زنار تۆڤی
فەستیڤالا دوویێ یا بەرهەمێن خۆمالی ل دەڤەرا بەروارییان هاتە گێران و ئەڤ سالە ڕێژەکا باش یا بەرهەمێ جۆتیاران هاتییە فرۆتن. فه‌همی بالایی” په‌یڤدارێ فیسته‌ڤالا به‌رهه‌مێن خۆمالی ل ده‌ڤه‌را به‌روارییا، بۆ گۆڤارا پێنگاڤ دیار كر: ل رۆژا 10 ی 10 / 2024 ێ” فیسته‌ڤالا دووێ یا به‌رهه‌مێن خۆمالی ل ده‌ڤه‌را به‌روارییا ل كۆمه‌لگه‌ها بریفكا هاته گێران و بۆ ده‌مێ سێ رۆژان یا به‌رده‌وام بوو” ئه‌ڤ ساله هژمارا خیڤه‌تان دناڤا فیستڤالێ دا 108 خیڤه‌ت بوون و ل سێ جهێن جۆدا هاتبوونە ڤه‌دان” کو جهه‌ك بۆ بازارێ به‌رهه‌مێن خۆمالی و هنگڤینی و ئێك بۆ كارێن ده‌ستی و یێ دیتر ژی بۆ خوارنگه‌هان و فرۆتنا خوارنێن كوردی هاتبوو دروستکرن. ناڤهاتی گۆت ژی: ئەڤ سالە پتری 60 هزار کەسان دناڤا فیستەڤالێ دا پشکدار ببوون، دیسان 60 جۆتیارێن دەڤەرێ پشكداری د فيستەڤالى دا کربوو، سەرجەمێ بەرهەمێ دناڤا فیستەڤالێ دا هاتيیه فروتن، پتری 42 تەنان بوویە، نێزیکی ٤٠ تەنان ل دەردوران ژی هاتینە فروتن، سەرجەمێ فێقی و بەرهەمێ هشک و هنگڤینێ هاتیە فروتن، سەد و سیھ و ئێک ملیۆن و دو سەد و حەفتێ و شەش هزار دیناربوون، د هەمان دەمدا، ب کوژمێ 100 ملیۆن دیناران بەرهەمێ فێقی ژ دەردوران هاتیە فروتن، دیسان كارێن دەستی ژی ب کوژمێ 19 ملیۆن و 800 هزار دیناران هاتینە فرۆتن، خوارن ژی ب کوژمێ 41 ملیۆن و 700 هزاران هاتیە فرۆتن.
