سەیفوللا موحەمەد
ئەڤ پەیڤا عەرەبی (ئەبۆ) هەر ژ مێژە ژ کەلتورێ عەرەبان هاتییە وەرگرتن، ئانکو مە ب خوە ل سەر خوە سەپاندییە، ئەڤجا وەکو سترکێ یا ماییە ب مەڤە و هەتا نوکە وەکو ناسناڤ دهێتە بکارئینان، پتر ژ سیھـ سالێن ئازادییێ ل باشورێ کوردستانێ، لێ ب مخابنیڤە هێشتا ئەم ژ ڤێ پەیڤێ ئازاد و ڕرگار نە بووینە.
پێش سەرهلدانێ، د سەردمێ ڕژێما سەدامێ گۆربەگۆردا، پترییا خەلکێ عێراقێ ب عەرەب و کورد و هەمی نەتوەیێن دیڤە، ب ناسناڤێ (ئەبۆ فلان) دهاتنە ناسکرن. هەر بگرە ژ سەدامی کو ب دەهان ناسناڤ هەبوون، لێ ناسناڤێ (ئەبۆ عودەی) و (ئەبۆ حەلە) پتر دهاتە بکارهینان، ل ئەوی دەمی ڤێ (ئەبۆ) یێ ژهەر دەمەکی پتر کوردستان ڤەگرت، ب تایبەت خودان پلەیێن لەشکەری و سیاسی و هەتا یێن کارگیری و بچویکترین پلە، کو هەر ئێکی (ئەبۆ)یەك ئێخستە پێش ناڤێ کۆڕەکی خوە یان کچەکێ و خوە پێ دا ناسکرن، وەکو ئەبو عەلی و ئەبو ماجد و ئەبو زەهرا و هەتا دوماهییێ.
ئەرێ پسیارەک، ما لجهێ ڤێ پەیڤێ، مە نە پەیڤەکا کوردی جوانتر و شرینتر هەیە؟ پەیڤا (باب) ب کار بینین، کو بێژین بابێ فلانی یان فلانێ، ما نە مخابن تو پیتە ب پەیڤەکا بیانی بدەی و کەهی بکی و پەیڤا زمانێ خوەیێ ڕەسەن و خوەش ب کار نەئینی و کیڤی بکەی؟ ئەگەر ئەم ل کەلتورێ خوە یێ کوردی ژی بزڤڕین، چ وەکو سترانێن کەڤن و چ وەکو د چیڕوکاندا ژی دێ بینین کو گەلەک کەس ب ناسناڤێ بابێ فلانی، یان فلانێ هاتینە ناڤکرن، مینا بابێ فەخری و بابێ سەیرو و گەلەکێن دی.
ئەڤجا بۆ هەر تشتی بلا ئەم ژ زمان و کەلتورێ خوە وەرگرین، نەکو ژ یێ دژمن و داگیرکەرێن مە و ئاخا مە.
دەستخوش بمن وەرە پەیڤا ئەبو سەرەرای هندێ کو پەیڤەکا سادەیە بەس یا شیشتنا دەماغی ژیکە. لەوان چارەسەریا وێ گەلەک گرنگە.