه: “هه‌ر به‌ره‌ك لجهێ خو یێ بقه‌دره، هه‌ر به‌ره‌ك لجهێ خو یێ بقه‌دره”
به‌ری هینگی بساڵه‌ك و نیڤان سوهه‌یلا ژنا وی دگۆتێ: دابچینه خارج، مادێ چكه‌ین لڤێرێ، مه چ ژیان و خوشی لڤێرێ نه‌ماینه، پاشه رۆژا بچویكێت مه لوێرێ باشتره.
عه‌بدلای هه‌رده‌م دگۆته سوهه‌یلایێ: هزرا خارج ژسه‌رێ خو بینه ده‌ر، چ عه‌یب لمه و ژیانا مه نینن، ئه‌م نه‌دقه‌ردارین و نه كرێچینه و حالێ مه یێ خرابنینه، ئه‌ڤه چ خارجه! كه‌تیه سه‌رێته؟
سوهه‌یلایێ دگۆتێ: ما ئه‌ز چ ریما ماكه‌ر كێمترم، هه‌ڕو بومن ته‌لفونێ دكه‌ت و ره‌سمێت پاریسێ و به‌رلینێ نیشامن دده‌ت، دلێ من په‌قاند، ئیللا ئه‌ز ژی بچم.
سوهه‌یلا وه‌كی كرمێ دارێ كه‌ته دسه‌رێ عه‌بدلایدا و هه‌ر رۆژ ده‌هجاران دگۆتێ: عه‌بدلا دا بچین مه چ ژیان لڤێرێ نه‌بره‌سه‌ر.
عه‌بدلای دگۆتێ: ئه‌ڤه چ خارجه چویه سه‌رێته سهێ، دێ به‌سه،كیڤه بچین؟
دێ ره‌زیل و رسوا بین دێ چ كه‌ین ل كولانێت خه‌لكی؟
سوهه‌یلایێ بارودۆخێ كوردستانێ دسه‌رێ عه‌بدلایدا مه‌زنكرن و دگۆتێ: ته‌حین ناهێته فروتن كه‌س ناكڕیت چ فایده تێدا نینه هه‌ما زه‌حمه‌ت بته دمینیت، سه‌حكه خه‌لكێ گه‌هشته كیرێ و ئه‌م هێشتا یێ لجهێخو.
ژ خه‌م و خه‌فه‌تا بارودۆخێ كوردستانێ عه‌بدللای كارگه‌ها خو یا ته‌حینێ ل ئامێدیێ دگه‌ل هه‌می بیره‌وه‌ریێت بابوكالان بو هێلاین دگه‌ل ئاشی هه‌می فرۆتن و پاره‌كێ باش بده‌ستكه‌ڤت.
په‌یوه‌ندی ب قاچاغچیه‌كی كر،ئه‌وێ هه‌ڤالێ وی ئه‌حمه‌دی ئه‌وێ ل فنله‌ندا ناڤ و ژماره داینێ. وه‌سا دیاربو ئه‌حمه‌دژی شه‌ریكێ قه‌چاغچیبو چونكی گه‌له‌ك ب مكوڕی دگۆته عه‌بدلای: دڤێت هه‌ر دگه‌ل ڤی قه‌چاغچی بهێی، هه‌ما تو گه‌هشتی ئه‌ز دێ هێمه به‌راهیا ته ته‌خه‌منه‌بیت.
عبدلا و ژنا خۆ سوهه‌یلا و سێ بچویك چونه توركی، پشتی چه‌ند رۆژه‌كان ل هوتێله‌كا گرانبه‌ها په‌یوه‌ندی ب قه‌چاغچی كره‌ڤه و ئه‌دره‌سا خو دایێ، چه‌ندین ژڤانێت خرش كو قه‌چاغچی نه‌دهاته ژڤانێ داعویران و بناچاری قه‌بویلكرن. عه‌بدلای هه‌ررۆژ ته‌له‌فونا ئه‌حمه‌دی دكر ل فنله‌ندا، ودگۆتێ: هه‌ڤالێ تیێ قه‌چاغچی نه‌هات!
ئه‌حمه‌دی ژی دگۆتێ: خه‌مێ نه‌خو من یادگه‌ل ئاخڤتی، دێ هێت، به‌س چاڤێ پۆلیسی گه‌له‌ك یێ لسه‌ر پێدڤیه یێ وریا و هشیاربیت.
