ڕاپۆرت: دلۆڤان هالۆ / زاخۆ
مەسعوود محەمەد، پڕۆفیسۆرێ هاریکار ل پشکا کۆمپیوتەری ل زانکۆیا زاخۆ و شارەزایێ ژیرییا دەستكرد د دیدارەکێ دا بۆ گۆڤارا پێنگاڤ دیار کر کو ژیرییا دەستکرد وەكو شۆڕەشەكا نوو یا تەكنەلۆژی یا گەشێ دكەت، و دێ گەلەك گوهوڕینێن مەزن پەیدا كەت د گەلەك بیاڤێن هەمەجۆر یێن ژیانا مە دا، و ڕەنگە ببیتە ئەگەرێ گوهۆڕینێن مەزن یێن جڤاكی و ئابووری و کولتووری، و هندەك ژ ڤان گوهۆڕینان ئەرێنی نە، و هندەك ژی نەرێنی.
ناڤهاتی ئاماژە ب وێ چەندێ ژی کر کو ژ لایێ ئەرێنی ڤە، ژیرییا دەستكرد دێ شێت گەلەك بیاڤێن ژیانێ پێشئێخیت و باشتر كەت و ژیانێ ب ساناهی تر بكەت، وەکو چاڤدێری و چارەسەریا ساخلەمی و پەروەردە و فێرکرن و ڤەگۆهاستن و بەرهەمئینانێ، و دێ هاریكار بیت بۆ ڤەدیتنا چارەسەریێ بۆ گەلەك ئاریشەیێن مەزن یێن جیهانێ، وەکو گوهۆڕینێن کەشوهەوایی و وزە و ئاسایشا خوڕاکی.
گۆت ژی:”ژ لایێ نەرێنی ڤە ڕەنگە تەکنەلۆژیا ژیرییا دەستكرد ببیتە ئەگەرێ ژ دەستدانا گەلەك دەلیڤەیێن كاری، و ژدەستدانا گەلەك تایبەتمەندیێن كەسایەتی و پەیدابوونا گەلەك ئاریشەیێن جڤاكی و توشبوون ب ئیدمانا ئەلکترۆنی، و پەیدابوونا گەلەك ئالینگاریێن ڕەوشتی و یاسایی، لەوما پێدڤییە دەرئەنجامێن بکارئینانا خراب یا ڤێ تەكنەلۆژیا نوو بهێنە دەستنیشانكرن ژ لایێ جڤاك و حکومەت و دەزگەهێن ڤەكۆلینان ڤە، و ڕێكێن دروست بهێنە دەستنیشانكرن بۆ سەرەدەریكرنا دگەل لایەنێن نەرێنی و كێمكرنا وان، و گرنگیدان ب بکارئینانا ڤێ تەکنەلۆژیایێ ب شێوەیەکێ بەرپرسیارانە و کاریگەر بۆ بدەستڤەئینانا مفایێن ئەرێنی بۆ کۆمەلگەهێ”.
زێدەتر ژی گۆت:”مە ل زانکۆیا زاخۆ ژی دوو سەنتەرێن ڤەكۆلینان هەنە کو ئەز سەرپەرشتیا وان دکەم، ئەڤ هەر دوو سەنتەرە كار ل سەر بابەتێن ژیرییا دەستكرد دكەن كو ڤەكۆلینێن جوودا ل سەر پێشڤەچوونا ڤێ تەكنەلۆژیایێ ئەنجام ددەن”.
