شانيار دهوك
قۆتالبۆیه‌كێ په‌نجه‌شێرێ بۆ گۆڤارا پێنگاڤ
وه‌لاتیه‌كێ خه‌لكێ دهۆكێ یێ (سۆیدی) یێ به‌رنیاس ل سه‌ر سۆشیال میدیایێ د بیاڤێ هه‌لبه‌ستێ دا (عه‌لی دێركی)، تووشی نه‌خۆشیا په‌نجه‌شێرا خوینێ (لۆكیمیا) نه‌یا هه‌رده‌م ببوو و ب سه‌رسۆرمانی ژێ قۆرتال بوویه، كو هه‌ر سال 250 هزار كه‌سان ل سه‌راسه‌ری جیهانێ دگریت، د به‌رسڤا چه‌ندین پسیارێن مه دا و دبێژیت ئه‌گه‌رێ نه‌خۆشیێ ل دووڤ گۆتنا نوژداری كو گه‌له‌ك جاران به‌ری نها ئێك ژ ئه‌گه‌رێن ڤێ نه‌خۆشیێ ددانێن من بووینه، كولبووینه (ئلتیهاب) من ده‌رمان خوارینه و ددان من نه‌ئینایه ده‌رێ، گه‌له‌ك جاران ئلیتهاب یا هاتی یه و چوویه و من ددان نه‌ئیناینه ده‌رێ.
مه پسیار ژێ كر ئه‌رێ زیكا زانییه ئه‌ڤ نه‌خۆشیه هه‌یه، به‌رسڤا وی ئه‌وبوو: خوه‌شبه‌ختیا من بوو كو من پشكنینێن خوه كرن، پشتی ئه‌نجامێن وان بۆ نۆژداری گومان چێبوو كو دبیته (د.نووری جه‌لاله‌دین بریفكانی) خه‌لكێ دهۆكێ یه ل ستوكهۆلمێ، گۆته من وه‌ره جاره‌كا دی پشكنینێن خوه بكه، هه‌ما بۆ دلێ من دا ئارام ببم. من جارا دویێ پشكنین دوباره كرن، پاشی نۆژداری په‌یوه‌ندی ب من كر، و گۆته من دڤَێت بچیه نه‌خۆشخانا مه‌زنا ستۆكهۆلمێ، پشتی چوویمێ هن پشكنینێن دیتر بۆ من كرن، هه‌ر دیارنه‌بوون، پاشی ئه‌ز فرێكرمه نه‌خۆشخانه‌كا تایبه‌ت یا ڤێ نه‌خۆشیێ (نه‌خۆشخانا كارۆلینسكا خۆیك هۆسیت هۆدینكێ)، كو دبیته یا پێنجێ ل سه‌ر ئاستێ جیهانێ ب ئاستێ پێشكه‌فتنا خوه، ل وێرێ پێنچ نۆژدران سه‌رپه‌رشتی ل سه‌ر من كرن، ئێك ژ وان پۆفیسۆر (تیێڕ) بوو، ئێكێ دی خه‌لكێ سعوددیێ بوو، بۆ من پشكنینه‌كا تایبه‌ت كرن، ئه‌وژی یا پشتێ بوو (نخاع شه‌وكی) ژ پشتا من كێشان، و دیاربوو ئه‌و نه‌خۆشی یا ل من، گۆتن ئه‌ڤه 23 رۆژن دروست ئه‌ڤ ئێشه هاتیه ته.. وه‌ختێ ده‌رمانه‌ك بۆ من نڤیسابا وان هه‌ر پێنچ نۆشداران كۆمبوونه‌ك دكر و بریارددا كا ئه‌ز چ ده‌رمان وه‌ربگرم.. ڤێجا ئه‌ز زیكا پێ حه‌سیام و مه‌ترسی مه‌زن نه‌بوو، ئه‌و ژی شه‌نسه‌كێ باشبوو بۆ من.
پرسیاره‌كا دی مه ژێ كر كو هه‌كه ل كوردستانێ با دا ساخ بیت وه‌كو سۆید، كاك عه‌لی گۆت: هه‌كه نه‌به‌س ل كوردستانێ بامه به‌لكو ل گه‌له‌ك وه‌لاتێن دونیایی بامه، 100% نوكه خێرا من خاربوون و دا بێژنه من خودێ ژێ رازی بیت، من ژ ده‌ف وان گه‌له‌ك دلۆڤانیه‌كا مه‌زن و گوپیتكا مرۆڤایه‌تیێ دیت و رۆژانه ب خشته‌كێ رێكوپێك سیسته‌ران سه‌رێ من دشیشتن و جلكێن من دشوشیتن و یێن نوو دكرنه به‌رمن و ژۆرا من ب نڤین و ته‌خت ڤه رۆژانه تافیل دكرن.