شه‌ش هه‌یڤ ب سه‌ر ڤان ژڤانان ڤه ده‌ربازبوون و عه‌بدلای ته‌نێ جاره‌كێ قاچاغچی ل چایخانه‌كێ دیت و دوو جاران ژی قه‌چاغچی عه‌بدلا گازیكره شیڤی و پاره ب وی دان.
بهار چوو و پاویز هات، رۆژه‌كێ ته‌له‌فونه‌ك بو عه‌بدلای هات: ئه‌ز فیراس م ئه‌ز شریكێ قه‌چاغچیمه سوبه‌هی ئێڤاری وه‌ره سه‌ر لێڤا ئاڤێ ل رویێ باشور یێ ده‌ریایێ و دێ ده‌ربازبین، ئه‌ز دێ ته ده‌ربازكه‌مه یۆنان و ژوێرێ قه‌چاغچیێ ته دێ هێته به‌راهیا ته، ئه‌و نهو نه‌شێت بهێته توركی ئه‌مرێ گرتنێ یێ لسه‌ر.
عه‌بدلا ببچویكڤه خو ئاماده‌كر و چو وی جهێ گۆتیێ، حه‌تا ئێڤاری لوێرێ ما كه‌س نه‌هات، لێ بو شه‌ڤ، به‌لێ هه‌ر دیسان ئه‌و جهـ نه‌یێ ژڕه‌نگی جهێت قه‌چاغچیان بوو، توریست دهاتن و خه‌لك لوێرێ كۆمدبون ستران دگۆتن و ده‌مێت خوش دبوراندن.
عه‌بدلا و سوهه‌یلا و سێ زاروك حه‌تا نێزیكی دوازدێ شه‌ڤێ لوێرێ مان، و كه‌س نه‌هات.
عه‌بدلای ته‌له‌فوونا ئه‌حمه‌دی كر و بگازنده‌ڤه گۆتێ: برا ئه‌ڤه ئێك یێ مه ڕاده‌ستی ئێكێدی دكه‌ت! ئه‌ڤه ته چ بسه‌رێ من ئینا! من باوه‌ره‌ی بته ئینا و نهو ئه‌ڤه حالێ منه من چ پاره ژی نه‌ماینه مه هه‌می ل توركی خوارن و مه چ نه‌ما!
ئه‌حمه‌دی گۆتێ ولله ئه‌ز نزانم ئه‌ز دشێم بۆ ته هنده‌كا په‌یداكه‌م به‌س نه‌شێم هه‌میێ په‌یداكه‌م ته چل هه‌زار دولار دڤێن دا ته ده‌ربازكه‌ن.
عه‌بدلای ب دله‌كێ سۆتی ڤه گۆتێ ئه‌ز نه‌شێم هه‌میا بده‌مێ باوه‌ریا من لێناهێت.
ئه‌حمه‌دی گۆتێ: بومن ڤڕێكه و ئه‌ز دێ ده‌مێ ته خه‌منه‌بیت.
عه‌بدلا كه‌ڤتبوو ده‌ست ته‌نگیێ و پارێ وی كێمببوو، خه‌به‌ره‌ك بو برایێ خو ڤڕێكر و پسمامێت وی به‌لكی هنده‌ك پاران بو ڤڕێكه‌ن دا پارێخو تمامكه‌ت.
برایێ و ی ساڵحی گۆتێ: برا باوه‌ربكه كه‌سێ ژ مه هند پاره نینن ئه‌م بۆ ته ڤڕێكه‌ین ب كوتته‌ك ئه‌م دشێین خۆ بڕێڤه‌ببه‌ین، به‌س ئه‌گه‌ر ته بڤێت دێ خانیێ ته یێ سه‌ر شویرهێ فروشمه عسمه‌تیێ كور خاله‌تا مه، وی ژمێژه دگۆت من خانیه‌ك لسه‌ر شویرهێ دڤێت.
عه‌بدلا بناچاری رازیبو و برایێ وی خانیێ وی یێ سه‌ر شویرهێژی فروت و پارێ وی بو ڤڕێكر.
عبدلای رۆژا پاشتر پاره ل مه‌كته‌به‌كا دراڤی چل هه‌زار دولار ڤه‌گوهازتن و بو ئه‌حمه‌دی ڤڕێكرن، ئه‌حمه‌دی ته‌له‌فون بوكر و گۆتێ: درسته برا، گه‌هشتن، خو ئاماده‌كه دێ هێنه ددویڤته‌ڕا.
ئه‌و جارا دویماهیێ بوو ده‌نگێ ئه‌حمه‌دی گوهلێببیت، و لجهێ خوژی نه‌ما دگه‌ل خێزان و زاڕوكێت خو چونه ژوره‌كا بچویك كرێكر، حالێ وان گه‌له‌ك ژیێ صه‌ی باشترنه‌بوو.
