میدیایا نوو و ده‌ستهه‌لاتا تاكان.. كاریگه‌ری و ئاسته‌نگ

سه‌لام خالد

پێدڤیه‌ تاك یێ هشیاربیت و شیانێن هه‌لسه‌نگاندنا زانیاریان هه‌بن و راستی و خه‌له‌تیان و پرۆپاگنده‌یان ژێكجودا بكه‌ت.

د ڤان چه‌ند سالێن بۆری دا، راگه‌هاندنێ پێشكه‌فتنه‌كا به‌رچاڤ ب خوه‌ڤه‌ دیتیه‌ و ئه‌ڤ چه‌نده‌ بوویه‌ ئه‌گه‌رێ دورستبوونا شۆره‌شا ته‌كنولۆژی یا ب له‌ز، كو میدیایا نوو ژ ئه‌نجامێ ڤێ پێشكه‌فتنێ سه‌رهلده‌ت. ئه‌ڤ پێشكه‌فتنا بله‌ز كاریگه‌ریه‌كا مه‌زن ل سه‌ر ژیانا رۆژانه‌یا تاكێن جڤاكی دكه‌ت ب رێكا ئامرازێن میدیایا نوو وه‌ك تۆڕێن جڤاكی، بلۆگ و مالپه‌رێن ئه‌لیكترۆنی و..هتد. كاریگه‌ریێن میدیایا نوو جۆرا و جۆرن، و ب رێیا ئامرازێن میدیایا نوو هه‌ر تاكه‌ك دكاریت هه‌ر بابه‌ته‌كی دورست بكه‌ت و به‌لاڤبكه‌ت و ئه‌و بابه‌ت بگه‌هیته‌ ژماره‌یه‌كا مه‌زن یا وه‌رگران و كاریگه‌ریا خوه‌ هه‌بیت ل سه‌ر تاكێن دی یێن جڤاكی، هه‌روه‌سا ژ لایه‌كێ دی ڤه‌ ده‌رفه‌ته‌كا باشه‌ بۆ ده‌ربرینا تاكه‌كه‌سی و دانوستاندن ل سه‌ر هزر و بیر و بۆچوونێن جیاواز و به‌لاڤكرنا وان. راگه‌هاندن وه‌كو به‌رێ نه‌مایه‌ د بن كۆنترۆلا سازیێن مه‌زن دا بیت و ئه‌وا وان بڤێت به‌لاڤبكه‌ن و به‌روڤاژی، به‌لكو ب رێكا ئامرازێن میدیایا نوو و پێشكه‌فتنا ته‌كنولۆژیایێ بوویه‌ پلاتفۆرمه‌ك بۆ هه‌موو تاكێن جڤاكی و ل ئاست و چینێن جیاواز، داكو ده‌ربرینێ ژ فكر و بیر و بۆچوونێن خوه‌ بكه‌ن. ب سایا ئینترنێتی میدیایا نوو شۆره‌شه‌ك دروستكر دبوارێ به‌لافكرن و ئالوگۆركرنا بیر و ڕا و زانیاریان دا، كو هه‌ر تاكه‌ك دكاریت ب ساناهی بگه‌هیته‌ ژێده‌رێن ب هێز یێن زانیاریان یان لێكۆلینێ ل سه‌ر وان مژاران بكه‌ت كو بۆ وی د گرنگ بن. هه‌روه‌سا ل سه‌ر مالپه‌رێن تۆرێن جڤاكی ده‌فه‌ته‌كا گرنگه‌ بۆ بسپۆرێن د وارێن جودا جودا دا ئه‌زموون و زانست و زانینا خوه‌ ئالۆگۆر بكه‌ن ل گه‌ل كه‌سێن دی و ئه‌ڤه‌ ژی دبیته‌ ئه‌گه‌رێ فێربوون و پێشكه‌فتنا به‌رده‌وام لسه‌ر ئاستێ مه‌عریفییێ تاكان. ل گه‌ل ڤێ چه‌ندێ ژی نابیت لایه‌نێن نه‌رێنی یێن میدیایا نوی پشت گو‌هـ بێخین، چونكو دگه‌ل به‌رفره‌هبوون و زێده‌بوونا زانیاریان د ناڤ تۆرا ئینته‌رنێتێ دا، گه‌له‌ك ب زه‌حمه‌ت بوویه‌ كو راستی و پرۆپاگنده‌یێ و زانیاریێن خه‌له‌ت ژێك جودا بكه‌ین، د هه‌مان ده‌م دا گه‌له‌ك پشت به‌ستن ب تۆرێن جڤاكی دبیته‌ ئه‌گه‌رێ خوه‌ دویركرن ژ په‌یوه‌ندیێن راست و دروست یێن جڤاكی و دویربوون ژ ژیانا راسته‌قینه‌. میدیایا نوو تێكه‌لیه‌كه‌ د ناڤبه‌را ئه‌رێنی و ئاسته‌نگان دا، تاك دكاریت مفای ژ وان ده‌رفه‌تێن مه‌زن وه‌رگریت ئه‌وێن میدیایا نوو په‌یداكرین د وارێ په‌یوه‌ندی و ده‌ربرینا بیرورایێن شه‌خسی دا، هه‌روه‌سا پێدڤیه‌ تاك یێ هشیاربیت و شیانێن هه‌لسه‌نگاندنا زانیاریان هه‌بن و راستی و خه‌له‌تیان و پرۆپاگنده‌یان ژێكجودا بكه‌ت. ب شێوه‌یه‌كی بكاریت هه‌ڤسه‌نگیێ د ناڤبه‌را جیهانا راسته‌قینه‌ و نه‌راسته‌قینه‌ دا دروست بكه‌ت.