ده‌رباره‌ی بارێ مه‌زاختیا چاره‌سه‌ریێ بۆ مه دیار كر و گوت ئه‌ز ب دروستی نزانم چه‌ند ل من مه‌زاخیتنه لێ حوكمه‌تا سۆیدی پتر ژ نیڤ ملیۆن دۆلاران ل من مه‌زاختینه و هه‌ر تشته‌كێ من ڤیابا بۆ من دئینان، كه‌لوپه‌ل و جۆرێن خورانێ و خۆشاڤا و پێپسی و دۆندرمێ و گرێمه‌ستی و .. هتد، ب شێوه‌كێ گه‌له‌كێ نایاب و به‌رفره‌ه بۆ من ته‌رخانكری بوون. تشتێ من مه‌زاختی ب تنێ هه‌ر شه‌ڤه‌كا نه‌خۆشخانێ (100 كرۆن) بوون كو نێزیكی 10 دولارانه.
ژ لایه‌كێ دی ڤه جۆره‌كێ به‌كتریا كه‌فتبوو ناڤ خوینێ، كه‌سێ چو ژێ نه دزانی یه، تنێ ل فره‌نسا نۆژداره‌كی ژێ دزانی، هنارتنه ل دویڤ را و ئینانه سۆید بتنێ پێخه‌مه‌ت پشكنین و چاره‌سه‌كرنا ڤی جۆرێ به‌كتریایێ، دوجارا هاته سۆید، ئێكسه‌ر ئه‌و به‌كتریا ڤه‌دیت و گۆت ئه‌ز باش دناسم، جۆره‌كێ حه‌با دا من، و په‌یوه‌ندی تیماركاران دكر و رادسپاردان چاوا بده‌نه‌من، هه‌ر وه‌خته‌كی ب شێوه‌كی ژڤان ددان، جاره‌كێ دو حه‌ب جاره‌كێ شه‌ش، جاره‌كێ دو.. یانكۆ نه ب شێوه‌كێ رێكخستی. تشته‌كێ سه‌یر بوو من باوه‌رنه‌دكر ئه‌ز هندێ یێ گرنگ بووم، كو ئه‌ڤێ هه‌میێ بۆ چاره‌سه‌ركرنا من بكه‌ن.
ئه‌ز نێزیكی ساله‌ك و هه‌شت هه‌یڤان ل نه‌خۆشخانێ بووم، لێ ئه‌ز ده‌ردئێخستم دبرمه مال دا ئاوایێ خوه بگوهۆرم و دا بێزار نه‌بم، لێ سیسته‌ر دهاتنه مال رۆژێ دوجاران بۆ دانا چاره‌سه‌ریێ و دیسا ژی نۆژدار ژی دهاتنه ده‌ف من ل مال رۆژا سیێ. ژبلی ڤێ ژی ئه‌وان ته‌كسیه‌ك تایبه‌ت بۆ من ته‌رخان كربوو ژ نه‌خۆشخانێ و مال یان هه‌ر گه‌ریانه‌كێ، حوكمه‌تێ پارێ وێ ددا، من خوه دیت گه‌له‌كێ عه‌زیز…
پرۆفیسۆری گۆتبوو من مرن ژی هه‌یه و ساخبوون ژی هه‌یه، لێ 50% ب ده‌ستێ مه‌یه و 50% ب ده‌ستێ ته‌یه، پسیار ژمن كر تو دێ چه‌ندێ ده‌یه خوه؟ من گۆتێ دێ 50 ئینم، وان ژی گوت پا ئه‌م ژی دێ 45 ژ 50 ده‌ینه ته، ئه‌ڤه بوونه 95% دێ ساخبی یا ته ژی تنێ مۆرالن. فه‌یسبۆكی و هه‌لبه‌ستا كوردی و هه‌ڤال و كه‌سوكاران گه‌له‌ك هاری من ب مۆرالان كرن، سۆپاس بۆ خودێ ئه‌ز 100% ساخبووم ژ په‌نجه‌شێرا خوینی و هیڤیا چاره‌سه‌ریێ بۆ هه‌ر نه‌خۆشه‌كی دخوازم.
