مسته‌فا عه‌بدورحمان ئه‌ره‌دنى
12 ده‌مژمێژێن ل ئامه‌دێ ماین تێرا هندێ هه‌بون گه‌ریانه‌كێ دناڤ وى باژێرێ كه‌ڤنار ودێریندا بكه‌م وهه‌لسه‌نگاندنه‌كا سه‌ر پێ بۆ بكه‌م.
ل ڕێكکه‌ڤتى7/12/2022ێ به‌ره‌ف توركیا چوم ژبۆ ئه‌نجامدانا نشته‌گه‌ریه‌كێ وقوناغا مه یا ئێكێ باژێرێ(ئامه‌دێ) بوو، ئه‌و باژێرێ من دگه‌له‌ك دستران وژده‌ڤێ خه‌لكێ دیتر گوهـ لێ بووى كو دگوت ئامه‌د پایته‌ختێ كوردستانێ یه وه‌كو دسترانا(دیاربه‌كر پایته‌خته لێ لێ لێ) وگه‌له‌كێن دیتر، ل هه‌وه ناڤه‌شێرم ئامه‌د وكه‌لهه ودیوار وبورجێن وێ بۆ من ببوو مه‌ره‌ق كانێ دێ كه‌نگى بینم.
پشتى گه‌هشتین باژێرێ ئامه‌دێ ئێكسه‌ر چوینه ئوتێله‌كێ ل نیڤه‌كا باژێرى دناڤ كه‌لهێ دا ومه خۆ گیرۆنه‌كر به‌لكو بۆ دیتنا باژێرى وكه‌لهێ ودیوار وبورجێن ئامه‌د ئه‌م ژ ئوتێلێ ده‌ركه‌فتین،مه سه‌ره‌دانا دیوارێن ئامه‌دێ كر ول بورجا سه‌ركه‌فتینه سه‌ر دیوارێن كه‌لهێ ونێزیكى چه‌ند سه‌د مه‌تره‌كان ل سه‌ر دیوارێن وێ هاتین وچوین ومه وێنه گرتن، وگه‌له‌ك ب دیوار ونه‌خشێن ل سه‌ر دیواران سه‌رسام بوم، پشتى مه تێهنكا خۆ ب دیمه‌ن ودیوار وبورجێن كه‌لهێ شكاندین ئه‌م خوار كه‌فتین ناڤ باژێرى بۆ هندێ داكو هه‌ڤپه‌یڤینێ دگه‌ل خه‌لكێ وێ بكه‌م ومن گوه ل زمانێ كوردى ببیت، به‌لێ موخابن خیالا من یا خرش وخاڤ بوو، دبازاریدا هاتین وچوین بخۆ ئێك ژى من نه‌دیت ب كوردى باخڤیت،نه ژ بچوكى ونه‌ژ مه‌زنى وهه‌تا پیر وكالان ژى ول ده‌مێ ئه‌م دگه‌ل ب كوردى دئاخفتین به‌رسڤا مه ب توركى دا، ب راستى حێبه‌تگرتى بوم!، ما ئه‌ڤه نه باژێرێ ئامه‌دێ یه ونه پایته‌ختێ كوردستانێ یه، ما ئه‌ڤه نه كوردن؟، باوه‌ر بكه‌ن هنده‌ك گومان بۆ من چێبوو من هزر كر نه‌كو ئه‌ڤه نه ئامه‌د بیت من سه‌ره‌دانكرى، براستى گه‌له‌ك وگه‌له‌ك توره بوم، تو دنیڤه‌كا دلێ كوردستانێدا بى وكه‌س ب كوردى نه‌ئاخڤیت،پتر ژ پێنج ده‌مژمێران ل ناڤ بازارى وده‌رڤه‌ى كه‌لهێ وناف كه‌لهێ گه‌ریاین من ئێك په‌یڤا كوردى ژى گوه لێ نه‌بوو، به‌رێ مه كه‌فته دوكانه‌كێ هێژ ئه‌م نه ئاخفتین خودانێ دوكانێ ب كوردیه‌كا جوان گوت(هوین بخێر هاتن هوین ژكوردستانێ هاتینه؟) بۆ من گه‌له‌ك یا خۆش بوو ئێكسه‌ر من گوتێ تۆ خه‌لكێ ئامه‌دێ نینى تو خه‌لكێ كیڤه‌ى؟.
گوت، راسته، ئه‌ز نه خه‌لكێ ڤێرێ مه ئه‌ز خه‌لكێ جوله‌مێرگێ مه.
