شێرزادێ شێخه‌سنی
هه‌بوونا هه‌رێمه‌كا كوردی یا ب هێز مینا بزۆته‌كێ ئاگری یه د ناڤ په‌لێن دیترێن كۆمڕێ دا، چه‌ندی پۆفكه‌یێ دێ گه‌شتر بیت لێ ل داویێ دێ بیته خۆلی، به‌لێ گه‌ر په‌لێن دیتر ژی ب ره‌خڤه هێدی هێدی ژ گه‌رما وێ ببه‌ن دێ بیته ئاگره‌كێ گه‌ش و چو تشته‌ك خۆ ل به‌ر ناگریت و دكاریت ته‌ر و هشكان دێ پێكڤه بسۆژیت، ئه‌ڤجا هه‌بوونا هه‌رێمه‌كا دیترا كوردی ل رۆژئاڤایێ كوردستانێ ب هه‌مان جۆر و شێوازێ هه‌رێما باشۆرێ كوردستانێ دێ كیانه‌كێ باشتر د دیرۆكا كوردی دا تۆماركه‌ت، ئه‌ڤجا نها بارودۆخ دگونجایی نه، ئه‌ڤه چه‌ندین ساله پتریا وه‌لاتیێن رۆژئاڤا وه‌كو په‌نابه‌ر یان ئاواره ل كوردستانا باشۆر دژین هه‌روه‌كو ل ناڤا مالا خۆدانه، ل سه‌ر ئه‌ردێ خۆدانه، دلسۆزیا وان و ژیبوونا وان بۆ نه‌ته‌وه و ملله‌تێ وان، د لۆتكه‌یا خۆ دابوویه و ئه‌و ب هندێ دبه‌رنیاسن، زێده‌باری وێ ئێكێ ژی ئه‌ڤه ل سه‌ر هه‌مان په‌ره‌وه‌رده‌یا كوردینیێ و خۆگونجاندن ل گه‌ل ئاڤاكرنا وه‌لاته‌كێ نوو هاتنه به‌رهه‌ڤكرن، بۆ هه‌رێمبوونێ ـ نابێژین بۆ ده‌وله‌تبوونێ ـ ژبه‌ر مه‌ره‌مێن لایه‌نی، به‌لێ چاوا تو بێژی ئه‌ڤه ب هێجه‌تا په‌نابه‌ربوونێ هه‌یڤه‌كا هنگڤین ل گه‌ل كوردێن باشۆر هاته ئه‌نجامدان ب كریار و ب مه‌جازی، چونكو گه‌له‌ك ژ وان ته‌ڤلی جڤاكی بووینه كۆر و كچێن هه‌ردو كوردستانان خێزان پێكئیناینه و نفشه‌كێ نوو ژی ئیناینه هه‌بوونێ، پتر ژ به‌رییا هینگی چونكو ژمێژه ژی ئه‌ڤه رۆتین هه‌بوویه لێ ژبه‌ر سنوورێن ده‌ستكرد چه‌نده‌كێ هاتبوونه ژێكدوورخستن، ئه‌ڤجا هه‌بوونا دو ده‌وله‌تێن كوردی باشتره ژ ئێك ده‌وله‌تا كوردی.. مه‌ره‌ما من ب ئیدیۆمێ ده‌وله‌ت واته هه‌رێم.. چونكو راسته نها ئه‌م هه‌رێما كوردستانا ئیراقێ ب ناڤێ خۆ یێ ره‌سمی یه، به‌لێ د ناخێ هه‌ر كورده‌كی دا ناڤ ده‌وله‌ته و ب گه‌له‌ك كریارێن خۆ ژی ڤه، ده‌وله‌ته چونكو پێگه‌هێ وێ یێ سیاسی گه‌له‌ك ژ یێ ئیراقێ ب خۆ ب خۆ بهێزتره و نها ئیراقه‌كا خودان سه‌روه‌ردی ب خێرا هه‌رێما كوردستانێ یه. ئه‌ڤێ ئێكێ ئیراقی ب خۆ شاهده‌یێ پێ دده‌ن، چه‌ندی عه‌ربه‌كێ ئیراقێ سه‌ره‌دانا كوردستانێ بكه‌ت ب چاڤێ خۆ وێ ئاڤه‌دانیێ دبینین و دچیته ئیراقێ و په‌ندا ب كوردستانێ دبێژیت و له‌عنه‌تا ل ئیراقا خۆ دبارینیت و ئه‌ڤه‌یه ئه‌وه گۆتنا كوردان دسه‌لمینیت یا كو دبێژیت، شۆله‌كه‌رێ خۆبه خۆشتڤیێ خه‌لكی به
