چەتۆ وانلی
تورنتۆ, کەنەدا
لە پێناو بونیادنانی یەک هەڵوێستی و پێکهێنانی لۆبییەکی کارای کوردی لە کەنەدا، ماڵی کورد لە تۆرۆنتۆ، لە ژێر ناوی هەوڵدان بۆ دروستکردنی “کۆمیسیۆنی کاری پێکەوەیی کوردان لە کەنەدا” دەستپێشخەریەکی ڕاگەیاند، لە رۆژی سێ شەممە ڕێکەوتی 28ی جەنیوەری 2025 بە ئامادەبوونی هونەرمەندی گەورەی کورد، شڤان پەروەر و ژمارەیەک لە کەسانی ئەکادیمی و نوێنەرانی کوردی هەر چوار پارچەی کوردستان، بەبەشداری زۆرینەی ئەندامانی دەستەی بەڕێوبەرایەتی ماڵی کورد، لە ئۆفیسی ماڵی کورد لە تۆرۆنتۆ، جڤینێکی فراوان ئەنجامدرا، کۆبوونەوەکە بە بەشداری و گفتوگۆی گەرمی ئامادەبووان بەپێز تر و دەوڵەمەند تر کرا، بەگەرمی پێشوازی و پشتگیرییان بۆ ئەم هەوڵ و هەنگاوەی ماڵی کورد، نیشاندا. بڕیارە لە داهاتوویەکی نزیکدا و لە ئاستێکی فراوانتر هەنگاوی کردەیی و کۆبوونەوەی دیکەی بۆ ئەنجام بدرێت! ئامانجی “فیدراسیۆنی کاری پێکەوەیی کوردان لە کەنەدا” ئەنجامدانی کاری پێکەوەیی و یەکخستنی هەوڵەکانە لە پێناو دروستکردنی لۆبیەکی کارای کوردی و پشتگیری کردنی کوردان لە ناوخۆی کەنەدا و دەستڕاگەیشتن بە پەڕلەمان و ناوەندەکانی بڕیار لە کەنەدا. هەروەک بەگژداچوونەوەی مەدەنیانە لەهەمبەر هەر کارێکی دوژمنکارانەی ئەو دەوڵەتانەی کە بە غەدر و زوڵمی مێژوو، کوردستانی گەورەیان بەسەردا دابەشکراوە. لەپێناو سەرخستنی ئەو کارە مەزن و پیرۆزە، بە ناوی دەستەی بەڕێوبەرایەتی ماڵی کورد لە تۆرۆنتۆ، پڕ بەدڵ سوپاسی ئامادەبوون و بەدەمەوەهاتنی تەواوی ئەو خۆشەویستانە دەکەین کە لەگەڵمان بەشداربوون. هیوادارین لە هەنگاوەکانی داهاتوو تریشدا هەموومان شان بەشانی یەکتری بەردەوامی بەو پرۆژەیە بدەین تا سەرکەوتن و گەیشتن بە ئامانجەکانی کۆمیسیۆنەکە. لە ناوەرۆکی یەکەم کۆبوونەوەدا ئەوە ڕاگەیندرا کە کۆمیسیۆنەکە هیڵی سوری لەسەر و بۆ هیچ کەس و گروپ و ڕێکخراوێک نییە و نابێت، ئامانج لێی خزمەتکردنی جڤاتی کوردی و بەدەمەوە چوونی گرفت و ئاریشەکانی کوردانە لە هەرچوار پارچەی کوردستاندا. بژی کورد بژی کوردستان دەستەی بەڕێوبەرایەتی ماڵی کورد لە تۆرۆنتۆ.
