نایف مەحموود
ل پشتی سەرهلدانا بوهارا سالا 1991 تا ڕادەیەکی دەرگەهێ ڕاگەهاندن و میدیا ئازاد ل هەرێما کوردستانێ ڤەبوو، هێدی هێدی کەنالێن ڕاگەهاندنێ مینا تلەفزیون و ڕادیو گوڤار و ڕۆژنامان جهێ خوە دناڤا چارچوڤێ ڕاگەهاندنا کوردیدا کر و تا نوکە و خوشبەختانە ب سایا وێ خەبات و قوربانیدان ملەتێ کورد ب سەدان کەنالێن ڕاگەهاندنێ ئەڤرۆ د گورەپانێ دا نە، ڤێجار چ یێن سەر ب حکومەتێ ڤە بن یان پارت و لایەنێن سیاسی بن یانژی یێن تایبەت، ژبلی کەنال و میدیاێن سێبەر. هەلبەت ئەڤە ڕەنگڤەدانا پێشکەفتن و وەرارێ یە دجڤاکێ مەدا، دەلیڤا ڤێ ڕێ خوشکرنێ دزڤریتن بو حکومەت و دەستهەلاتا کوردی کو دەرفەت و رێ خوشکرینە ژبوی هەبوون و گەشەگرنا هێلا گشتی یا ڕاگەهاندنێ، گەر نە، دستهەلات دشیا مەودایێ هەبوونا ڤێ هەمی ڕاگەهاندنا کوردی تا ڕاددەیەکی بەرتەنگ بکەت و هندەک سانسورا بدانیت تاکو نەبیتە سەرگێژی ژبو حکومەت و دەستهەلاتێ، لێ ئەڤە واتایا وێ چەندێ دگەهینیت کو دستهەلات ب ڕێکا دەستهەلاتا چارێ کو ڕاگەهاندنە نیشا جیهانێ و جڤاکێ نیڤ دەولەتی بدەت و بێژیتێ ئەڤە ئەو گەلێ چەندین سال بو یێ ستەم لێکری وهەمی ماف و ئازادی یێن ژێ هاتینە ستاندن و بەرزەکرن ئەڤروکە ئەم وەک کورد د سەربورا بەرتەنگ کرنا ئازادیان دگەهین، ها ئەڤە خەبات و تێکوشان بو مە بەردوامی پێ دای تا ئیرو بوینە خودان دەستهەلاتەکا سەربەخو و سنورێ ڕاگەهاندن و میدیایێ د جڤاکێ مەدا بەرهفرەهــ بویە و ڕەنگڤەدانا خوە د هشیارکرن و پێشڤەبرنا جڤاکێدا مەداهەیە و مە خەبات ژبو ڤێ ئازادیێ دایە کو ببینە خودان ڕاگەهاندنەکا خومالی و هەمی وان ئێش و ئازارو دەردەسەریێن گەلێ مەدیتین بکەینە مێژو و دیکیومێنت دا بەرچاڤی خەلکێ خوە و جیهانێ بکەین، ب خوشحالیڤە ئەڤ ڕاگەهاندنا مە ئاماژە پێکری بو ئەگەرێ هشیارکرن و پێشڤەبرنا کومەلگەهێ د هەمی بواراندا سەرەرای ئەو کێم و کاسیێن هین، لێ ئەڤە نابیتە بەهانە کو ئەم رولێ ڕاگەهاندنا ئاڤاکەر کێم بنرخینین، بەلکی جهێ شانازیێ یە بومە ڤی ڕەنگێ ڕاگەهاندنێ دیرووک و خەبات و ئارمانجێن پێ ددەینە خویاکرن. یا خویایە ژی جاران جورەکێ ڕاگەهاندن و میدیا کوردی بویە هوکارێ تێکدان و ئالوزکرنا بارودوخێ کوردستانێ چونکی دروست نەهاتیە ئاراستەکرن ژبو هشیارکرنا خەلکی بەلکی پتر وەک چەکەکێ نەتەندروست دژی دەستهەلاتا کوردی هاتیە ب کار ئینان و نموونە ژی چەندین هەول و بزاڤ هاتینە ئەنجامدان بو هندێ ب ڕێکا ڤێ ڕاگەهاندنێ سیارێ پێلێن نەرازیێن هەڤوەلاتیان ببن و جادێ ئاراستە بکەن و زورجاران خوەنیشاندنێن خەلکی بو ئاقارەکێ خراب برینە و بەرەڤ توندو تیژی و ب سەرداگرنا دام و دەزگایێن حکومی و حزبی ڤە برینە، ئەڤ جورێ ڕاگەهاندنێ خزمەتا ئارامیا هەرێما کوردستانێ و نابیتە ئامرازەک بو هشیارکرن و پێشڤە برنا ملەتی، بەلکو دبیتە دەلیڤە بو نەیارێن کورد قازانجێ ژ دەلیڤێن هوسا ببینن و ئەو ئاشتی و تەناهیا مە هەی بشێوینن و دەست وتلێن خوە یێن گەنی بکەنە دناڤدا، دیسان ئەڤ جورێ ڕاگەهاندنێ ناچیتە دخانا هشیارکرن و پێشڤەبرنا کومەلگەهێ مەدا، بەلکی دبیتە ڕاگەهاندنەکا دوژمن کارانە و ئومێد و هیڤیێن خەلکی بەرەڤ ئاڤابونێ ڤەدبەن.