من گوت له‌وما ب كوردى دئاخڤى وژدویرڤه ته ئه‌م نیاسین، بوچى خه‌لكێ ڤێره ب كوردى نائاخڤیت ما نا بێژن ئامه‌د پایته‌ختێ كوردستانێ یه؟.
گوت،هه‌مى ب توركى دئاخڤن، مانێ تو گه‌ریایى ته گوه ل په‌یڤه‌كا كوردى ژى بوو؟، مام ژمێژه‌یه ڤان ده‌ست ژ زمانێ خۆ به‌ردایى، به‌لێ ل جوله‌مێرگێ هه‌مى ب كوردى دئاخڤن، هه‌ر چه‌نده ئاخفتن ب كوردى نوكه نه قه‌ده‌غه‌یه.
مه هنده‌ك تشت ژێ كڕین و ڤه‌گه‌ریاین ئوتێلێ، رۆژا پاشتر مه گوته خودانێ ئوتێلێ بومه تاكسیه‌كێ ئاماده بكه مه ببه‌ت فرۆكخانێ، ته‌كسى ئاماده‌بوو وسوار بوین من گوته شوفێرى تو كوردیێ دزانى؟.
گوت ئه‌رێ ئه‌ز كرمانجم.
من گوتێ چه‌ند ژ سه‌دێ كورد ل ئامه‌دێ هه‌نه؟.
گوت: پتر ژ90% كوردن.
من گوتێ نه‌خێر تو شاشى.
گوت،بوچى پا چه‌ند هه‌نه.
من گوت:4% كوردن یێن دیتر توركن.
چاڤێن وى زیق بون گوته نه یاهوو كورد پترن.
من گوت، 12 كاتژمێران ل ئامه‌دێ گه‌ریام من چ كورد نه‌دیتن ب كوردى باخڤن ئه‌ڤه نیشانا هندێ دده‌ت كو كورد لێ نینن وباژێره‌كێ توركی یه.
گوت، ئه‌ڤه راسته ئه‌م ل مالێن خۆ ژى دگه‌ل زارۆكێن خۆ ب توركى دئاخڤین.
براستى گوتنا وى شوفێرى هندیدى ئه‌ز خه‌مبار وبێ ئومێد كرم.
تو وه‌ره به‌رێخوبده ڤێ مال وێرانیێ باژێره‌كێ كوردان ودلێ كوردستانێ و ب پایته‌ختێ كوردستانێ بهێت نیاسین وخه‌لكێ وێ ب كوردى دگه‌ل زارۆكێن خۆ ژى ل مالێن خۆ نه‌ئاخڤن چ ژ ڤى نه‌ته‌وه‌یى دهێته چاڤه‌رێكرن،ئه‌وێ نه‌شێت زمانێ خۆ پارێزیت دێ چاوا شێت وولاته‌كى ئاڤاكه‌ت، ئه‌ز ب گشتى به‌حسێ كوردێن ئامه‌دێ دكه‌م، راسته دبیت هنده‌ك سازیێن فلوكلورى هه‌بن ل ناڤ كور وسمیناران یان دسترانێن خۆدا ل جهێن تایبه‌ت ب كوردى باخڤن،به‌لێ باوه‌رم ل ده‌مێ ئه‌و ژى ژئاڤاهیێ ده‌ردكه‌ڤن ودهێنه دبازاریدا هه‌ر ب توركى دئاخڤن، بێگومان ئه‌ڤه ژى تشته‌كێ مه‌ترسیداره بۆ هه‌بون و وه‌رارا زمانێ كوردى ل ئامه‌دێ دپێشه‌رۆژێدا چونكه زمانه‌كێ سه‌قه‌ت و تێكهه‌ل وتوركى ل سه‌ر زال دێ په‌یدا بیت هه‌ر وه‌كو نوكه دده‌ڤوكا واندا دهێته تێبینیكرن، به‌رێ خۆ بده‌نێ جوهیێن كورد ئه‌ڤه پتر ژ حه‌فتێ سالانه ژ كوردستانێ چوین وهێژ ب كوردیه‌كا په‌تى دئاخڤن وزمانێ خۆ ژ ده‌ست نه‌دایه،كوردێن په‌تى ل باژێره‌كێ دێرینێ كوردستانێ ب كوردى نه‌ئاخڤن ب راستى جهێ ل سه‌ر راوه‌ستانێ یه، ویا خویایه نوكه چ رێگرى نین بۆ زمانێ كوردى ل باكور.
ئامه‌د پایته‌ختێ كوردان بێ زمانێ كوردى!
