زوھێر کۆرەمارکی
ئەم ھەمی دزانین ھەلبژاردن کاکلا دیموکراسییەتێنە ،بتایبەتی بۆ وەلاتێن پێشکەفتی و خودان دیموکراسییەتەك دوور و درێژ ، لوەلاتێ پێشکەفتی ھەلبژاردن دھێنەکرن داکو گوھۆڕین پەیدا ببن وژیانا خەلکی بەرەو باشتر پێنگاڤا بھاڤێژیت و خەلک ئارام و ئاسوودە ببن .ما ھەکە ھەلبژاردن بۆ ھندێ نەبن کو گوھۆرینێن باش ھەمی سکتەرێن ژیانێ ڤەگریت ،ئەو ھەلبژاردن ژخۆنە نەھێنەکرن باشترە..یاشاشە ھەلبژاردن بەس رۆخسارا بگھۆریت، دڤێت ناڤەرۆک بھێتە گوھۆرین و خەلک وان گوھۆرینا بکردار ببینن ،ئەڤا ل سەری مە گۆتی ل وەلاتێن پێشکەفتی دھێتە دیتن و ھەمی سۆز و پەیمان وبەرنامێن ھەلبژاردنا پشتی ھەلبژاردنا جێبەجێ دکەن.
وەلێ ئەڤە ل وەلاتێن ڤەمای وپاشکەفتی ناھێتە دیتن ،حەزکەی دێ سەد سۆز و بەڵێنا دەتە تە ،و ئێکێ ژی جێبەجێ ناکەت،نەبوو لایەنێ براوە خەمە جێبەجێ بکەت، نە ژی ھاوولاتی دویڤچوونێ دکەت کا بۆچی بەرنامێ ھەلبژاردنا نەھاتە جێبەجێکرن ،لەوما دێ بینی ئەو وەلات ھەر وەکی خۆنە و دناڤ کۆمەکا ئاریشە و قەیران و دەردەسەریادا دژین بۆ ھەردوو لایەنا ھیچ نەخەمە ژی .لەوما ھاوولاتییەکی گۆت مادەم ل دەڤ مە ھەلبژاردن ئەڤ شێوازە بن، ئەز دێ دەنگێ خۆ دەمە کۆڕێ ئاغای ! چونکی چێدبیت کۆڕێ ئاغای ژ پرۆفیسۆرەکێ زانکۆیێ بشیانتربیت وباڵادەستتر ژی بیت ،چونکی ھێزا خۆ یا ژ پێگەیێ کومەلایەتی و مالباتا خۆ و عەشیرا خۆ وەرگرتی و ئەو لایەتنێ ئەو کاندیدکری، ژبەر دوو تشتا بوویە، سەنگا بنەمالا وی و پێگەھێ وان و یادی ژی داکو دەنگا بۆ لیستا خۆ زێدەبکەت، ئەم دزانن ئەگەر پرۆفیسۆرەکی یان دکتورەکی کاندید بکەت، ئێکەم تشت ئەو دێ چنە مالا ئاغایی و دێ بێژنێ ئەز بەنی ئەز کاندیدم پشتەڤانیا من بکە ،ئەگەر ئەڤە رەفتارا ئەکادیمی ورۆشەنبیرێ مە بیت ،باشە بۆچی ئەز دەنگێ خۆ نەدەمە کۆڕێ ئاغای ما نەباشترە ؟ ئەگەر ھێزا کۆڕێ ئاغای گەلەک مەزنترو کاریگەرتر بیت ژ زانین و علمێ پرۆفیسوری، ھەر دووک دێ د پەرلەمانی دا دەستێ خۆ بلند کەن، خۆ ھەکە ئەو یاسا دخزمەتا تەخا ھەژاردا ژی نەبیت، دێ دەرباز کەن ھەکە ئەو ئەکادیمی دگەل نەبیت ژی نەوێرت باخڤیت و دەنگی لسەر نەدەت، کەواتە ئەو ژی وەکی کورێ ئاغایە،ھەکە وێڤەتر نەبیت .لوەلاتێن رۆژھەلاتا ناڤین ھەرسێ سێگۆشەیا بۆ بەرژەوەندا خۆیە ،(حزب،كۆر ئاغا،ئەکادیمی )چ لایەنا بۆ گەل و وەلات و نشتیمانی نینە ؟
ئەڤە چەندین ھەلبژاردن ھاتنەکرن، من نەدیتییە ئەندام پەرلەمانەکی، چ ئەو بیت یان ئەڤێ دی، بەرسینگێ پرۆژەکێ حزبا خۆ گرتبیت ئەگەر ھند دخزمەتا خەلکیدا نەبیت، بەلکو یێ کەڕۆ لال و نابینایە و پرۆژەو بریار دێ دەرباز بیت، وەکی گولەکێ!
ژبەر ڤان خالێن من گۆتین و دبیت ھێژ ژی مابن ،ئەز دێ جارا بھێت دەنگێ خۆ دەمە کۆرێ ئاغایا بێ دوو دلی ،چونکی چێدبیت ئەو وەجا من بقەتینیت ئەگەر من خۆ ھەوجەی کرێ ،لێ پرۆفیسور نەشێت بۆ من بقەتینت !
بلا لڤێرە ئەز ژی ببمە بەرژەوەند پەرست، یان ھندەک من ھوسا ل قەلەم بدەن، لێ دڤێت ھوون بزانن ژی کو مللەت ژی ژ ڤێ گۆنەھێ یێ بێ بار نینە، چونکی ئەو ژی یێ د دەریا نەزانین و ترسێ دا خەندقی یە و حەتا سەر ھەستی بەرژەوەند پەرستە.