سێ هه‌یڤا مان، كه‌سێ په‌یوه‌ندی پێنه‌كر و كه‌س دیارنه‌ما، نه ئه‌حمو و نه قه‌چاغچی و نه هه‌ڤالێ وی، ناچار په‌یوه‌ندی بئامێدیێ و هه‌ڤال و مروڤێتخو كره‌ڤه و گۆتێ ئه‌زێ دحاله‌كێ ته‌نگدا یا لمن قه‌ومی، هاریكاریا من بكه‌ن بێشه‌كێ بومن بكه‌ن.
نه‌هه‌رێ هه‌میا پێكڤه دوو هزرار دولار كۆمكرن و بو ڤڕێكرن، لێ تێرا هه‌یڤه‌كێ نه‌كرن. رۆژه‌كێ لقه‌یسه‌ریا ئسته‌نبولێ دگه‌ڕیا هه‌ڤاله‌كێ خو یێ كه‌ڤن دیت! خو تێوه‌كوه‌ركرن و پێكڤه روینشتن حالێ خو بو هه‌ڤالێ خو یێ كه‌ڤن هیوای گۆت.
هیوای گۆتێ: ته چاوا وه‌كر؟ دا بیژی هه‌ی مالاته خودێ ئاڤاكه‌ت، ئه‌ز دێ بره‌سمی ته‌به‌م و بێی كو چ پارا بمه‌زێخی، خو ئاماده بكه دێ ته به‌مه سه‌فاره‌تا كه‌نه‌دا و دێ بره‌سمی ته ڕاكێشم، به‌س پێدڤیه بچمه‌ڤه كوردستانێ و هه‌یڤه‌كا دی دێ هێمه‌ڤه دێ شولێت ته هه‌میا چێكه‌م و دێ ته به‌م.
عه‌بدلا بكه‌یف و خوشی چو بازاڕی و قازه‌كا ژهه‌میا لاوتر كڕی و ئیناڤه مال داڤ سوهه‌یلایێ و گۆتێ: سهێ ڤێ قازێ چێكه ئه‌مێت كولافیبوین ژبرساندا، خودێ ده‌رگه‌هه‌كێ باش یێ بومه ڤه‌كری، سوهه‌یلا كه‌ڤته سه‌ر قازێ و لاو چێكر، ویژی جار جار بده‌نگه‌كێ بلند دگۆتێ: سهێ .. لاو چێكه، بلا ئاڤك لسه‌ربیت.
سوهه‌یلایێ ژی دگۆتێ: بلا عه‌بدلا دێ بدلێ ته چێكه‌م.
عه‌بدلا نه‌شیا گه‌له‌ك لمال روینیت هه‌دارا وی نه‌دهات حه‌تا قاز چێدبیت، رابو چو ژده‌رڤه پیاسه‌كا ناڤ سویكێ كر و بتڵه‌كێ عه‌ره‌قێ كڕێ و هنده‌ك فێقی و چه‌ره‌زژی ئینان و هاته‌ڤه مال، عه‌ره‌قا خو دانا و هێدی هێدی دبه‌ر بلقبلقا مه‌نجه‌لێ ڕا ڤه‌خوار و سوهه‌لایێ ژی جار جار دگۆتێ: ئه‌ڤه چیه ته ئینانی نێ خێر و به‌ره‌كه‌ت دمالامه‌ڤه نامینن، ئه‌ڤه چ گویه تو ڤه‌دخوی.
عه‌بدلای ژی ب زمانه‌كێ گران دگۆتێ: ما چ به‌ره‌كه‌ت دڤێ كمباخێڤه هه‌یه دا بچیت.
قازا خۆ دگه‌ل زاڕوكا خوار و شه‌ڤه‌كا بكه‌یف و خوشی دگه‌ل سوهه‌یلایێ بره‌سه‌ر، سوهیلاژی رازیكر و ئه‌ڤه جارا ئێكێ بو پشتی ژئامێدیێ هاتین عه‌بدلای گڕنژین لسه‌ر لێڤێت سوهه‌یلایێ دیتی.
سپێدێ زوی سوهه‌یلایێ ئاڤ ب پرێمزی گه‌رمكر و سه‌رێ خو شویشت و نڤێژا خو كر و عه‌بدلای ژی سه‌رێ خو شویشت و ژمال ده‌ركه‌ڤت.
