ئازا محمد عامر دێرشەوی
وەرزشڤان و هەڤالێن هێژا یێن باژێرێن دهۆك و زاخۆ،
دویهی، مە هەمیا سەیرى دەربیا كوردستانێ كر – ئەو یاریا گرنگ د ناڤبەرا یانەیێن خۆشتڤی یێن دهۆك و زاخۆ د چوارچۆڤێ دەوریا عیراقی دا. ئەنجامێن ڤێ یاریێ، وەكی هەر یاریەكا دی، هەلبەت دا ب بەرژەواندییا ئێك ژ هەردوو یانەیا ب داویماهی ئێت. لێ تشتێ گرنگ ئەوە كو ئەم وەكی مللەتەكێ كوردستانێ، پێش و پشتی هەر یاریەكێ، برایێن ئێك و دوو نە.
باژێرێن دهۆك و زاخۆ نە تنێ دراوسینە، بەلكو دیرۆكەكا هەڤپشك و چارەنڤیسەكێ ئێك هەیە. هەردوو باژێر بەشەكێ گرنگ ژ كولتورا گەلێ كورد پێك تینن و ئەو جوداهیا د ناڤبەرا وان دا هەی، دڤێت ببیتە سەرچاڤێ دەولەمەندیێ، نە سەرچاڤێ دوبەرەكی و ناكۆكیان.
سەركەفتن و بنكەفتن بەشەكە ژ وەرزشێ د جیهانا وەرزشێ دا، سەركەفتن و بنكەفتن دوو روویێن پارەیەكی نە. ئەگەر ئیرۆ دهۆك سەركەڤیت، دبیت سبەهی زاخۆ سەربكەڤیت. گرنگ ئەوە كو هەردوو تیم ب هەمان گیانێ وەرزشی و رێزگرتنێ یاریێن خۆ بەردەوام بكەن. تایبەتمەندیا وەرزشێ ئەوە كو هەرچەندە ركابەری د ناڤ پەیداكەرا دا هشك و بهێز بیت، لێ د داویێ دا دەستێن ئێك دگرن و رێزێ ل سەركەفتنا ئێك و دوو دگرن.
ركابەریا د ناڤبەرا دهۆك و زاخۆ دا، ب تایبەت د دەربیا كوردستانێ دا، بۆ گەشەكرنا ئاستێ وەرزشا كوردستانێ یە، نە بۆ دووركەفتنا باژێران ژ ئێك و دوو. ئەڤ ركابەری هاندەرە بۆ باشتر بوونێ، نە سنوورێ جوداكرنێ.
یاریا ناڤبەرا دهۆك و زاخۆ نە تنێ دەربیا كوردستانێ یە، بەلكو بەشەكە ژ ركابەریا گرنگ د دەوریا عیراقی دا. هەردوو تیم، وەكی نوێنەرێن كوردستانێ، دچەسپینن خۆ د ئاستێ وەرزشا عیراقی دا و دچن بەرەڤ ئارمانجەكا هەڤپشك: بەرزكرنا ناڤێ تیمێن كوردستانێ و سەركەفتن ب دەوریا عیراقی.
ب سەركەفتنا دهۆكێ یان زاخۆ، هەمی گەلێ كورد سەركەفتی دبیت. چونكی ئەڤ هەردوو تیم هەلگرێن ناڤێ كوردستانێ نە.
باژێرێن مە ژ ئێك گرنگترن هەر وەكی چەوا دڤێت ئاستێ یاریا كوردستانێ بلند ببیت، دڤێت هەڤالێن مە یێن وەرزشی ژی تێ بگەهن كو تشتێ ژ یاریێ گرنگتر پەیوەندی و برادەریا د ناڤبەرا مللەتێ مە دا یە.
دهۆك و زاخۆ دوو باژێرێن جوان یێن كوردستانێ نە كو هەر ئێك ژ وان تایبەتمەندیێن خۆ هەنە. دهۆك ب چیایێن خۆ و زاخۆ ب پرا دەلال یا دیرۆكی دهێنە ناسین. ئەڤ جوداهی دەولەمەندیا كولتورێ مەیە و دڤێت ئەم شانازیێ پێ بكەین.
هەڤاڵێن ناڤماڵێ، ركەبەرێن دەوریێ
هەرچەندە دهۆك و زاخۆ د ناڤ دەوریا عیراقی دا ركەبەرن و هەردوو تیم دخوازن نازناڤێ قارەمانێ دەوریا عیراقی ب دەست بینن، لێ د ئەنجامێ دا، ئەڤ هەردوو تیم برایێن ئێك و دوو نە.
ئەگەر ئیرۆ دهۆك سەركەڤیت سبەی زاخۆ سەرێ خۆ ب ناڤ دەوریا عیراقی دا بلند بكەت. گرنگ ئەوە كو تیمێن كوردستانێ ب هەڤرا بەرەڤ ئاستێ بلند بچن د ئاستێ وەرزشێ دا.
بانگەوازەك بۆ هەمی هەڤالان
ئەز بانگی هەمی هەڤالێن تیمێن دهۆك و زاخۆ دكەم دا كو:
بلا تیمێن مە ركابەریێ بكەن، لێ ئەم وەكی مللەت ئێك بین. هەردوو تیم نوێنەرێن دوو باژێرێن كوردستانێ نە كو دڤێت ئەم خوە ل وان بكەین خودان و پشتەڤانیا وان بكەین د ركابەریا دەوریا عیراقی دا. بلا وەرزش ببيت رێكەكە بۆ نێزیككرنا باژێر و گوندێن مە ژ ئێك و دوو، نە بۆ دووركرنا وان.
وەرن ئەم نیشان بدەینە هەمی گەلان كو یاری یا گرنگە، لێ برادەری گرنگترە.
بلا وەرزشڤان و هەڤالێن هەردوو تیمان كار بكةن بۆ هەڤركیەكا پاك و پاقژ. ئەز دبێژمە تیمێ دهۆكێ: پیرۆزبیت سەركەفتنا وە. و دبێژمە تیمێ زاخۆكا خوە: ل نێزیک ئەم دێ ب هێزتر و مەزنتر بين
سەركەفتنا هەر تیمەكی ژ مە، سەركەفتنا هەمی كوردستانێ یە.
و ئەڤا یە راستیا كو دڤێت ئەم هەمی پێ باوەر بكەین: د یەكگرتنێ دا، سەركەفتن هەیە.
