د. کاروان صالح – زانکۆیا زاخۆ
بدڕێژییا قۆناغێن شۆڕەشا ئەیڵولێ سەرکردایەتیا شۆڕەشێ هەمی هێز و شیانێن خۆ مەزاختبوون کاری داکۆ بشێن ئەمریکا رازیبکەن و پشتەڤانیا پڕسا کوردی و شۆڕەشا ئەیڵۆلێ بکەت، پشتی چەندین هەول و بزاڤان ژلایێ سەرکردایەتیا شۆڕەشێ و وەلاتێن هەڕێمی وەک ئیرانێ ئەمریکا گهورینا دسیاسەتا خۆ دا بەڕامبەری کوردان ئەنجام دان و ل سالا ١٩٧٢ بڕیارا سەرۆکێ ئەمریکا ریجارد نیکسونی و وەزیرێ دەرڤه یێ ئەمریکا هێنری کسنجەری بڕیارا پشتەڤانیکرنا شۆڕەشێ بهاریکارییا ئیرانێ و ئسرائیلێ دا. دناڤبەرا سالێن١٩٧٢-١٩٧٥ ئەمریکا بڕێکا هەوالگێرییا خۆ و هاریکارییا ئیران و ئسرائیلێ ل ئیرانێ چەک پێشکێشی شۆڕەشێ کر بوو.
لدەمێ ل ٦ئادارا١٩٧٥ ڕێکەفتنامەیا جەزائیر دناڤبەرا ئیران و عێراقێ دا هاتیە مۆرکرن، ئەمریکا بەرک ژ بن پێن کوردان کێشا و هێلان دبن رەحما حکوومەتا عێراقێ ڤه، لڤی وەختێ هەستیار دا، سەرکردێ شۆڕەشێ مەلا مستەفا بارزانی نامەیەکێ بۆ وەزیرێ دەرڤە یێ ئەمریکا کسنجەری فڕێدکەت و تێدا داخوازا هاریکاریێن بلەز و ڤەدیتنا چاڕەسەریەکێ بۆ پڕسا کورد ل عێراقێ دکەت. دبەرامبەر دا کسنجەر بێ دەنگ دمینت، ناڤبری دبیرەوەریێن خۆدا دابوو دیارکرن “ئەمریکا چوو ڕێکا نەمابوو پشتەڤانیا کوردان بکەت، نەدشیا برێکا تۆرکیا و سۆریێ هاریکارییان بۆ کوردان فڕێکەت، لەوڕا من بەرسڤا نامەیا ناڤبری نەدابوو”.
بەلێ تشتێ سەرنجڕاکێش ئەوە هندەک ژێدەر و گۆتاران وەسا دایە دیارکرن کسنجەری بەرسڤانامەیا مەلا مستەفا بارزانی دابوو و تێدا گوتبوو بڕێکارێ هەوالگێریا ئەمریکا ل تەهران ئەڤێ نامێ بۆ مەلا مستەفا بارزانی فڕێکە و ئەگەر وان گوهێ خۆ نەدا هەوە پشت گوھ باڤێژن و هول …..وان بکەن.
پشتی دویڤچوون ل دۆر ڤێ چەندێ دناڤ لاپەڕێن بیرەوەریێن کسنجەری، نامەیێن ناڤبری بۆ مەلا مستەفا بارزانی فڕێکرین هەروەسا ئەو بەلگەنامەێن بالیۆزخانەیا ئەمریکا ل تەهران بۆ کوجکا سپی فڕێکرین و راپۆرتێن دانووستاندنێن کسنجەری لدۆر ئیران و عێراقێ هاتینە کرن، کسنجەری چوو ئاحفتنێن بڤی رەنگی نەگوتینە کوردان، بەرۆڤاژی بتنێ بەرژەوەندیێن وەلاتێ ئەمریکا و هەڤپەیمانێن وێ ل دەڤەرێ هەلسەنگاندینە. ئەڤ چەندا دڤان ژێدەر و ڕاپۆرتان دا هاتیە بەلاڤکرنا موبالغەیە و بتنێ ئارمانجا وان شکاندنا هەلۆیستێ ئەمریکا بەرامبەری پڕسا کوردی یە، سەڕەرای هندێ ئەمریکا وەک ئالاڤەکێ سیاسی بۆ بدەستڤەئینانا بەرژەوەندیێن خۆ بەرێخۆ ددەت کوردان، دگەل هندێدا ب شێوێ نڤێسین خراب نەگوتی نە کوردان، بەرۆڤاژی دیارکری یە کورد دەست ژبزاڤا خۆ بەرنادەن و وان باوەرییەک موکوم هەیە، کۆ پڕسا کوردی پڕسا نەتەوەیەک جودایە و نەپڕسەک ناڤخوی یا وەلاتێن ڕۆژهەلاتا ناڤینە، ئەو دێ بەردەوامێ ب خەباتا خۆ دەن چەند بهێنە شکاندن، خەلەتیا لدەڤ کوردان ئەوە کەس خۆ ب کەسێ نادەت، لەوڕا نەشێن سەرکردەکێ بخۆ هەلبژێرن داکۆ وەک بەردەڤکێ کوردان بەرەڤانیێ ژ دۆزا وان بکەت. د. کاروان سالح وەسى / بسپۆر دبوارێ سیاسەتا ئەمریکا بەرامبەرى دۆزا کوردى.
