شیان مەهدی کانیسارکی
هەر ژ زارۆکینی حەزدکر د ڕێکێن دویرڕا بچیت، هەردەم دگۆت”هەرە ڕێکێ بلا یا دویر بیت..”، لەوڕا وی هزردکر ئەگەر لگەل خەلکی نەبیت دێ زویتر گەهیت! خوە دەمێ دچوو قوتابخانێ ژی ل دۆر گۆندی دزڤڕی و ڕێکا خوە دویردکر، نەدڤیا کەسێ ببینیت، هندی بابێ وی ئەڤێ بەری سێ سالان ژ ڕێکا دویر نەڤڕیە ڤە دگۆتێ کوڕێ من ل گەل هەڤالان هەڕە، دگۆتێ” من نەڤێت بچمێ وان ببینم، چ هەڤال یێن باوەریێ نینن”. دەمێ گهەشتیە قوناغا زانکۆیێ ژی ب تنێ لسەر مێزەیەکێ دروینشت، قوتابیان د ناڤبەرا خوە دا ب ناڤێ “ئەڤێ نەبەلەد” ناڤکربوو، جاران وی ب خوەژی گوهـ لێ دبوو لێ خوە ب سەرڤە نەدبر، حەزدکر یێ دویری بەڵا بیت، خوە ئێکی گۆتبایێ؛ ئەرێ ما ئەڤە تۆ یێ دینی، تۆ یێ نەحەقی، تۆ یێ شاشی…هتد” وی ب د بەرسڤدا دگۆت” بەلێ هوین ڕاست دبێژن”. پشتی ل زانکۆیێ بوویە یێ سیێ لسەر ئاستێ هەمی بەشێ خوە، ل بەر دەرگەهێ وێ زانکویێ بۆ خوە چەرەز جاران لەبلەبی د فرۆتن، ئێدی یێ ڕازیبوو هەکە خوە د ڕێکا دویر یان نێزیک ژی ڕا بیت نانەکی بۆ زارۆکێن خوە بینیتە سەر سفرێ، لێ ئەو ژی لێ هاتنە گرتن، دەمێ دچوو هەر ڕێڤەبەریەکێ یان جهەکی بۆ خوە کارەکی لێ ببینیت، ئەو هەڤال ددیتن ئەڤێن ل زانکویێ تێڕانێن خوە پێدکرن، لەوڕا هەما لبەر دەرگەهی دەستڤالا دزڤڕی ڤە. بریاردا ڕێکەکێ هەلبژێریت کۆ نە دەستپێک هەبیت نەژی دویماهیک. پشتی دیارنەبوونا وی و خێزانا وی ب شەش ڕۆژان لەشێ وان ل کەنارێن دەریایێ ئیتالیا هاتە دیتن، لێ کەس نەبوو بوهایێ ڤڕێکرنا لەشێن وان بدەت بۆ وەلاتی.
19-6-2024
زاخۆ- دوازده ملانێ.
