سیلاڤ بازێركی
ئه‌گه‌ر كه‌سه‌ك پێنڤیسه‌كی ژ مه بدزیت و پاشی ئه‌م بزانین چ پێ نه‌ڤێت دێ ئه‌و كه‌س گه‌له‌ك د چاڤێن مه‌دا یێ شكه‌ستی بیت و ب هیچ شێوه‌یه‌كی نابیته جهێ باوه‌رییا مه، دبیت گه‌له‌ك كار و پڕۆژه د سه‌رێ مه‌دا هه‌بن، لێ ژ به‌ر نه‌بوونا ده‌مێ پێدڤی هه‌تا نهو مه ئه‌نجام نه داینه، د سه‌رده‌مێ نهۆ دا گه‌له‌ك ئه‌گه‌رێن دزینا ده‌می یێن په‌یدا بووین و ب هیچ شێوه‌یه‌كی جهێ مفای نینن، هه‌تا مروڤێن ب ڤی ڕه‌نگی ژی یێن زۆر بووین، تشتێ سه‌یر ئه‌وه ئه‌م ڕوی ب ڕوی دبینینن یێ ده‌مه‌كێ گرنگ ژ مه دبه‌ت، دبیت ده‌مێ ئاڤاكرن یان پێشڤه‌برنا كه‌سایه‌تیا مه بیت، ب مه‌ره‌ما بۆراندنا ده‌می بیت دگه‌ل مه یان دبیت به‌رژه‌وه‌ندیه‌كا تایبه‌ت هه‌بیت، د هه‌مان ده‌م دا ئه‌گه‌ر ئه‌م پێدڤی بین هه‌تا ئه‌و دله‌كی ل دلێ مه‌ژی بده‌ن د ئاماده نینن (پێخه‌مبه‌رێ مه محه‌ممه‌د سلاڤ لێ بن دبێژیت:دوو نیعمه‌ت خه‌لك گه‌له‌ك مفای ژێ دبینن، ساخله‌می و ده‌مێ به‌تاله)، ئه‌ڤجا تشتێ سه‌یر ئه‌وه ئه‌م دبینینن و دزانینن ئه‌ڤ تشته یان ئه‌ڤ كه‌سه ب هیچ شێوه‌یه‌كی جهێ مفای و باشیێ نینن و گه‌له‌ك ده‌مێ مه ددزن، لێ ئه‌م یێن بووینه ئاڵۆده‌یێن وان! كه‌سێ ئاڵوده ئه‌و كه‌سه ده‌مێ د زانیت كاره‌ك یان تشته‌ك یێ ب زیانه دگه‌ل هندێ دا یێ فێر بوو یێ و نه‌شێت ب ساناهی ده‌ستان ژێ به‌رده‌ت وه‌كی ماده‌یێن بێهۆشكه‌ر، ئه‌رێ پا چاره‌سه‌ریا كه‌سێن ئاڵۆده ب مرۆڤان چیه؟ئه‌و كه‌سێ ئاڵۆده ب خوه دشێت چاره‌سه‌رییا خوه بكه‌ت؟ یان ژی پێدڤی ب هاریكارییا كه‌سێن ده‌وروبه‌ره؟ ل ڤێرێ من دڤێت ئاماژێ ب خاله‌كا دیتر ژی بكه‌م ئه‌و ژی ئه‌وه كۆ ئاگه‌هدار به د ناڤبه‌را حه‌زژێكرن و ئاڵۆده‌بوونێ دا شاش نه‌به! جیاوازیه‌كا مه‌زن یا د ناڤبه‌را وان دا هه‌ی د حه‌زژێكرنێ دا پێدڤیه هه‌ر كه‌یف خوه‌شیه‌كێ بێبه‌رامبه‌ر پێشكێشی خوه‌شتڤیێ/ا خوه بكه‌ی لێ ئاڵۆده‌بوون بتنێ پێشكێشكرنا زیانا و نه‌خۆشیێن د دویڤ دایه، ئه‌ڤجا گه‌له‌ك جاران ئه‌م دێ رازی بین ب ئه‌نجامدانا خه‌له‌تیێ و د زانینن ئه‌ڤ كاره‌یێ خه‌له‌ته، لێ بتنێ دا ئه‌و كه‌سێ بوویه ئه‌گه‌رێ ئاڵۆده‌بوونا مه دگه‌ل مه بمینیت! ئانكو زیان و خه‌له‌تی و خرابیێ دبینینن و دزانینن و ڕازی دبین! لێ د حه‌زژێكرنێ دا بێی هیچ مه‌رجه‌ك دێ ب كه‌سێ به‌رامبه‌ر ڕازی بی بتنێ ب هه‌بوونا ڤیانه‌كا پاكژ و بێی به‌ڕژه‌وه‌ندیێن تایبه‌ت،ئه‌ڤه ئێكه ژ وان جوداهیێن بچووك یێن د ناڤبه‌را ئاڵۆده‌بوون و حه‌زژێكرنێ دا ئه‌گه‌رێن ئه‌ڤی جۆرێ ئالۆده‌بوونێ ژی دزۆرن: ڕه‌نگه كارتێكرنا وان ڤالاهیێن زارۆكینیێ بیت یێن هه‌تا نهۆ ژی ماینه ڤالا ژ ڤیان و گرنگیدانێ، نه‌بوونا ڕه‌وشه‌نبیریه‌كا باش د سه‌ره‌ده‌ریكرنێ دا به‌رامبه‌ر كه‌سان، ئه‌و كه‌سێ پێ ئاڵۆده‌بووی ل ده‌سپێكێ گرنگیه‌كا زوڕ یا پێشكێشكری مه‌رج نینه گرنگیپێدانا وی/ێ ژ حه‌زژێكرنێ بیت!دبیت خاپاندن بیت بۆ ب ده‌ستڤه‌ینانا به‌ڕژه‌وه‌ندیێن خوه یێن تایبه‌ت.. هه‌روه‌سا كه‌سێ ئاڵۆده مه‌رج نینه هه‌رده‌م ره‌گه‌زێ به‌رامبه‌ر بیت دبیت هه‌ڤال و كه‌سێن ده‌وروبه‌ر بن،لێ هه‌ر چاوابیت هه‌می جورێن ئاڵوده‌بوونێ پێدڤی ب چاره‌سه‌ریێ نه، ئه‌ڤجا ئاڵۆده‌بوون ب كه‌سان ژی ئێكه ژ نه‌خۆشیێن ده‌ڕوونی و پێدڤی ب چاره‌سه‌ریێ یه.
