پێنگاڤ
“ب كچێن باژێرێ خوه دێ بزاڤێن پاراستنا ناسناڤێ كوردستانێ كه‌ن”
سه‌رۆكێ یانه‌یا ئافره‌تێن دهۆك یا وه‌رزشی دیار كر بۆ وه‌رزێ نوو یا خولا فوتسالا كوردستانێ دێ ده‌ست ب به‌رهه‌ڤییان كه‌ن و رژدن ناسناڤێ خوه یێ وه‌رزێ بۆری پارێزین.
هه‌روه‌سان سه‌ردار سالح گۆت: سه‌رباری كاودانێن نه‌خۆش یێن دارایی مه هه‌موو بزاڤ كرینه كچا وه‌رزشڤان یا دهۆكێ ب وه‌رزشا خوه شادبیت بزاڤێن مه بۆ پێكئینانا تیمێن پشكۆژ و تازه‌پێگه‌هشتی و لاوان بووینه، به‌رنامه‌یێ مه ڕێكخستی ب پلان بوویه، ل ڤێ هاڤینێ مه تیمێن جودا بڕێیا ئه‌كادیمیێ به‌رهه‌ڤكربوون تایبه‌ت یێن یارییا باسكێت بۆلێ، فوتسالێ و مه ده‌رگه‌هـ بۆ پرانییا یاریێن دی ژی ڤه‌كربوو، لێ هه‌ر پێنگاڤه‌كا دهێته هاڤێژتن پێدڤی ب پشته‌ڤانییا دارایی یه، یانه‌یا ئافره‌تێن دهۆكێ تایبه‌تمه‌ندیا خوه یا هه‌یی ژبه‌ركو یاریزان كچن و هاتنۆچوونا وان ب زه‌حمه‌ته دڤێت پاسه‌كا تایبه‌ت هه‌بیت دیسان پشته‌ڤانی بۆ بهێته كرن، له‌وما ژی مه چه‌ندین بزاڤكرینه و داخواز ژ جهێن په‌یوه‌ندیدار كریینه و چاڤه‌ڕێ نه تایبه‌ت ژلایێ پارێزگه‌ها دهۆكێ ڤه.
ژلایه‌كێ دووڤه ناڤهاتی گۆت: بۆ وه‌رزێ نوو یێ خولا كوردستانێ یا فوتسالا كچان ئه‌م یێ ده‌ست به‌رهه‌ڤییان دكه‌ین ب كادری و یاریزانێن خوه یێن باژێرێ دهۆكێ، ژبه‌ركو تیما مه قاره‌مانا وه‌رزێ بۆری بوو، له‌وما ژی دێ هه‌موو بزاڤان كه‌ین بۆ وه‌رزێ ئه‌ڤ ساله ناسناڤێ خوه پارێزین، هه‌رچه‌نده ئه‌ركێ مه بزه‌حمه‌ته لێ ب پشته‌ڤانییا حوكمه‌تا هه‌رێمێ گه‌شبینن باشترین شێوه به‌رهه‌ڤییان بكه‌ین و هه‌ڤڕكیێ بۆ ده‌ستڤه ئینانا ناسناڤی بكه‌ین.
