Havin Acar
ji rojên westiyayî re dihêlim hêvîyên xwe
ji simbilên genimên li ber bayê ketî
sûretê mêrgeşînan ji fêrîşteyên çîrokan re dihêlim
û ji xewna azadîyê re mistek buhar
awazên birîndar ji çuk û çivîkan re
her yek li kuçeyek dihêlim kilamên dûvdirêj
tûrikê kelama qedîm diavêjim sitûyê rojê
hêwanên qesrên kevnar ji çirîskên çavzer re dihêlim
baskekî dîn ji hecîreşk û qulingê berêvaran re
pêlên serxweş ewrên gemar di gerdena rojê de
bêdengîyeka kûr rondikên xwatirxwestinê
ji hevokên bêwate re dihêlim
