ئەدیبا عزەدین تاهر
گەلەک یا گرنگە کو دناڤ مێژوویا کوردان دا ڕۆژەک هاتیە دەست نیشان کرن ژ بوی ڕۆژا جلوبەرگێن کوردی، جلوبەرگێن کوردی ب جوانترین جل هاتینە هژمارتن، جهێ ئاماژە كرنێیە کو ئەڤ ڕۆژە ب ئاسانی نەهاتیە دانان ژ بوی ڤێ ڕۆژێ گەلەک واژوو هاتینە کوومکرن ژ ئالییێ ڕێکخراوێن ئافرەتا لسەر دەستێ دوو ئافرەتێن خودان شیان کوو دناڤا ڤێ ڕێکخراوێدا کار کرینە، ئەڤ واژوو هاتنە ڕاسپاردن بوو جهێن پەیوەندیدارو تا کوو گەهشتیە بەر دەستێ ئەندامێن پەڕلەمانتار و پەرلەمێنتۆیا كوردستانێ و ل وێرێ دەنگ لسەر هاتیە دان و بڕیار هاتیە دان کوو دەمێ هەموو سالان ل ڕۆژا دەهێ ئادارێ ب ڕوژا جلوبەرگێن کوردی بهێتە نیاساندن، ب دلوخۆشیڤە کو هەر سال ئەڤ ڕۆژە ب جلوبەرگێن کوردی و چالاکییێن جوربجور دناڤا داموودەزگەهێن میری و دبستان و زانینگەها دا ب ڕێڤە دچیت، ئەڤە ژی ب تنێ ب بوونەیا ڤێ ڕووژا تایبەتە كوو هاتیە تایبەت كرن ب جلێن کوردی لێ پشتی بووینا وێ ڕۆژێ ئێدی خەلك و جەماوەر مینا هەر ڕۆژێن دی جلێن فەرمی دکەنەڤە بەرخوە كو ئەڤە ژی تشتەك دروست و نۆرمالە لێ جێوازییەك هەیە ئەوژی ئەوە کو جاران دەم دخوازیت كوو ڕێورەسمێن گرنگ و تایبەت بهێن سازدان ڤێجا وی دەمی ب دیتنا من جلێن کوردی جوانترین جلن کوو ئافرەت و ژنا کورد لبەر خوە دکەت،ژبەركوو مادەم ئەم خودانێن دیرووكەك ڕەسەن و كوردەوارین، خودانێ گەل و وەڵات و ئاخ و زمان چاندوكلتوورا خوەینە، خودانێ کراس و فیستان و شال و شەپەکێن خوەینە، ئەرێ مانە ژبوو گێڕانا هندەک بیرئانین و بوونەیێن جووربەجورێن ڕێوڕەسمان دڤێت ب جلێن کوردی پێشوازی ل ڤان بیرەوەریان بکەین؟ ما ئەم نە خودانێ دوزا کوردی و خودانێ (شێخ سەعید پیران و سمکویێ شکاک و شێخ مەحمودێ حەفید و شێخ ئەحمەدێ بارزانی و شێخ سەلام و مەلا مستەفای بارزانی و ئێدریسێ جانە مەرگ و خانزادا میرێ سوران و ئامینە خان و مینا خان ،زکیە خان و حەبسە خان و هتد…) ین ئوو ئەڤە هەموو ب جلوبەرگێن کوردی و ب پارێزەرێن فەرهەنگ و كلتوور و چاندا كوردی دهێن نیاسین؟ یان وان شەڕ ب جلێن کوردیڤە نە دکرن؟! ئایا جەنگاوەر و پێشمەرگە و قارەمانێن كورد ب جلێن كوردی نەبوون؟! ئایا ژن و ئافرەت ب جلێن کوردی مل ب ملێ پێشمەرگەیێ وەڵاتی خەبات نەدكر؟ ئەرێ بوو چ ل ڤی سەردەمیدا یادکرنا کەسایەتییەكێ هوسا بووهاگران و هەر كەسایەتییەك دی و هەر سەركردەیەك دی ژی ئەم ب جلێن کوردی بەشداری ڕێوڕەسماندا نابین؟ ئەز ژوە دپرسم گەلووو بۆ ئوو چما؟
جلێن کوردی د جیهانێدا ب جوانترین جل هاتینە نیاسین ،هەر ئەو جلێن کوو چاندێ گەلێ من، گەلێ کوردان ددت نیاسین، باشە گەلوو ما هەر گەل و وەڵاتەک ب ڤێ چەندێ ناهێتە نیاسین؟ جارنا د تەلڤزیونێدا ئەز دبینم و مێزە دكەم كوو ژ بووی کەیف و خوەشی و یان ژی ڕێوڕەسمێن گرنگ ل پڕانیا وەڵاتێن جیهانێ خەڵك جلوبەرگێن رەسەن و دیرووكیا خوە نیشانی جیهانێ ددەن ئوو ب جلێن خوەیێن ڕەسن و دیرووكی د ڕێوڕەسم و فێستیڤال و بیرەوەریاندا دەردکەڤن!…
کورد و نەتەوەو گەلێ كورد ژی چوو کێمتر نینن ژ ڤان وەڵاتان، گەلێ كورد ژی ئاخ و زمان و چاند و كلتوور و بیروباوەرێن خوە و جلێن تایبەت بخوە ڕە هەنە كوو ئەوژی جلێن کوردینە،لەوەندی و شال و شەپکێن وانن. ئەو جلێن کوو ڕەنگە ژ دیتنا شریناهیا جوانیا وان خەلکەك بیانی ژی کەیف ب وان ڕە بهێت و حەژێ بكەن و هەتا كووبخوازن كوو بكەن بەرخوە ژی و ئەڤە بو من وەکوو تاکەکێ کورد جهێ سەربلندی و شانازی پێكرنێیە. ب دیتنا من ئەڤە جهێ گووتنێ بوو لەوما من دخوەست كوو ببێژم و گەلەک یا گرنگە كوو بهێتە بەرچاڤ گرتن. ڕاستە هەموو دەما ب تایبەت ل داموودەزگەهێن میری دڤێت ئەتکێتان بەرچاڤ بگرین لێ د ڕێورەسمێن فەرمی و پێدڤی گەلەک و گەلەك یا گرنگە كوو چاندا و كلتوور و فەرهەنگا کوردەواری بهێتە بەرچاڤگرتن بوو خەلکی ب گشتی و بوو جیهانێ ب تایبەتی و ب شانازیڤە. هیڤیدارم کوو ئەڤ بابەتە نەبت جهێ ڕەخنەگرتنێ وگل و گازنجان ژبەركوو کورد ب جلێن کوردیڤە بەرکەتی و جوانن.
