دلدار محەمەد
ئەز نزانم بەلێ دبیت ئەڤە مرن بیت و چوونا ناڤ گۆرستانێ دەرازینکا ژیانێ!
دڤێ زڤرۆکا بەرۆڤاژی دا گەلەک جاران من تەویک دانە سترانا گێژەڤانکەکا بەرزە!
ما کیژ قولاچ هەیە تژی کوشا وێ مژ نەبیت!؟
ئەز نزانم ژی بەلێ دبیت ئەڤە فەنا بیت و هەمبێزا ئاخێ دەستپێکەکا نوی یا هەبوونێ بیت،
هەبوون ژی نهالا رامانا خۆ دا وندا بوویە ما هین دبێژن ئەڤان هەمی بازنەیێن بەتاڵ رامانەک بۆ ژیاندنێ ڤێ هەبیت؟!
وە جارەکێ ژ وی سڤۆرەیێ بفرێ مرۆڤەکی مالا وی وێران کری پرسییە ،ژیان چیە؟!
ما هەوە جارەکێ ژ وی زارۆکێ هەڤرکیێن سیاسیان یاریکێن وی هەمی گۆری شەری کرین پرسییە ،ژیان چیە؟ ئەو دارا بۆ بەلاڤکرنا هەناسەیان هاتیە چاندن و بۆیە دارێ تڤەنگەکێ وە ژێ پرسیار کریە، ژیان ئانکو چ؟!
هۆین و خۆدێ ما ئەڤە ژینە یان ژی مرنە و کراسێ بۆراندنێ د بەر؟
ما کەنگی ئەم دشێین ببێژینە ژینا وی بابی ژیان یێ حەفت زارۆهەین و حەفت هەیڤە کرێیا خانیێ خۆ نەدایی ئەو کالەمێرێ هەنێ گوت :
حەفتێ ساڵ من بوراندن و تێرا سالەکێ من مرۆڤاتی و ژیان نە دیتن
هێشتا من تێر خۆ د هێسکا زاروکینیا خۆ دا نە هژاندیه هێشتا من خەونەک نە دیتیه و ئەز تێدا نە کوچبەر!
لڤی کوژی
ل وی کوژی
تژی هەمبێزا هەر ئێکی ڤیانا گۆرستانێ یە! هەر مانەکێ ، چوونەک یا لسەر سینگێ خۆ چاندی و وەکی باپیرێ من یێ جوتکار چاڤدێریێ بۆ دکەت ، ژیێ خۆ هەمییێ ددەتە وارا وێ
من گوتە ڤی باژێری ئێک هەیه د هەمبێزا تە دا بیت و تژی بەریکێن وی ڤیانا مرنێ نەبیت
بەلێ ببۆرن
هێشتا ئەو ژ بێدەنگییا مەندەهۆشییێ دەرنەکەفتیه
