زەنون سلێڤانەیی
مالپەرێن ئەلکترۆنی و تۆڕێن كومەلایەتی بووینە بەشەكێ گرنگ ژ ژیانا تاكی، باندورا خوەیا ئەرێنی و نەرێنی ل سەر هزر و چاند و زمان و ئەدەب کەلتورێ کومەلگەهێ کریە و یا دكەت ژی. بەلێ ئەگەر بدروستی ئەم ناڤەرۆکا بابەت و پوستێن لناڤ تورێن كومەلایەتی دا دھێنە بلاڤكرن بنێرین و خواندنەكا كورت بدەینێ، دێ بینین پرانیا ئەڤێن سەرەدانا كومەلایەتێ دكەن وەك پێدڤی نەشیاینە مفای ژێ وەربگرن، تورێن كومەلایەتی وەك گەنجینەیەكێ نە و مخابن مە نەشیایە مفای ژ وێ گەنجینەیێ وەربگرین.
دگەل ھاتنا ڤێ پێلا تەکنولوژیایێ و جیھان ھەمی بخوەڤە گرتی و كریە گوندەكێ بچووك، دەنگ و رەنگ مرۆڤ دشێت پەیوەندیێ ل ھەر كوژیێ جیھانێ بكەت، پێنەڤێت دگەل ھاتنا پێلێ دێ باشی و خرابی ژی ھێن، دا كو ئەم مفای ژ باشیێن وێ وەربگرین و زیانێن ڤێ پێلێ ژخوە دوور بگرین، دڤێت مە پلانەكا دارشتی بۆ ھەبیت، ئەم بزانین چاوان بەرسینگا وێ بگرین و باندورا نەرێنیێن وێ كێم بكەین و دڤێت ژبیرنەكەین، مە بڤێت و نەڤێت، ئەڤ پێلە دێ ھەر ھێت و لدویڤ خواستەكا مە نابیت و دێ ھەڤدژیێ دگەل داب و نەریتێن مە كەت.
یا من دڤێت بێژم، دڤێت پلانەكا دارشتێ ل سەر بنەمایێ سازیێن رەوشەنبیری و و زانستی و كومەلایەتی مە ھەبن، ئەڤ سازیێن ھەنێ ب رولێ خوە یێ نوو رابن بۆ بەرسینگرتنا ڤێ پێلێ و بدروستكرنا پەیچ و ڵاپەرێن تایبەتێن جودا، خەلكی بخوە ڤە گرێدەن و تشتێن مفا بۆ بەردەست بكەن و ب بەرنامە كار ل سەر بھێتە كرنێ. شوونا ڤێ بەرەلایێ و تەخا گەنجان و سنێلان نەزانن سەرەدانا چ بكەن و شوونا مفا وەرگرتنێ زیانێ ژێ ببورینن و ل سەر تشتێن بێ مفا ئالودە بنن!!
