سەیفوللا موحەمەد – زاخۆ
ئاخ یان ژی خاک، ئەو پارچە عەردێ مرۆڤ ژیانێ ل سەر دکت، ئەڤجا هەر کومەکا مرۆڤان هەڤپشک بن ژ لایێ ڕەگەزیڤە، یان زمانیڤە، یان هەر هەر هەڤپشکییەکا دی ل سەر پارچەکا ئاخێ ژیایی و خودان دیروکەکا دویر و درێژ د گەل وێ ئاخێ هەی، هینگێ ئەو بووینە خودانێن وێ ئاخێ و ئەو پارچە ئاخ بوویە وەلاتێ وان و جهێ ژین و ژیارا وان.
ئەو ئاخ، یان بێژین وەلات بۆ وی مللەتی ژ پیروزییان دهێتە هژمارتن، چونکە ب هەبوون و ژیانا وانڤە هاتییە گرێدان و بێی وەلات ژیان ب زەحمەتە و بەلکو نابت، هەر ژ بەر ڤێ چەندێیە ژی دەمێ وەلات دکەڤتە بەر هێڕشێن بیانییا،یان دهێتە داگیرکرن و زورداری دهێتە کرن، خەلکێ ڤی وەلاتی ب هەر باجەیکا هەبت بەڕەڤانییێ ژێ دکت، چ ب مال و مولکێ خوە، چ ب خوین و گیانێ خوە.
چ پێ نڤێت وەلات پیروزە و هەژی قوربانییێیە، بەلێ ئەگەر پسیار بکین، بۆچی پیروزە؟ ما نە هەر ژ بەر وان مرۆڤانە یێن تێدا دژین؟ ئەرێ ئەگەر پسیار ژ وی کەسی بهێتە کرن، یێ کو بەرهەڤ بت خوینا خوە بڕێژت و گیانێ خوە بکت قوربان، ئارمانجا تە چییە، کو ژیانا خوە ژ دەست بدی پێخەمەت ڕزگارییا وەلاتێ خوە؟ چ مفا دێ گەهت تە پشتی تو نەمای د ژیانێدا؟ ئەز باوەر دکم، چەند ئەڤ ڕەنگە پسیار ژێ بێنە کرن، دێ بتنێ ئێک بەرسڤ هەبت، ئەو ژی ئەوە، دێ بێژت، ئەز دێ قوربانییێ دم، داکو مللەتێ من و نفشێ داهاتی ب سەرفرازی و ئازاد بژین، نەکو بندەست و ل ژێر ستەم و زوردارییێ بن.
ئەها لڤێرێ ئەم د گەهینە ڕاستییەکێ، کو ئارمانج ژ قوربانیدانا مرۆڤان هەر بۆ مرۆڤانە، نە بتنێ ئارمانج ڕزگارکرنا ئاخێیە، ژبەرکو مرۆڤ نەبت، چ بهایێ ئاخێ ژی نابت، ڕزگارکری بت یان داگیرکری بت، ئەڤە ژی وەسا ددت دیارکرن، کو مرۆڤ ژ هەر تشتەکی پیروزترە و ب بها و گرنگترە. لەوا دڤێت ڕێزەکا مەزن بۆ مرۆڤان هەبت و پیروزییا وان نە هێتە پاشگوھخستن، چونکە هەر ئەون قوربانییێ بۆ ئێکودو بدن. ژبۆ ئێکودو هندەک ژیانێ ژ دەست ددن، داکو هندەک دی ب خوشی و ئازادی ژیانێ بکن.
