فەهمی مایی
من دڤێت بکورتی چەند خالەکا دەستنیشان کەم کو بوینە ئەگەرێن لاوازیا هزرا نەتەوی ل نک مە کوردا و بوینە ئاستەنگ و ئەگەرێن بندەستیا مەیا هەتا نوکە:
١. ب کارئینان و لدویڤچونا هزرا ئولی بڕەنگەکێ شاش، کو کەسێ کورد ڤێ هزرێ ل پێشیا هەر تشتی و لسەر هەر تشتی دانیت و هەر تشتەکی دکەتە قوڕبانی بکارئینان و لدویڤچونا ڤێ هزرێ، کو ڤێ چەندێ گرێدای کەسایەتی و چارەنڤێسا خوە دزانیت دجیهانا پشتی ئەڤا نوکە تێدا، وەسا هزردکەت ئەو ژیانەک یا [ئەبەدی]یە هەر و هەرە و دێ تێدا ژیت کو ئەو ژی مرنە، ڤێ ل پێشیا هەر هزرەکێ و دسەر هەر هزرەکێ ڕا دانیت و یێ پێڤە هاتیە گرێدان، دەمێ ژدایک دبیت ژ دایک و بابێن خودانێن ئولەکێ کو بیانیا ژکەڤندا بڕەنگەک زۆری لسەر سەپاندی و پێڤە هاتینە گرێدان، ئەڤ لنک کەسێ کورد لپێشیا هەرتشتی یە و دڤێرێ دا دڤێ هزرا ئولێ پێڤە هاتی گرێدان،دگەل هندێ گەلەک نەڕیتێن بیانییا دگەل خوە ئیناندینە دناڤ کوردان دا، ئڤجار ئەڤان رەفتار و کولتورێ بیانییا جهێ کولتور و نەڕیتێن کوردا گرتیە و هێدی هێدی نەریت و کولتورێ وانێ کەڤنار هاتینە بەرزەکرن و ژناڤچون و ئەڤە بویە ئەگەرەک مەزن کو لپێخەمەتیا وی ئولی هزرا وی یا نەتەوی و کولتورو چاندا وی بوینە قوربان و ژدەستدان و بویە جهێ لاوازیێ و بندەستیا وی!
له وەڵاتێن جیرانێن کوردا و هەمی جیهانێ خەلکەک ئولدار هەیە لێ جیاوازی ئەڤەیە، کو خەلکەک وەسا دزانیت ئول دناڤبەرا وی و خودێ دایە و جودا کریە ژ سیستەمێ ژیانا ڕوژانە و تێکەلی هەر تشتی ناکەن، لێ کەسێ کورد بەروڤاژی وێ چەندێ یە!!
٢. پیروزیا هندەک کەس،پارت،عەشیرەتا و بنەمالاتیێ ل نک کەسێن کورد باندورەک مەزن کریە ل سەر مەژییێ تاکێ کورد، پێڤە هاتینە گرێدان و لپێشیا هەر تشی دانن و لسەر بەرژەوندیێن نیشتیمانی و وەڵاتی، ئەڤێ ژی باندورەک مەزن هەبویە، کو هزرا نەتەوی ببیتە قوربانی یا وان پیروزیێن ل نک کەسێ کورد، وەکە ئەم دبینین کو چەندین کارەسات و خوین ڕێتن بونە دناڤبەرا کوردان دا، ل سەر خاترا وان پیروزییا و خاک و نیشتیمان بویە قوربان.
٣. هەتا نوکە شوڕەشێن مە یێن کو هندە ساڵە هاتینە کرن، نە بڕەنگەک ئەکادیمی و پێگهەشتی و وەکە مروڤ بێژیت واتەیا شوڕەشێ بدەت هاتینە کرن، هەردەم هندەک ئەگر و ڕویدان ب سەر مەدا هاتینە کو کورد مەجبور کرینە، لەوما گەر بەرێخوەدەین دیروکێ هەردەم کەسەک ناڤدار،شێخ،مەڵا یان خودان مالبات پێ ڕابونە و دەست دانە چەکی و بەڕەڤانی ژخوە کریە و خەلکەکی خوەدایە دگەل و بەرفرهە بویە و وەک ناڤێ شوڕەش لێ کریە، یان ژی هەردەم کاودان بسەر دەڤەرێ دا هاتنە و دەلیڤێن باش بو کوردا هاتنە و دبەرژەوەندایا وان دا بویە وەک دبێژن (کەو بداری کەفتی یە) لێ دیسان کوردا ئەو دەلیڤە ژدەست دانە و نەشیانە بدەستخوەڤە بینن و گوهڕینا دجڤاک و هزرا خەلکی دا بکەن و ڤیانا ئاخ و وەڵات زێدەتر لێبکەن، هزرا نەتەوی خورتر بیت لێ بەروڤاژی ڤێ چەندێ، هندەکا بو بەرژەوەندیێن خوە ئەو خەلک و جڤاک بکار ئیناندینە و ئەڤەژی بویە جهێ بێ هیڤیاتی و بێزاریا خەلکی و بویە ئەگەرا هندێ کو ژوەڵاتێ خوە بدەرکەڤن و قەستا وەڵاتێن بیانیا بکەن و دیسان هزرا نەتەوی ل نک لاواز کریە.
بدیتنا من گەلەک خاڵێن دی ژی هەنە لێ یێن ژهەمییا گرنگتر ئەڤ سێ خالەنە، لەوا د ڤیا ئەم پێتر هزر تێدا بکەین و پێداچونەکێ بکەین گەر مە بڤێت وەکە نەتەوە و کورد ب ئازادی و سەرفەرازی بژین و هەر چ نەبیت، نفشێن بهێن دا وەکو مە دڤێ ژیانا بندەستیێ دا نەژین!!
