ئەم و ئەو …!

فەهمی مایی

من دڤێت ڤێ گۆتارا خوە ژ ڤێ کورتە گۆتن و پوستێ خوە دەستپێبکەم[ئەم د دلێ خوەدا گەلەک زانا و د شارەزاینە….لێ د ڕاستی یێ دا، هێشتا گەلەکا بومە مای و وەک زاڕۆکەک ساڤای نە].
گەر مرۆڤ بهێت ل ماڵپەڕێن سوشیال مێدیا گەڕیانەکێ بکەت و چەند ڕۆژا چاڤدێریێ لێ بکەت، دێ بو مڕۆڤی ئاشکەرا بیت، کو د ناڤ مەدا هەمی کەس هەمی تشتن و بسپۆڕن دهەمی واران دا، بگرە د وارێ جڤاکی، ئەدەبی، هونەری، جوگرافی، مێژووی، یاسایی و سیاسی و هتد..!
هەر ئێک د دلێ خوەدا هەر تشتە و دڤێت خوە تێکەلی هەمی بابەتا بکەت و ترارێ خوە لبن هەمی ئاڤا بدەت، سەرەڕای دویر ژ پیشە و کارێ وی وەک دبێژن: (نە تێ و نە ژێ) ، لێ دڤێت وەسا خوە نیشابدەت، وەکە بسپۆڕ و شارەزا دهەمی واران دا، وێ هزرێ ناکەت ئەڤە نە کار و پیشا منە و بەلکی من چ پێزانینن ل سەر ڤی بابەتی نینن و هندەک کەس هەنە کارێ وان و پیشا وان ئەوە و بلا ئەز مایا خوە تێنەکەم و خوە تێکەلی بابەتی نەکەم و بلا ئەو بابەت، بو وان جهێن بەرپرس و شولەژێ بمینیت و ب وی کاری ڕابن، بەلکی پێتر بسەرکەفتیبن و باشتر ئەنجاما بینن!
نە.. ئەم ڤێ وەک کێماتیەک و شەرمەک د دانینن، هەکە مرڤ بێژیت ئەز ڤی تشتی نزانم، یان من پێزانین لسەر نینن و نە کارێ منە!
وەرە بنێڕە ل جڤاکێن ڕۆژئاڤا، دێ بینی بدورستی بەروڤاژی ڤێ ڕەفتار و دیاردا جڤاکێ مەیە د وی واری دا، ئانکو چەندێ زانا بیت و پێزانین هەبن ل سەر هەر بابەتەکی لێ ئەو پیشا وی هەی و بسپۆڕ نەبیت پێ، وێ بەرپرسیاریێ هەلناگریت و خوە بکەتە شارەزا و بسپۆڕ دهەمی واران دا و هەر تشتێ بیت مایا خوە تێدا بکەت و ل سەر بنڤێسیت و باخڤیت.
نە…بەروڤاژی ڤێ چەندێ، ئەگەر ئەو کار و بابەت نە گرێدای وی بیت و پێزانینێن سەدا سەد ل سەرنەبن، دێ بڕەنگەک سادە بێژیت ئەز نزانم و نە پیشەو کارێ منە ئەڤە، بلا چ پلا زانست و بەرپڕسیێ ژی هەبیت، ئەو وێ بەرپڕساتیێ وەرناگریت و هەر تشتێ بیت بێژیت و مایا خوە تێدا بکەت و خوە وەکە شارەزا و بسپۆڕەک تێدا ببینیت.
لڤێرێ دیار دبیت ..خاندنا مروڤی بو ڕەفتار و پەروەردا دوو جڤاکێن گەلەک ژێک جودا و پێشڤەچوون و پاشڤەمانا وان، بو مروڤی دیاردبیت و کانێ چەند جوداهیەک مەزن هەیە دناڤبەرا دوو جڤاکێن مە و ئەوان:
-یێ هەی بەلکی هەر تشتەکی دزانیت و شارەزا، لێ خوە دانیت هێشتا ل بنێ ژێهەلیە و بو سەرێ چیای گەلەک یا مای!
-یێ هەی بەلکی چ نەزانیت و نە شارەزا و لبنێ ژێهەلیە، لێ مایا خوە د هەمی تشتا دکەت و وەسا دزانیت یێ گهەشتی گوپیتکا چیای!