د. کاروان صالح – زانکۆیا زاخۆ
ئەگەر ل دیرۆکێ بزڤرین د بینن، دیرۆکا کوردان ژ یا ڕۆژئاڤایی کێمتر نینە، پترییا وەلاتیێن ئەوروپا کۆچبەرن و ژ لاوەتیێن جودا جودا چووینە ئەوان وەلاتان، دگەل هندێدا ئەوان شیان جیلێن خودان شیان و هوشمەند ئاڤا بکەن و وەلاتیێن ئەو لێ دژیان ئاڤا بکەن و سەرنجا خەلکێ خۆ رابکێشن و فێرخوازیێن خۆ ڤڕێکڕنە دناڤ ڕۆژهەڵاتیدا دا هزروبیرێن ئەوان بخوینن و فێرێ شارستانیا ڕۆهەڵاتی بن.
دبەرامبەردا، میللەتێن ڕۆژهەڵاتی هیچ پێنگاڤەک بۆ پێشڤەچوون و پشت بەستنێ لسەر شیانێن خۆ نەهاڤێتن خۆ هێلان بهێڤییا ڕۆژئاڤایڤە، لەوڕا ڕۆژهەڵات یا بویی جهێ تاقیکرنا چەکێن ڕۆژئاڤایی و هەر ئێک لجهەکێ یێن بخۆ ئەوان بکاردهینن.
پێدڤییە وەلاتیێن ڕۆژهەڵاتی هزرێ ل پاشەڕۆژا نەتەوەیێن خۆ بکەن و دەستهەڵاتێ لدۆیڤ بەرژەوەندیێن وەلاتیێن خۆ بکەن نەک لدۆیڤ بەرژەوەندیێن ڕۆژئاڤایی، ئەڤا لسەر سووریێ، لوبنان، یەمەن، میسرێ و لیبیا دهێتە ڕوودان سەربۆرێن باشن بۆ دەستهەلاتدارێن ڕۆژهەڵاتی خۆ گڕێدان ب دەولەتێن ڕۆژئاڤایڤە دێ کارەساتێن هووڤ بدژی میللەتێن ئەوان هێنە رویدان.
پێشهاتێن نها وەلاتێن ڕۆژهەڵاتی تێدا دبۆرن ب شێوەیەکێ ئاشکەرا خۆیا دکەن، پێدڤییە دەستهەلاتدارێن ڕۆژهەلاتی ب شێوەیەکێ ساخلەم و لدۆیڤ بنەماێن بەرژەوەندیێن گشتی سەرەدەریێ دگەل نەتەوەێن دبن دەستهەڵاتا خۆڤە بکەن، بەرۆڤاژی هەر پێنگاڤەکا ئەو ب دژی ئەوان باڤێژن دێ شلقەکا بهێز ب ئەوان نەتەوەیان کەڤیت دێ ب شێوەیەکێ تۆند ب دژی ئەوان ڕاوەستن و دێ پێشهاتێن ئەوان وەک پێشهاتێن سووریێ، یەمەن، لوبنان، لیبیا و میسرێ لێ هێن، ئەڤ چەندە گەلەک لسەر عێراق، تورکیا و ئیرانێ ب مەترسییە، چونکی لدۆیڤ ڕاپۆرتێن ڕاگەهاندنا جیهانی ڕۆژ ب ڕۆژێ ڕێژەیا نەرازیبوونێ دناڤ ئەڤان وەلاتان دا یا بەرەڤ زێدەبوونێ دچیت، دهەمان دەمدا فشارا وەلاتێن ڕۆژئاڤایی لسەر ئەڤان وەلاتان ب ڕەنگەکێ بەرچاڤ بەرەڤ زێدەبوونێ چوویە، ئەگەرێن ئەڤێ چەندێ دزڤریت بۆ هەبوونا گرووپێن چەکداری یێن ب دژی بەرژەوەندیێن ڕۆژئاڤایی دناڤ ئەڤان وەلاتاندا، دیسان نەپێگێرییا ئەڤان وەلاتان ب ئەوان سۆزێن داینە وەلاتیێن ڕۆژئاڤایی بۆ چارەسەرکرنا ئاریشەێن ناڤخۆیی مینا چارەسەرکرنا دۆزا کوردان و عەرەبێن سووننە.
لەوڕا دوویر نینە ڤەڕێژا ڕوودانێن سووریا و یەمەنێ عێراق، ئیران و تورکیا بخۆڤە بگریت، ب تایبەتی پشتی تورکیا خۆ گەلەک تێکەلی پێشهاتێن سووریا کری و کارتێکرن کری سەر بەرژەوەندیێن ڕووسیا ئەمریکا لدەڤەرێ، ژبەر هندێ پێدڤییە کورد دئەڤێ هاوکێشا سیاسیدا زۆر هووشیار بن و ب شێوەیەکێ هوویر دۆێڤچوونا پێشهاتێن دەڤەرێ بکەن.