لقه‌یسه‌ریێ ژنشكیڤه هه‌ڤالێ قه‌چاغچی دیت، ده‌رفه‌ت نه‌دایێ چ ببێژیت، به‌رسینگێت وی گرتن و گۆتێ: وه‌ره ئه‌ڤه تولكیرێی دێ شكیاتێ لهه‌وه‌كه‌م ئه‌حمه‌دژی و قه‌چاغچیژی و توژی دزن، هه‌وه پارێ من خوار ئه‌ز هێلامه لڤێرێ مال و عه‌یال ره‌زیلبون، ما چ ژمن كێمبو لئامێدیێ من ئاشێ ته‌حینێ هه‌بو و من خانی و ناڤمالی هه‌بون، من هه‌می فروتن و من پاره د له‌پێ وه ڕاكرن، دێ نهو شكیاتێ لته‌كه‌م و بلا ته بگرن.
هه‌ڤالێ قه‌چاغچی هزار سویند خوارن و گۆتێ: ئه‌زێ هاتیم لته بگه‌ڕم گه‌میا حازره و عه‌باسی (قه‌چاغچی) ته‌له‌فونا خو یا گوهڕێ له‌وا مه نه‌دزانی تو لكیرێی باوه‌ربكه ئه‌ز یێ هاتیمه ڤێرێ پرسیارا ته دكه‌م من نهو به‌ری تو بهێی پرسیارا خودانێ چایخانێ كر گۆته من لڤێرێ نه‌مایه و منژی وه‌زانی تو یێ چویه‌ڤه كوردستانێ.
پیچه‌كێ عه‌بدلا داهات و باوه‌ریه‌كا دی پێكره‌ڤه، گۆتێ: كا گه‌میا چ تو شقه‌ستا وه‌دبێژی ئه‌ڤه هه‌می دره‌ون دێ ته ته‌سلیمی پۆلیسیكه‌م. جارا دیژی ته وه‌لمن كر ئه‌ز بزاڕوكڤه حه‌تا سه‌عه‌ت ئێكی شه‌ڤێ لكولانا ماین كه‌س نه‌هات، فارسی گۆتێ: برا جارادی ئه‌م هاتین به‌س ده‌وریا پۆلیسی هه‌بو ئه‌م نه‌وێریان خو دته بگه‌هینین دا ته‌ژی بزاڕوكڤه گرن و دیپورت كه‌نه‌ڤه كوردستانێ.
فارسی گۆتێ: ئه‌گه‌ر من تو سوبه‌هی ب شه‌ڤێ سیاری گه‌میێ نه‌كری و حه‌تا ئه‌وڕۆپا من تو نه‌بری حه‌قێ ته‌یه، پاشی شكیاتێ ل من بكه، ئه‌ڤه ته‌له‌فوونا من و ئه‌ڤه‌ژی جهێ ژیانا منه.
عه‌بدلا بته‌مامی داهات، لێ كه‌ڤته دناڤ گرفته‌كا دیدا، نێ هێمنێ هه‌ڤالێ وی سوزا دایێ ببه‌ته كه‌نه‌دا، دناڤ ڤێ گێله‌شوكێ دمه‌ژیێ خودا ئێكسه‌ر گۆتێ: پارێ من بده‌نه‌ڤه، من نه‌ڤێت ئه‌ز ناچم، من چ ژهه‌وه نه‌ڤێت به‌س پارێ من بده‌نه‌ڤه.
فارسی گۆتێ: برا ته پاره نه‌دایه من ئه‌ز نزانم ئه‌حمه‌دژی كیه و ئه‌ز ته‌ژی نانیاسم، ئه‌ز دێ بخێرا خو ته‌به‌م.
رۆژانه عه‌بدلای هزرا مالا خۆ یا سه‌ر شویرهێ دكر و رۆژانه بیرا وی ل ئاشێ ته‌حینێ و بابێ وی دهات، لێ دگه‌ل دویكێلا جگارێ و بێحالیا وی هه‌می ڤه‌دڕه‌ڤین و دكه‌ڤته‌ڤه دناڤ كه‌تواره‌كێ تاڵ و نه‌خوش و به‌رته‌نگدا.
