فەهمی مایی
گەر ئەم بهێین و خاندنەکێ بو دیروکا مللەتان بکەین، دێ بینین هەر مللەتەک د چەند قوناغادا دەرباز بویە، ئڤجار بگرە ژ قوناغێن نەزانین و تاڕییێ و هێدی هێدی بەرەڤ گوهڕینا جڤاکی و ڕۆناهییێ هەتاکو هندەک گهەشتینە گوپیتکا پێشکەفتنێ و مروڤ دشێت بێژیتێ چاخێ زێڕین بو وان مللەتا، لێ دیسا نە ڕاوەستاینە و بەرەڤ پێشەڤەچوونا بەردەوام دانە، ئەڤ هەمی گوهڕینە و پێشکەفتنا ڤان مللەتا، هەلبەت هندەک مەژی ئان هزرمەند لپشت بوینە و شیانە بهزر و بیرێن خوەیێن نوی و ڕوهن و ڕەخنێن وێرەک، گوهڕینێن مەزن دجڤاکێ خوەدا بکەن ژ هەمی لایەکی ڤە، ئەڤ مروڤە بوینە دینەمویێ پێشڤەبرنا جڤاکی ژ قوناغێن تارییێ بەرەڤ ڕۆناهییێ و نمونێن ڤان وەڵاتان و ڤان کەسان ژی زۆرن و تایبەت ل ئەوڕۆپا، هەلبەت ئەها ئەڤ هزرمەند و خودان هزر و مەژییێ مەزنن کو دبێژنێ ڕوناکبیر یان ڕەوشەنبیرن، ئەڤە بوون پێشەنگێن ل پشت پێشڤەچوون و پێشکەفتنا ڤان وەڵاتێن نوکە دبینین ل گوپیتکا پێشڤەچونێ.
ئەمێ بهێینە سەر ناڤەڕوکا بابەتێ خوە و گرێدای ب جڤاک و خەلکێ مەڤە هەی، دیاردەک سەیر هەیە دناڤ جڤاک و خەلکێ مەدا، کو هەر کەسێ بو هوزانڤان، نڤێسەر، خودان باوەرنامە، خاندەڤانێ زانکو، ماستەر و دکتورایێ، دێ ناڤ کەن کەسێن ڕەوشەنبیر و ڕوناکبیر، کو ئەڤە شاشیەک مەزنە و گونهەک مەزنە، ئەم ل دەرهەقا پەیڤ و مروڤێن ڕەوشەنبیر و ڕوناکبیر دکەین، ژبەرکو بدیتنا من ئەڤە هەمی نە ڕەوشەنبیرن.
ڕەوشەنبیر یان ڕوناکبیر ئەڤ پەیڤە ژ دوو بەشا پێکدهێت [ڕەوشەن یان ڕوناک] و [بیر یان هزر] هەلبەت واتا وانا دیارە و پێتڤی ناکەت شڕوڤەکەم.
ئەڤ ڕوناکبیر و ڕەوشەنبیرە، مروڤ دشێت بێژیت ئەو کەسە یێ کو شیای مەژییێ خوە ژجیهانا خەیال، چێڕوک ،چیڤانوک،ئەفسانە و هزرێن پاشڤەمای یێن جڤاکی و نەڕیت و تیتالێن هزارەها ساڵا دناڤ جڤاکی دا مای و مەژی و هزرێن خوە ژێ بشوت و پاقژبکەت و خوە ژێ قۆڕتاڵ کەت و د هەمان دەم دا ڕوناهیەک ئێخستبیت د مەژیێ خوەدا و گوهڕینێن مەزن د کەسایەتییاخوەدا چێکربن.
هەلبەت ئەڤێ ژی خاندنەک و ئەزمۆنەکا مەزنا ژیانێ یا هەردەم ل سەر هەر تشتەکی پێدڤێت و ئەڤ ڕوناهیا ڤی کەسی ئێخستی د مەژی و هزرێن خوەدا، دیسان ئەو بشێت وێ ڕوناهییێ بدەتە ڕەخ و ڕوی و جڤاکێ تێدا د ژیت و ببیتە دینەمویەکێ پێشڤەچوونێ د جڤاکی دا و بهەمی وێرەکی ب هەڵویست، ڕەخنە و دیتنێن خوە دیارکەت لسەر شاشییا و شەڕێ ژناڤبرنا پاشڤەمان و پاشکەتنێ و ئەو زنجیرێن جڤاک پێ هاتی گرێدان بکەت، ب وان هزر و مەژی و هزرێن ڕوهن، جڤاکی پێشڤە ببەت و وان زنجیرێن جڤاک پێهاتی گرێدان بشکێنیت و جڤاکی بەرەڤ گوهڕینێن ئەڕەنی ببەت چ گوهڕینێن جڤاکی و چ یێن سیاسی، ئەڤ کەسە ببیت شەمالکەک و ڕێ خوەشکەرەک بو ڕۆناهییا ڕێکا گەلێ خوە ل سەر هەمی ئاستەنگ و ژێهەلیێن بەرسینگا خوەڕا بسەرکەڤیت و قوڕبانیا بدەت د وێ ڕێ دا…ئەها هینگێ دێ بێژنە ڤی ڕۆناکبیر و ڕەوشەنبیر، هەلبەت ئەڤ کەسەژی گەلەک کێم دبینم دناڤا جڤاکێ مەدا و ئەم پێتڤی دەمەک و بزاڤەک زۆرین هەتا ڤان کەسا زێدەکەین دناڤ خوەدا.
بکورتی ئەز دشێم بێژم مروڤ دشێت بێژیت:
د بیت کەسێ ڕەوشەنبیر،نڤێسەر، هوزانڤا خودان و باوەرنامە بیت…لێ نە هەمی نڤێسەر و هوزانڤان و خودان باوەڕنامە ڕەوشەنبیرن !
