فەهمی مایی
ڕاستە سوریا ژ [بشار الأسد] و ڕژێما بەعس پاقژ بو، لێ هێشتا گەلەک مایە و وەکی کورد دبێژن[ ئەڤ هەڤیرە دێ گەلەک ئاڤێ ڤەخوت].
ئەگەر بەرێخوەدەینێ..ئەڤ گوڕۆپێن چەکدارێن هاتین، ب پلان و ب پشتەڤانییا چەندین وەڵاتا و یێ سەرەکی کو تورکیایە، ئەڤە نوێنەراتییا خەلکێ (سوریێ) هەمیێ ناکەن، بەلکی ئەڤە نوێنەراتییا بەشەک کێم ژ جڤاکا سوریێ دکەن!
وەکی ئەم هەمی دزانینن چەندین ئول و نەتەوە ل [سوریێ] دژین و ئەو ئارمانجێن ئەڤ گوڕۆپێن ئیسلامی پێ هاتین، گەلەکا بزەحمەتە و دویرە ژ ڕیالیتێتێ کو سەربگریت، کو جهێ ڕەزامەندیا گەلێ ]سوریێ[ هەمیێ بیت.
لەوا ژی…سەرەڕای پاشەڕوژەک [سوریایەک] نە جێگیر، هەر دەستهەڵاتا ل [شامێ] ڕێڤەبەریێ بکەت دێ پێدڤی کوردا بیت و مەجبورە دانوستاندنا دگەل کوردا بکەت و ئەو جوگرافیا لبن دەستێ [ڕێڤەبریا خوەسەر] کو یا تێکەل ژگەلێن دی یێن دەڤەرێ.
ب چ ڕەنگا کورد تەسلیم نابن و دەستا ژ مافێ خوە بەرنادەن و ئەوا ب سەرێ کوردا هاتی و ئیناندی ل چاخێ چوی ئەو نە ممکنە دووبارەبیت ڤە.
کوردا مێژوویەک و ڕابردویەک تەڕاژیدی هەیە ل وێ پارچێ و دەڤەرێ، لێ ئەڤروکە خودان [ستاتویەک] بهێزە و پشتەڤانیەکا مەزنا ناڤ نەتەوی هەیە، خوە بو جیهانێ هەمییێ دایە نیشاندان، هەم ژ شەڕێ وان دژی داعشێ و هەم ئاڤاکرن و ڕێڤەبرنا وێ دەڤەرێ بڕەنگەک مودێرن و دەڤەرەک [موزایك] ئانکو تێکەل بهەمی ئول و نەتەوە ئاڤاکریە و شیانە جهێ خوە لنک وەڵاتێن زڵهێز و هەتاکو هندەک وەڵاتێن عەرەبی ژی بکەن، ئەڤە ژ لایەک دی ڤە، کوردا ئیستراتیژیترین دەڤەرا سوریێ ل بن دەستێ وانە!
لەوا ژی هەر دەستهەڵاتا بهێت ل سوریێ، یا پێدڤی وان و وێ دەڤەرێ یە، هەڵبەت هەمی جیهان دزانیت، بشەڕ و هەڤچون ئەو دەڤەر نازڤڕیت، ژبلی هندێ دانوستاندنا دگەل بکەن و ئەڤ فشارا [تورکیا] ژی دکەت ل سەر وێ دەڤەرێ، بتنێ بو هندێ یە کو ئەو دەڤەر یان کورد، دەستا ژ هندەک مافا بەردەت و هندی بشێت وان دەستکەفتا کێم کەت دەما دانوستاندنێن کوردا دگەل [شامێ].
هەڵبەت جیهان ژی ڤێ باش دزانیت، کو ئەو دەڤەر ب چ ڕەنگا تەسلیم نابیت و چارە بتنێ دانوستاندنن، کو کورد ژی بگەهنە مافێن خوە، ئو ئەو ماف د دەستورێ نۆیێ سوریێ دا هەبن و گەڕەنتیێن ناڤ نەتەوی ژی هەبن، بێی ڤێ چەندێ کورد دێ بەرگریا مان و نەمانێ کەن ، ئەڤەژی نە دبەڕژەوەندیا سوریا نۆی دایە و نەیا وەڵاتێن زڵهێز کو کوردا وەک دوست و هەڤکار دزانن.
لەوا ئەز دبینم پاشەڕۆژا ل وێ پارچا کوردستانێ و دەڤەرێ دێ یا ڕوهن و گەش بیت و ئەو مافێن کوردا دڤێن دێ بدەستڤە هێن، لێ ل[ شامێ ] و دەڤەرێن دی یێن [سوریێ] دێ ڕەوشا وان نەیا جێگیربیت، شەڕ و هەڤچون دناڤبەراگوڕۆپێن جودا جودا بەردەوامبیت و بەلکی دێ خوزیا ل دەستهەڵاتا[بشار اسدی] ڕاهێلن.
