نایف مه‌حموود
واتابوونا مرۆڤایه‌تیێ ل سه‌ر وێ چه‌ندێ ڕادوه‌ستیت ده‌مێ ئه‌م ژ قالبێ تنێ بوونێ، بتنێ خوه دیتنێ ده‌ردكه‌ڤین و هێز و ڤیانا خوه ب مرۆڤان دبه‌خشین، چونكی ئه‌م ل ڤێ جیهانێ و ڤێ دونیایا ژیانێ تێدا ده‌رباز دكه‌ین پێدڤی ب هێز و هاریكاری و ڕێزگرتن و ڤیانا هه‌ڤدووینه، ئه‌م پێدڤی ب چه‌نگێ دلوڤانیێ نه و ئه‌ڤی چه‌نگی ل سه‌ر ژینگه‌ها خوه ڕائێخین و بكه‌ینه خه‌لات پێشكێشی شادی و گڕنژین و به‌خته‌وه‌ریا ئێك و دو بكه‌ین، نه‌كو بتنێ بۆ خوه بژین، بۆ خوه هزر بكه‌ین، بۆ خوه بگڕنژین و ب كه‌نین، به‌لكی یا ل سه‌ر ملێن مه ئه‌وه ئه‌ركێ مرۆڤایه‌تیێ په‌یره‌و بكه‌ین ژبه‌ركو سروشتێ ڤێ دونیایێ وه‌هایه كو ئه‌م پێدڤی ب هه‌ڤدیتن و هه‌ڤكاریا ئێكین، ئه‌م پێدڤی ب هندێینه ده‌ستێن خوه بو هاریكاریا هه‌ڤدو درێژبكه‌ین و به‌خته‌وه‌ریێ بكه‌ینه د دلان دا و تۆڤێ ڤیانێ و پێكڤه‌ژیانێ بچینین. هه‌لبه‌ت گه‌ر هه‌لوه‌سته‌یه‌كێ ل سه‌ر جیهانا مرۆڤایه‌تیێ بكه‌ین دێ د ناڤبه‌را دو دیوان دا شێین هه‌لسه‌نگاندنێ بو پیڤه‌رێ مرۆڤایه‌تیێ كه‌ین، ئه‌وژی ده‌مێ مرۆڤ دكه‌ڤنه د چه‌په‌رێ دۆژمنكاریا هه‌ڤدو ل سه‌ر بنه‌مایێ نه‌ڤیان، به‌خاله‌ت، حه‌سویدی و كه‌رب ژێ ڤه‌بوون، كه‌واته ئه‌ڤ هزركرنه هوكارێن هه‌ڕفاندنا دیوارێ مرۆڤایه‌تیێ نه، به‌رامبه‌ری ڤێ ئێكێ دا ببینه قۆلپا ڤیان و حه‌زژێكرن و هاریكاریێ بۆ یێ به‌رامبه‌ر، دیسا ل ده‌مێ كه‌فتن و ته‌نگاڤیان ده‌ستان ل هه‌ڤدو بهه‌لینین وببینه به‌شه‌ك ژ سڤككرن و چاره‌كرنا ئارێشه‌یێن خه‌لكی، هه‌ول بده‌ین ل شوینا خه‌م و په‌ژاره‌یان د دلێ خه‌لكی دا خۆشی و ئارامیێ ب یێ به‌رامبه‌ر ببه‌خشین. كلتۆرێ مه یێ كورده‌واری وه‌سا هاتیه نیاسین كو ئه‌م مله‌تكێ مرۆڤ دۆستین مله‌تكین حه‌ز ژ ڕێزگرتنێ و هاریكاریێ بو خه‌لكه‌كێ بێ ده‌ست و پێ و بێ ده‌ستهه‌لات دكه‌ین، مله‌ته‌كێ دلۆڤانین و بو كه‌سانێن كه‌فتی و بێ چاره، ئه‌ڤێ چه‌ندێ ل ناڤ جڤاكێ مه ڕه‌نگڤه‌دایه، د كاودانێن نه‌خۆش دا ئه‌م ب هانا خه‌لكی چوینه و ده‌رگه‌هێن خێرێ و قه‌نجیێ مه ل خه‌لكێ خوه و یێ بیانی ڤه‌كرینه. هۆسا ده‌ستهه‌لاندن ل كێشه و به‌رته‌نگیێن خه‌لكی نیشانا سه‌خله‌تێن باشێن مرۆڤایه‌تیێ نه و ب ڤان هه‌لوه‌ستێن جوان دێ دلێ مه هه‌رده‌م د ئاڤا و ئارام و ئاڤه‌دان بن، دێ شێین پرا ڤیان و مرۆڤایه‌تیێ و پێكڤه‌ژیانێ موكم ڕاگرین، دێ ژیان شادیێ و به‌خته‌وه‌ریێ ده‌ته مه، دێ ل گۆپیتكا ئارامیێ ژین گه‌ر مه ملێن خوه دانه به‌ر بارێن گرانێن خه‌لكێ پێدڤی و بارێ وان یێ خه‌ما سڤككر، ئها ب ڤی ڕه‌نگی واتایا خوه‌شیا ژیانێ دبیته واتایه‌كا ڕاسته‌قینه و ژیان دبیته بهه‌شت و ڕۆژا كه‌رب و نه‌ڤیان و شه‌ڕه‌نگێزیێ ئاڤا دبیت.
