فەهمی مایی/سوێد
ئەڤێ جارێ من دڤێت ل سەر وەرزشێ بنڤیسم و تەپا پێی!
من دژیانا خوەدا گەلەک تەپکانێ کریە و هەتا نوکە ژی گەلەک حەزژێدکەم و پاڵپشتیا گەلەک تیمێن ئەوڕۆپی دکەم، دیسان تیمێن کوردستانێ بگشتی و ژهەمیا پێتر تیمێن (دهۆك و زاخۆ) هەلبەت ل نک من هەردوو وەکی ئێکن و دەمێ یاریێ دکەن ژی ئەز حەزدکەم ئەنجام وەکهەڤبن، ژبەر ڤیانا من بو هەردو تیما.
د ڕۆژێن چویی دا، یاری یا دێربی هاتەکرن و جەماوەرک زۆر لهیڤیێ بو ئەز ژی گەلەک لهیڤیێ بوم و لپێش بوم، هەلبەت گەلەک ئاسیاییە هەر تیمەکێ پشتڤان و شەیدا و حەزژێکەرێن تیما خوە هەبن و بهەمی ڕەنگا پشتەڤانیێ بو بکەن و هندەک مال و گیانێ خوەدکەن قوربانی تیما خوە، ئەڤە لهەمی جیهانێ هەیە و گەلەک جارا شەڕەدەڤ و گوتنێن کرێت دناڤبەرا هەمی تیما چێدبیت و دیسان ئاساییە، لێ تشتێ نە چاڤەڕێکری ب نمایشەکێ ژلایێ هندەک هاندەرێن (زاخۆ) هاتکرن کو هندەک ژ توخیبا دەربازکر و پێلاڤا خوە دانا سەر لوگو و جلکێن دهوکێ و کو ئەڤە بو جهێ دلئێشی، کارڤەدان و نەڕازیبونەکا مەزن یا حەزژێکەرێن تیما (دهۆکێ) و گەلەك ژ خەلکێ (زاخۆکا)دەلال ژی نە دگەل وێ ڕەفتارا بێسەروبەربون و ڕێڤەبەریا تیما (زاخۆ) ژی لبورین ژی خاست، لێ بڕاستی ڕەفتارەک گەلەک کرێت بو هاتی کرن!
لڤێرە یا من دڤێت بێژم، کو دڤان ڕوژان دا و پشتی وێ یاریێ، من چاڤێدریا ماڵپەڕێن هەردوو یانا دکر و ئەڤە چەند ڕوژە ماڵپەڕێن هەردوو یانا، تژی کەرب و کین و گوتنێن نەشرینن دژی ئێکودوو، هەتا کو دگەهیتە گەفا و هێرشێن دژوار لسەر یانەیێن ئێکودوو و ڕێڤبەریا وان!
لەوا ئەز دبینم دڤێت ئەڤ ئارێشە بهێت چارەسەرکرن، بهەر ڕەنگێ هەبیت دڤێت جهێن بلند لسەر بهێن دەنگ و مایا خوە تێدابکەن، داکو مەزنتر نەبیت و پێتڤیە ڕێڤەبەریا هەردوو تیما ڕوینن خار وەکی برا و هەر ئاریشەکا هەی دناڤخوەدا چارەسەربکەن و دگەل هاندەرێن خوە باخڤن و ئاگرێ وان ماڵپەڕا ڤەمرینن و هێرشێن وان سەرئێکودوو ڕاوەستینن و ئەگەر بڤێ ڕێکێ چارەسەرنەبیت، بلا جهێن بلندتر بڤێ بەرپرسیارەتیێ ڕابن و ڤی ئاگری ڤەمرینن…بەری هەر تشتی ئەم هەمی کوردین و خەلکێ کوردستانێ نە، پاشی خەلکێ ئێک پارێزگەهێ نە، چ جوداهی نینە و ئەم هەمی خەلکێن هەردوو باژێڕاینە و دهوک یان زاخو هەرئێکە، ئڤجار بەری ئەڤ ئارێشە مەزنتر لێبهێت و بەری تشتەک نە چاڤەڕێکری ڕویدەت، دناڤبەرا هاندەرێن هەردوو تیما ل یاریێن بهێت، دڤێت چارەسەریێ بو ببینن و هەر ئێک ب ڕۆلێ خوە و بەرپرسیارەتیێ ڕابیت.
