بێوار حسێن ئوسمان زێباری: کوردستان/ ھەولێر
ژ بۆ ھندێ کو ئەز کار بکەم بۆ دەڤەرێ و کار ئاسانکارییەکێ بکەم ژ بۆ وان کەسێن د ڕۆژێن داھاتیدا پێدڤی ب پێزانین و دابونەریتێن دەڤەرێ بن. ئەڤە ژی د بیتە ئەگەرێ ھندێ کو ئەڤ کتێبە ل قوتابخانە و زانینگەھان ژی مفایەکێ زانستی و کەلتووری ژێ بھێتە وەرگرتن، ژ ھەبوونا ڤان جۆرە کتێبان دبنە ئەگەرێ ھندێ کو ساخکرنەکا کەلتووری بۆ جڤاکی ھەبیت و ھەردەم قەلەمێ دەڤەرێ ژی یێ کارا بیت، ھەر دەما کەسەکی کارەک ب پێزانینەکێ ھەبیت، چو ژ ڕوویێ: (دیرۆک، جۆگرافی، ڕەوشەنبیری و تیتالان)، د گەل ھەبوونا جۆرێن دیتر یێن ژیانا دەڤەرێ، دێ ئەڤ جۆرە کتێبە د بەرھەڤکری بن و بنە جھێ مفایی بۆ وانان، ئەڤە ژی ب بەرنامە و سەرەدانێن تەلەڤزیۆنی و دیسان بۆ کارکرنا من ژی ڤەدگەڕێتەڤە کو مە پشکداری کرییە ب بەرھەڤکرنا کتێبا (ئینسکلۆپیدیایا پارێزگەھا دھۆکێ)، د وی دەمیدا من وەک نڤیسەر و ڕۆژنامەڤان ل سنۆرێ ناحیا (دینارتێ) مە زێدەتر ھەڤدیتن کرینە، د گەل وان بەرنامێن من پێشکێش کرین، بیرکرنا ھەر ڕوودان و کارەکێ گرنگ، د چەندین بەرنامێن جوداجودادا بۆ ڕادیۆیا (دەنگێ کورستان ئاکرێ)، مە سەرەدانا گوندێن دەڤەرێ کرییە، ڤێجا ئاسانکاری ھاتییە کرن د گەل ڕێزبەندییا گوندێن دەڤەرێ یێن مە داینە نیاسین، ھۆز و عەشیرەتێن بەھدینانە، زێباری ل گەلەک جھان یێن ھەین و بەلاڤ بووین، ل سەر لێڤا ڤی ڕۆباری، زێباری ژ ڕوویێ ڕۆبار و قەزایێن جوداجودا ھەڤسنۆرە، ھەمی د ڤێ کتێبێدا ھاتییە بەحس کرن، د گەل ھەبوونا ھندەک ژێدەرێن دیتر ژی، کو من ب کار ئیناینە بۆ تەمامبوونا ڤی بەرھەمی . دوبارە دبێژم، لێبۆرینێ دخوازم بۆ ھەر کێماسییەک و ژبیرکرنا ھەر ڕوودان و کارەکێ گرنگ ھات بیتە ژ بیر کرن، دوبارە ببۆرن و سپاسییا ھەر کەسەکی دکەم کو د گەل مندا و د گەل وان ژێدەران ژیدا ھاریکار بوویین. ژین و ژیارا خەلکێ گوندێن دەوروبەرێن ناحییا (دینارتێ) ب گشتی ھەمان تیتالن، ژ بەر ھندێ دبیت گوند بۆ گوندەکێ دیتر ھندەک تشتێن جودا ھەبن، بەلێ ب ڕەنگەکێ گشتی ھەمان کار و کریارن، چونکی د ئێک سنۆر و عەشیرەتدا دژین، یا مە دڤێت ئەم بەحس بکەین و بێژین ئەوە کو بەری چەند سالان د چەندین بەرنامەیێن جوداجودادا مە سەرەدانا گوندێن دەڤەرێ کربوون، بۆ ھندێ بشێین ھندەک پێزانینان ل سەر دەڤەرێ و وەک سنۆرێ ناحیا (دینارتێ) و گوندێن دەوروبەرێن وێ بکەینە د ڤێ کتێبێدا. ڤێجا ھەتا ڕادەکی ئەڤ پێزانێن ھەنێ ل سەر گوندان و دەڤەرێ ب گشتی دەست ب مە کەفتن و ب چەندین ڕێیێن دیتر مە ب کار ئیناینە بۆ دەستڤەئینانا پێزانینان ل سەر گوندێن دەڤەرێ و ژین و ژیار و سکتەرێن ژیانێ یێن جوداجودا یێن ل سنۆرێ ناحییا (دینارتێ) و گوندێن وێ… لەوما ئەڤە بوویە دەرگەھەک کو ئەم پێنگاڤێن باشتر بھاڤێن ژ بۆ پەیداکرنا ھندەک پێزانێن گەلەک ب مفا و گرنگ بۆ دەڤەرێ و خەلکێ مە، ب تایبەتی قوتابییێن زانکۆ و پەیمانگەھ و ماستەر وھتد، کو بشێن مفایەکی ژ ڤان پێزانینان وەربگرن، بۆ ھندێ ژی کو ئەڤ دەڤەرە دیرۆک و کەلتوورێ وێ یێ پاراستی بیت و نەھێتە بەرزە کرن. تشتێ مە دڤێت بۆ خواندەڤانێن ھێژا ل ڤێرێ بێژین و ڕۆھن بکەین، ئەوە کو دا پتر بۆ ئاسانکارییەک بھێتە کرن، جوانی و مفا پتر بھێتە وەرگرتن، ئەوە کو دڤێت ھندەک ژ دیدارێن مە د گەل خەلکی و گوندییان کری، کو ھەمییان بنڤیسین، وەک دیدار دبیت یا ب زەحمەت بیت و کارەکێ ب سانەھی نەبیت و دەمێ زێدەتر دڤێت، لەوما دێ ھندەک دیداران ب شێوازێ گشتی ل سەر خەلکێ دەڤەرێ و عەشیرەتێ بۆ ھەوەیێن ھێژا بەحس کەین و مە ئاماژە دایە وان گۆتن و پێزانینان بێ کو ناڤێ چو کەسان بدەینە دیار کرن و گوندان ژی دەستنیشان بکەین. وەکی مە ئاماژە دایە ھندێ کو ئەڤ کتێبە پێک دھێت ژ پشکێن سەرەکی، ژ وان ژی: (دیرۆکا دەڤەرا زێبارێ، جۆگرافییا دەڤەرێ، ئابۆر و کەلەپۆر و تیتالێن دەڤەرێ، دیرۆکا پەروەردێ و ساخلەمییێ، د گەل ڕۆلێ دەڤەرێ د بابەتێ شۆڕەشێن کوردستانێدا، د گەل ڕێزبەندییا یێن مە داینە نیاسین کو گوندێن دەڤەرێ د گەل ھندەک پێزانینێن وان ژی و ھەبوونا ئەلبۆمەکا وێنەیان د گەل ناڤەڕۆک و داوییا کتێبێ ژی و وێنەیێن جوداجودا ل سەر دەڤەرێ، دیسا دوبارە دبێژم ئەگەر ھەر کێماسییەک ژی ھەبیت ل سەر بەرھەڤییا پێزانینان ل سەر دەڤەرێ، لێبۆرینێ دخوازم. من ئەڤ پێزانینە ب ھەڤکارییا ھندەک ڕێین جوداجودا بەرھەڤ کرینە و د کتێبا خۆ یا ب ناڤێ: (دەڤەرا زێبارێ، دیرۆک و کەلتوور……. )دا داینە دیار کرن . ئەڤە دبیتە بەرهەمێ سیێ چاپکری و دوو بەرهەمین دیتر هەنە و نزیک بەلاڤ بن ئەو ژی.
