دلدار هاریس
دەسپێکا بازنێ ژیانێ ژدایك بوونا هەر مروڤەکی بگریڤە چاڤێت خو ڤەدکەت و بگریڤە بدووماهیک دهێت، بەلکی کێم مروڤ هەبن بەرووڤاژی دبن و دمرن. گەلەک ژمە هەنە ڤێ ژیانێ هەر د تەمەنەکێ کورتدا دنیاسن و دبینن و تێدگەهن و گەلەک ژی دبنە هەشتێ سالی ژی نزانن رامانا بوونا وان ژبوو چییە؟ هندەک ئەگەر دڤێت هەبن دا ئەم دژیانێ بگەهین ئەو ئەگەر ژی تنێ خوشی نینن بەلکو نەخوشینە، بەلا و دەردەسەرینە مروڤی دهەبوونا خودا هشیاردکەت. هندەك مروڤ گەلەک خو دواستینن ب خاندن و زانینێڤە دا بکارن دژیانێ بگەهن لێ زاناترین مروڤ ژی نزانن چەوا هات و چەوا چوو؟! هندەک ژی بچاڤێ دینداریێ بخو هزرەکا وەلگرتی، هندەکا ژی بهزرێت هندە کەسێت دی هەمی تشتا دزانن . لێ ژنگخوڤە کەس چ نزانیت ئەڤ روحا مە چەوا پەیدا بوو؟ و چەوا هوسا بسانەهی لەشی دهێلیت و بەرزە دبیت! پشتی ئەز ژ چلێ بووریم من سەحکرە خو کا چەوا ژیانا من شین بوو هەلبەت گەلەک بدرەنگی ئەز تێگەهشتم و من باوەری پێ ئینا کو شییانێت روحا مە گەلەک دبێ سنورن و دمەزنن کو هندە سالا خو زیندان بکەت دکەلەخەکێ بێ هێزدا. هزر و بیر و زانینا هەمی مروڤێت سەر ئەردی ئەو ئەم یێ ژدەڤ خودێ هاتین و دێ چینە دەف خودێ ڤە، ئەو خودێ ژی یێ ئەسمانا و خودانێ هەمی تشتایە. تنێ ژمە دخازیت ئەم باشیێ بکەین! هەمی ئاین ژی دگەهنە ئێک لئەنجامدا. ئەڤجا موسلمانبی یان هندوس بی، جوهی بی، مەسیحی بی .. خودێ ئەم کرینە ئەڤە هەم بەس دا دژیانێ بگەهین و هێشتا ئەم تێناگەهین. ئەم هەر یێ دزیا دکەین و ئێکدوو دکوژین و خرابیێ لسەر دونیاێ دکەین. روحا پاک و خاوێن وێ گاڤێ یا پاکە ئەو دەمێ دەردکەڤیت ژ ڤی لەشێ درندە ئەڤێ پێ تەعدایێ پێدکەت. هندی لەشێ مروڤی یێ بهێزبیت پتر ئەم خرابیێ پێ دکەین، هندی ئەم زەعیف و لاواز بین ئەم باشر و برەحمترین. ئەم دڤێت دباش بین گەل ئێکدوو ئەڤ ژیانە بو کەسێ نینە و خەونەکا کورتە. ئەو مروڤ گەلەک کەسەکێ بەختەوەرە دەمێ هەمی کاودانا بسەرێ خوە دبینیت خوش و نەخوش، نەخوشی دەلیڤێت باشتر دەتە مە خو رزگار بکەین کاربکەین رێکا بخو بینین، پێشکەڤین ژیانێ ئاڤا بکەین لسەر ڤی ئەردی. خوشی تنێ راوەستیانە دجهێ خودا خوشی بلا بیتە خەون بو مە دا ئەم نەراوستیێن. هوسا ئەز رازی بووم کو خوشی بلا بیتە خەون دا هەر خەباتێ بو بکەین و بگەهینێ. وەلاتەکێ وەکی نەرویج ژ زەنگیترینە بەلێ هەمی خوشیێ نادەتە هاولاتێن خو. ئەگەر ئەو خوشیێ بدەت کەس کارناکەت کەس نابیتە ماموستا، دختور و ئاسنگەر و … راستە حکومەتا وەلاتی ژیانا ئاسانکری لێ بلا مروڤ لهیڤیێ نەبیت دەستهەلات خوشیێ بدەت. لکوردستانێ سالا ٢٠٠٩-٢٠١٣ دەستهەلاتێ خوشی و پارە دان سەحکە مروڤێت وان سالا چەندێ لاوازە و بێ شیانە پێنج سال گەلەکن ژیانا کەسی دخوشیادا بیت و بژیت مروڤ ژکاردکەڤیت. ئەز نابێژم بلا ئەو ژی نەبا، لێ ئەو پارە تڤیابا مروڤ پێ ئاڤاکربا نە پێ تێرکربا هندی مروڤ تێربیت دێ هەر برسی بیتە ڤە هندی تو گەلەک بخوی ئەو گاڤا تو برسی دبی و خارن یا کێم بیت دێ زێدە گازندا کەی و نەرازی بی.
