دیاری بۆ گیانێن ئه‌نفالبوویان…

حه‌سه‌ن ئیبراهیم

ده‌نگێ گریا زارۆیه‌كی ساڤا ئیزارئیل ل هنداڤ كه‌لها نوگره‌ت سه‌لمان كره‌ ئه‌وره‌كی تاری. گرتیان هه‌ست ب مان و ئازادیبوونێ دكرن. گری ئانكو نه‌رازیبوون و لبه‌رخوه‌دان. زارۆیێن هه‌ڤژیێن وی ژترسا برس ژبیركرن. تنێ ب ئیزكێن مرنێ شه‌رێ مان و نه‌مانێ دكرن. گری به‌رده‌وام بوو، دایكا بێ ده‌ستهه‌لات سینگێ خوه‌ یێ هشك كره‌ د ده‌ڤی دا.. چو ژێ نه‌هات. گری بلند بوو، تژی گوهێن حه‌جاج تكریتی خوین كر. ب كه‌ربوكین قه‌ستا جهی كر، ئاگر ژ رێڤه‌چۆنا وی دپه‌شی، بارووت ژ ده‌نگێ وی دباری، گۆت. _ ئه‌ڤه‌ چ ده‌نگودۆره‌…؟ بۆ ڤی تێشكێ ماری بێده‌نگ ناكن…؟ دایكێ ب ترس و له‌رز گۆت: _ دبرسینه‌… نه‌ شیره‌ و نه‌ خوارن و نه‌ ئاڤ. كت ژێ نه‌مان یێن ژ برسان دمرن. به‌رێ چاڤێن سۆر دا جهی تژی دورێن وان پیساتیێ مرۆڤان بوو. سه‌رێ په‌ستالا خوه‌ نێزیكی كۆمه‌كا پیساتیێ مرۆڤان كر. تژی دێمێ خوه‌ یێ ره‌ش بشكۆرینه‌كا كرێت كر، گۆت. ـ هنده‌ك ژ پیساتیێ خوه‌ بدنێ، دا نه‌ بمرن. تژی مه‌ژیێ دایكێ ترس بوو، ده‌ستێ خوه‌ ب ده‌ڤێ زارۆیێ ساڤا ڤه‌ شداند و دگه‌ل هه‌ردو برایێن وی كێشانه‌ به‌رسینگێ خوه‌یێ تژی كول. خه‌و درنده‌یه‌كێ هاره‌، چاڤ كه‌تن سه‌رئێك، له‌ش خاڤ بوو، مه‌ژی كره‌ گه‌رۆك. ل ناڤ مێڕگه‌كا تژی گول و گییا، چاڤێن خوه‌ ڤه‌كرن، لبه‌ر سینگێ خوه‌ مرۆڤه‌كی جل سپی، ده‌رسۆكه‌كا كه‌سك د سه‌ری، ریهدرێژ و دێم گه‌ش، نۆرهه‌ ژ دیمێ وی دباری دیت. تژی گیانێ وێ ترس بوو، گۆت. ـ تو كی…؟ ده‌ستێ راستێ درێژ كره‌ هنداڤ له‌شێن هه‌رسێ زارۆیێن وێ، گۆت: ئه‌ز خزلپێغه‌مبه‌رم، یێ هاتیم ته‌ و زارۆیێن رزگار بكم… لسه‌ر ملێ خوه‌ زڤری، هه‌رسێ زارۆ یێن د ناڤ خیزی دا پێتی بووین، گۆت: _ خزلپێغه‌مبه‌ر تو گه‌له‌ك گیرۆ بووی. خزلپێغه‌مبه‌ر عه‌بایێ خوه‌ ژسه‌ر ملێن خوه‌ راكر و هاڤێته‌ سه‌ر له‌شێن هه‌رسێ زارۆیان. هه‌ر سێ زارۆ ب دێمێن تژی بشكۆرین رابوونه‌ ژپیاڤه‌. تژی دێمێ دایێ خوه‌شی و كه‌یف بوو. ده‌ستێ یێ ژ هه‌مووان بچویكتر گرت و دگه‌ل خزلپێغه‌مبه‌ر به‌ره‌ڤ ده‌رگه‌هێ سه‌ره‌كێ یێ كه‌لها نوگره‌ت سه‌لمان چوون. ل ده‌رێ كه‌لهێ حه‌جاج دگه‌ل چار زێره‌ڤانان رێ لێ گرتن. تژی چاڤان ترس بوو، لسه‌ر ملێ خوه‌ زڤری دڤیا داخوازا هاریكاریێ ژ خزلپێغه‌مبه‌ر بكت، كه‌س نه‌دیت. هه‌ر زێره‌ڤانه‌كی پێیێن زارۆیه‌كی گرتن و سه‌رنشیڤ بلندكرن. لدویڤ سێرا تلا حه‌جاج یا شه‌هدێ و به‌ره‌ڤ كۆما سه‌یێن ره‌ش برن… ب هه‌موو هێز و شیانێن خوه‌ ڤه‌ كره‌ هه‌وار. ب لڤینه‌كا شێتانه‌ و دلشه‌وات ژ خه‌وا گران هشیاربوو. به‌رێ خوه‌ دا جهێ زارۆیێن وێ لێ دنڤستی. تنێ هه‌ناسه‌یێن به‌رخوه‌دانا گیانی یێن ژ گه‌رۆیێن هه‌رسێ زارۆیان بلند دبت…