شڤان سالم گولى
ره‌ڤه‌ندبوون ل گه‌ل په‌یدابوونا مرۆڤان لسه‌ر رویێ ئه‌ردی دیارده‌یه‌ك بوویه ملێ وێ بلی مرۆڤان ڤه، ئه‌ڤجا چ ژ ئه‌گه‌رێن رویدانێن سروشتی چ ژی ره‌ڤین ژ كولتۆرێن جڤاكی چ ژی ژ سیسته‌مێن ده‌ستهه‌لاتدارێی، ئه‌ڤ دیارده‌یه‌ك ژ كۆمه‌لگه‌هێ بۆ كۆمه‌لگه‌هێ دبیت د ئاست و رێژه‌یا جوداجودا دا بیت ل جیهانا سه‌رده‌م، گه‌لێن رۆژهه‌لاتا ناڤه‌راست و ئه‌فریقیا و هنه‌كێ ژی ئه‌مریكا باشور پتر فرشك ـ كریێن ڤێ دیاردێ نه، هه‌لبه‌ته د ناڤ وان ژی ئه‌ڤێ دیاردێ ئه‌گه‌رێن جودا جودا بوو هه‌نه و دبیت ژ ئه‌فریقیا بۆ رۆژهه‌لاتا ناڤین و باشورێ ئه‌مریكا جودا بتلێ ب گشتی ئه‌م دشێن بێژێن ئه‌گه‌رێن ئابۆری و سیسته‌مێن ده‌ستهه‌لاتداریێن توندره‌و خوه سه‌پێنه‌ره ژ ئه‌گه‌رێن سه‌ره‌كی بن..
دیاره گه‌لێ كورد ژی قه‌ده‌را وێ بوویه كو به‌شه‌ك ژ گه‌لێن رۆژهه‌لاتا ناڤه‌راست بت و بێ به‌هر نینه ژ ڤێ دیاردێ، لێ پرسا ره‌ڤه‌ندبوونێ د ناڤ كوردان دا جداهیا خوه هنه‌كێ هه‌یه ژ گه‌لێن دی،ژ به‌ر كو گه‌لێن دی كو خه‌لكێ وان كۆچبه‌ری ولاتێن دی دبن گه‌لێن خودان ده‌ستهه‌لات و سه‌روه‌ری نه، و ژ ده‌ستهه‌لاتا خوه ره‌ڤینه،لێ گه‌لێ كورد به‌روڤاژی ڤێ چه‌ندێ گه‌له‌كێ بن ده‌ست و پارچه بوویی دناڤبه‌را چوار ولاتێن خودان سیسته‌مه‌كێ ده‌ستهه‌لاتداریێ كو دان ب هه‌بوونا گه‌له‌كێ ب ناڤێ كورد و جوگرافیایه‌كێ دا بناڤێ كوردستان نه‌كرینه و بگره به‌رده‌وام كورد تووشی قڕكرن و مالوێرانكرن و تالانكرنێ كرینه،له‌وا ژی تاكێ كورد پێخه‌مه‌ت پاراستنا گیانێ خوه خوه رزگاركرنێ نه‌چار بوویه مل بده‌ت به‌ر ره‌ڤه‌ندایه‌تیێ، د ده‌مه‌كێ دا كو هه‌ر ده‌م دلێ وان گه‌ل ئاڤ و ولاتێ وان بوویه،
چو پێ نه‌ڤێت ئه‌ڤ دیارده ئه‌گه‌ره‌كی سه‌ره‌كی یه بۆ ته‌ڤلیبوونا كولتۆر و كه‌لچه‌رێ گه‌لان و شارستانیه‌تان.
ئه‌ڤجا مژارا مه ئه‌وه كو ئه‌ڤرۆكه و پشتی ڤه‌بوونا ده‌رگه‌هێن دونیایێ ره‌ڤه‌ندێن هه‌موو گه‌لان د ئه‌وا كو دبێژنێ جیهانا ئازاد دا و لسه‌ر هه‌موو پرسێن نه‌ته‌وه‌یی بۆ فشار ـ خستنێ لسه‌ر گه‌لێن دنیایێ و دیسا نه‌ته‌وه‌یێن ئێكبوویی كو ناڤه‌ندا بریاردانێ نه‌جاده‌یا رۆژئاڤا و ئه‌مریكا دجولینن و دئێخن ژێر فشارێ بۆ گه‌هاندنا ده‌نگێێ گه‌لێ خوه و ژبلی كو هه‌ولا فشارێ لسه‌ر نه‌ته‌وه‌یێن ێك بوویی دكن هه‌ولا راكێشانا سۆزا وه‌لاتییان ژی دكن كو مل بده‌ن به‌ر ملێ وان بۆ راگه‌هاندنا په‌یامێ و فشاركرنێ، نموونه‌یێن ڤێ چه‌ندێ ژی دزۆرن.
لێ ب مخابنی ڤه ئه‌وا مه دڤێت بێژێن ره‌ڤه‌ندا كوردی د ڤی واری دا پتر ژ وێ كو لسه‌ر فشاركرنێ بۆ پرسێن نه‌ته‌وه‌یی كێفه‌راتا خوه بكن پتر ژ ئه‌قلێ حزبی ڤێ مژارێ دشۆپینن و نه‌شیاینه خوه ژ وێ هه‌ڤڕكی و دابه‌شكاریا سیاسی یا كو ل ولاتی هه‌یی ڤه‌قه‌دینن.
یا ژێ ژی وێڤه‌تر ره‌ڤه‌ندا كوردی ب هه‌مان ئه‌قلیه‌تا پارچه‌بوونێ دخه‌بتن ئه‌ڤه د ده‌مه‌كی دا كو ئه‌گه‌ر ئێكگرتی بان د شیان لۆبی و فشاره‌كا باش لسه‌ر گه‌لێن دنیایێ و نه‌ته‌وه‌یێن ئێكبوویی و ئێكه‌تیا ئورۆپا چێبكه‌ن، ل دۆر دوزا كوردان، باشترین نموونه ژی رویدانێن شازدی ئوكتۆبه‌ڕی كو ئه‌گه‌ر ره‌ڤه‌ندا كوردی ب راستی ب هزره‌كا نه‌ته‌وه‌گه‌ری خه‌بتیبان، دشیان رۆلێ خوه بگڕین و فشاره‌كا مه‌زن بهینن هه‌بوونێ، لێ ب مخابێ ڤه كوردێ باشور د دابه‌شكری و یێن پارچه‌یێن دی ژی من چ ژێ یه؟!
له‌وا ژی گرنگه ژ لایه‌كێ ڤه هێز و رێكخستیێن سیاسی و ژ لایه‌كێ ره‌ڤه‌ندا كوردی جاره‌كا دی بخوه‌دا بچن و دۆزا كوردی لسه‌ر هه‌موو دۆزێن دی بن، لسه‌ر ڤێ پرسێ د ئێكگرتی و خودان هه‌لوه‌ست بن بۆ هندێ كو بشێن خواسته‌كا گه‌لێ خوه ده‌ستبه‌ر بكن و سۆدێ ژ هێزا ره‌ڤه‌ندا كوردی ژ هه‌ر چار ئالیان ببینن وه‌ك چاوا ره‌ڤه‌دنێن گه‌لێن دی لسه‌ر پرسێن نه‌ته‌وه‌یی هه‌موو جوداهیان دده‌ن ئالیه‌كێ و هه‌ڤ دگرن.
