ئەم و جڤاك

فەهمی مایی

ئێك ژ خوەحەژێکرنا مروڤی خوەبخوەیا وی ئەوە کو بهەر ڕەنگەکی بگەهیتە هندەک حەز و ئارمانجا و هندی بشێت قوربانی و زیانێ نەدەت و هەکە بدەت ژی هەۆڵدەت کێم بدەت!
بزاڤ و چاڵاکی و پێشڤەبرنا ژیانێ و گوهڕینا جڤاکی و پێشکەفتنا وەڕارا هەر جڤاکەکی و ژیانێ ژی، هەڵبەت قۆڕبانی و کەدەک مەزن پێدڤێن ئڤجار چ یێن گیانی یان مالی، بێی ڤان قۆڕبانیا مەحالە کو بگەهیە ژیانەک خوەش و جڤاکەک پێشکەفتی یا مروڤ خەونا پێڤە دبینیت!
ئەزێ ل ڤێرێ بەحسێ جڤاکێ مە کەم، مروڤ دشێت ڤێ پرسێ بکەت، ئەرێ بوچی هندە ساڵە، هەر د بازنەکی دا دزڤڕین و هەتا نوکە نەشیاینە گوهڕینێن مەزن د جڤاکێ خوەدا بکەین و هندەک قەید و زنجیرا بشکێنین و بەرەڤ پێش ببەین و ئەگەرێن ڤێ چنە؟
مروڤ دشێت بێژیت ئەگەرا سەرەکی و بنگەهی ئەڤەیە، جڤاکێ مە پارڤەبویە ل سەر سێ پشکێن مەزن و ژێک جودا.
دوو پشکێن ل ناڤخوەییا وەڵاتی کو ئێک ژ وان پشکا کو ڕێژەک مەزن ژ جڤاکی بخوەڤە دگریت، بو ڤێ پشکێ هند خەم نینە و هند هزر د ژیانێ دا ناکەن و هەما بوراندنا ڕۆژایە و ئەڤڕۆ بو سۆبەهی و گەلەک دویربین نینن.
پشکا دووێ دویربینن، هشیارن، دزانن و حەزدکەن گۆهڕینا بکەن و دزانن کانێ جڤاکێن جیهانێ یێ لکیڤە و جڤاکێ مە یێ لکیڤە و چ پێدڤییە بکەن، لێ ژ بەر بەڕژەوەندیێن خوەیێن تاکی و فشارا جڤاکی و ڕەخ ڕویێن وان حەزناکەن و ئامادەنینن قۆڕبانییا بهندەک بەڕژەوەندیێن خوەیێن تاکی و کەسوکی بدەن، لەوا لجهێ بلندکرنا دەنگێ نەڕازیبون، هەوڵدان و بزاڤێ بو پێشڤەبرنا جڤاکی، ئەو بێ دەنگی و بێهەڵویستیێ د هەلبژێرن.
پشکا سێیێ کو پێتر دزانن،دویربین تر و جیهان پێتر دیتیە و چەندەها ساڵان ل دەرڤەی وەڵاتی ژیانە و دناڤ جڤاکێن پێشکەفتی دا و چاڤێن وان باشتر ڤەبوینە، ئەڤ پشکە ژی گەلەک حەزدکەت گۆهڕینا بکەت و دزانیت کانێ چ پێدڤییە، بشەڤ و ڕۆژا هەواردکەت د سوشیاڵ مێدیایێ دا و خوە گەلەک شەهرەزا دانن و ڕەخنە و گازندێن بەردەوام دکەن، لێ بتنێ گوتن و نڤێسینن و بێی کریارن و گوتنێن ل پشت لاپتوپ و سەر موبایلانە وان ژی نەڤێن و ئامادەنینن، قۆڕبانیێ ب بەڕژەوەندیێن خوە بدەن و ژیانا خوەشا ]ئەوڕۆپا[ بجهێلن و ئامادەنینن ڤەگڕن وەڵاتی و ناڤ جڤاکێ خوە و بارێ هندەک نەخوەشیا هەلگرن و بزاڤ و کار بکەن بو گۆهڕین و  پێشڤەبرنا جڤاک و وەڵاتێ کو خەونا پێڤەدبینن، ئەڤەژی وەکی کورد دبێژن[سەد گوتن هەمبەری کریارەکێ] گوتن بتنێ چ جها ناگرن گەر کریار دگەل نەبن!
دناڤبەرا ڤان سێ پشکێن جڤاکی دا خەلک و جڤاکێ مە دنالیت و چ پێشەڕوژێن وەسا گەش مروڤ نابینیت بڤان دەست و دارا و هەما ئەو بازنێ مە هەی، وەک هەرجار تێدا زڤڕین و وێ بزاڤ و وەڕاڕێ ناکەین کو ژ وی بازنی بدەرکەڤین وەک ئەم هەمی دبینین، لەوا دناڤبەرا جڤاکێ مە و ئەڤ جڤاکێن پێشکەفتی دا جوداهیەک مەزن هەیە و چێبویەا.