محه‌مه‌د عه‌لی نوری
ل سه‌ر ئاستێ كوردستانێ ب گشتی و پارێزگه‌ها دهۆكێ ب تایبه‌تی رێژیه‌كا زوور یا ئه‌كادیمی و فێرگه‌هێن وه‌رزشی یێن كۆمه‌كا یارییان هاتبوونه رێكخستن، ئه‌ڤ پێنگاڤه یا گرنگه و جهێ ده‌ستخوه‌شیێ یه پێخه‌مه‌ت به‌رهه‌ڤكرنا نڤشه‌كێ نوو یێ یاریزانان ژبه‌ركو ل باژێرێ دهۆكێ قه‌یرانا یاریزانی سه‌رهلدایه تایبه‌ت یارییا فوتبۆلێ، هه‌رچه‌نده پرانییا ئه‌وان ئه‌كادیمی و فێركه‌هێن وه‌رزشی چه‌ندین ساله به‌رده‌وامن و هنده‌ك ژی ب تنێ بۆ ده‌مێ بۆراندنا بهێنڤه‌دانا هاڤینی بوو.
وه‌كو رۆژنامه‌ڤانه‌ك من دویڤچوونا پرانییا كار و چالاكێن ئه‌وان ئه‌كادیمییان كربوو، هنده‌ك خالێن نه‌رێنی و هنده‌ك ئه‌رینێ من د ناڤ پرۆسه‌یا بڕێڤه‌برنا ئه‌ڤان ئه‌كادیمییان دا دیتیه، یێن ئه‌رێنی دبینم ئێكه‌م پێنگاڤا هاتییه هاڤێتن ژبۆ كۆنترۆلكرن و رێكخستنا ئه‌كادیمییان ژلایێ رێڤه‌به‌رییا وه‌رزشی یا دهۆكێ و لژنه‌یا ئۆلمپی تایێ دهۆك ب دانانا لژنه‌كێ ژبۆ دۆڤچوون و بجهئینانا رێنما و مه‌رجێن ڤه‌كرنا ئه‌ڤان ئه‌كادیمییان، ل ده‌ستپێكێ ب گه‌رمی ئه‌ڤ كاره هاته كرن و پێنگاڤێن باش هاتنه هاڤێتن سه‌رباری هه‌بوونا كێماسییان، یا گرنگتر دڤی بابه‌تی دا سنۆرداركرنا فێرگه‌هـ و ئه‌كادیمیێ و ده‌لیڤه بۆ راهێنه‌رێن خودان باوه‌رنامه‌یێن ئاسیایی هاته‌دان، د وێ باوه‌رێ دامه هه‌كه ئه‌ڤ پێنگاڤه بۆ سالا بهێت ب رژدی به‌رده‌وام بیت دێ گوهۆڕینێن باشتر هه‌بن دگه‌ل تێبینییا من كو دڤێت كه‌سێن پسپۆر و شاره‌زایێن ئه‌كادیمی كارێ بڕێڤه‌برنێ ڕابن.
ژلایێ نه‌رێنی ڤه، رێژه‌یه‌كا به‌رچاڤ یا رێنما نه هاتبوونه بجهئینان، دیسان چه‌ند ئه‌كادیمی هه‌بووینه تایبه‌ت دیارییا فۆتبۆلێ دا رێژه‌كا زۆر یا یاریزانان د ناڤ یاریگه‌هێن خوه دا كۆم ڤه‌كربوون زێده‌تر بوون ژ رێژه‌یا هاتیه دیراكری! دیسا نه‌بوونا خولێن پێگه‌هاندنێ و په‌روه‌رده‌یی دناڤا ئه‌كادیمییان دا ئێك ژ خالێن نه‌رێنی بوو، رێژه‌یا 50% زارووكن پێدڤی ب وانه‌یێن په‌روه‌رده‌یا وه‌رزشی و ئامۆژگاریانه.
خاله‌كا دی یا گرنگ، دناڤا ئه‌كادیمیێن وه‌رزشی دا ب ریكلامێن سه‌رنجراكێش و گۆتنێن مه‌زنتر ژ كریارێن خوه بۆ سه‌میانێن زارووكا شرۆڤه‌دكر هه‌روه‌كو دگۆتنێ زاروویێ هه‌وه دێ بیته نموونه‌ترین یاریزان، لێ د واقعی دا هۆسا نه‌بوو ئه‌وا دهاته گۆتن، هه‌ردیسان جهێ راهێنانان ئێك ژ خالێن گه‌له‌ك گرنگبوو كو دڤیابا به‌ری وه‌رگرتنا موله‌تێ لژنه دۆڤچوونا جهێن وان كربان ل دووڤ رێنمایان سه‌ره‌ده‌ری كربا.
ده‌رئه‌نجام ژی، ئه‌وا د هاڤیتنا ئه‌ڤ ساله دا هاتیه پێش پێدڤییه بۆ سالا بهێت كاره‌كێ باشتر بهێته كرن و كه‌سێن شاره‌زا و پسپۆر هه‌بن، رێژه‌یا زێده یا خرڤه‌بوونا یاریزانان بۆ ناڤ ئه‌كادیمیێ نه یا گرنگه.