عه‌بدلای هه‌می ره‌ڤه‌ندا كوردی لده‌رڤه تێگه‌هاندبو، و برا و پسمامێت ویژی گه‌ف ل مالا ئه‌حموی كربون، دیاربو كارتێكرنه‌ك بشێوازه‌كی ئان بئێكێدی لسه‌ر ئه‌حمه‌دی هاتبوكرن، له‌وا رۆژا پاشتر ئه‌حمه‌دی ته‌له‌فونا وی كر و گۆتێ برا قسیریا من عه‌فوكه بخودێ باوه‌ربكه ئه‌ز گرتبوم، له‌وا نه‌شیام ته‌له‌فونا ته بكه‌م، ئه‌ز د به‌ندیخانێڤه‌بوم و ته‌له‌فونژی ژمن ستاندبو، ما دا چه‌وا خه‌به‌ری ده‌مه‌ته.
عه‌بدلای بنه‌چاری باوه‌ركر، ما دێ چ بێژیتێ.
گه‌له‌ك پێڤه‌نه‌چو عه‌بدلا ب خێزانڤه سیاری گه‌میه‌كێ كرن و دگه‌ل نێزیكی بیست خێزانێت دی خو ل ده‌ریا ئیجه دا، ئیجه یا كه‌مباخژی شه‌پولێت وێ دبلندن و بایه‌كێ بهێزژی دهات هه‌می پێكڤه دوعا و نزا دكرن خودێ بسلامه‌تی ده‌ربازكه‌ت، دوی ده‌میدا سوهه‌یلا دیار نه‌ما، عه‌بدلاژی گۆته ئێكی چاڤێته لبچویكا بیت دێ نهو هێمه‌ڤه، چود كابینا گه‌میێڤه به‌رێخودایێ قه‌چاخچی سوهه‌یلا یا گرتی و دڤێت بزورداری ته‌عه‌دایێ لێبكه‌ت، ویژی نه‌كره نه‌مه‌ردی و ده‌ستدا ئاسنه‌كی وه‌كی رمێ بو و بو ترساندن به‌رێ وێ دا سینگێ قه‌چاغچی بو ترساندنێ لێ بێده‌ستی رم دسینگێ قه‌چاخچیڕا چو و ژ بشتێ ده‌ركه‌ت، خه‌لكێ پێلێت ئاڤێ و ودوعایێت خو هێلان و بژوركڤتن دیت قه‌چاخچیێ دخوینا خو دگه‌ڤزیت. رم ژێ ئینا ده‌ر و قه‌چاخچی دجهدا مر.
كاپتنێ گه‌میێ و هاریكارێ وی هاتنه دژورڤه و ئه‌و دیت ئه‌وا دیتی. ئێكسه‌ر په‌یوه‌ندی ب خه‌فه‌رێت ده‌ریایێ كر و گۆتێ:تاوانه‌كا كوژتنێ یا چێبوی و ب GPS جهێ خو دایێ. سوهه‌یلایێ عوڕعوڕه‌ك دكر و توشی هستریایێ ببو هندی ژنا هاویشدكر فایده‌نه‌بو، هه‌ردلویراند و بگری و زێمارڤه دگۆت: ئای عه‌بدلا، ته مالا مه وێرانكر ته چ ئینا سه‌رێ مه، ما چ عه‌یب ل ژیانا مه هه‌بو ئه‌م وه‌كی مه‌لیكا دژیاین.
دویده‌میدا دیاربو ده‌ریایێ نه هایژ عه‌بدلای و نه سوهه‌یلایێه، پێله‌كا مه‌زن رابوو و گه‌میا وان ب تاوانڤه بنئاڤكر ئێدی كه‌سێ كه‌س نه‌دیت، شێلوبێلبو.
حه‌تا خه‌فه‌رێت ده‌ریایێ گه‌هشتینێ پتر ژنیڤا وان بنئاڤببون.
گه‌میا پۆلیسێت ده‌ریایێ ئه‌وێت ماین رزگاركرن و هه‌لیكوپته‌رێ برنه خه‌سته‌خانان و دیاربو سوهه‌یلا دگه‌ل نه‌بو، عه‌بدلا و زاڕوك مابونه ساخ، پۆلیسی گازیا كاپتنی یا تاوانا كوشتنێ كره كه‌یس و لسه‌ر ڤه‌كر، مامێت وان و كه‌سوكاران زاڕوك ئینانه‌ڤه كوردستانێ و عه‌بدلا ب یاسا یونانێ بیست ساڵان هاته سزادان، هه‌رده‌م دگۆت و دگۆته‌ڤه “هه‌ر به‌ره‌ك لجهێ خو یێ بقه‌دره” .
+ ئه‌ڤ مۆتیڤه، من ژ رویدانێت كه‌تواری وه‌رگرتینه ئه‌وێت من گوهلێبوین و دبیردانكا مندا ماین، ناڤێت وان نه ددروستن، من یێت دانانینه سه‌ر كارێكته‌ران.
