شێرزاد شێخه‌سنی
ل سه‌ر گۆتنا كۆنفشیۆس یا كو دبێژیت: ریێا دویر یا هزرا (میل) ب ئێك پێنگاڤ ده‌ست پێ دكه‌ت… لێ ب خۆش حالی ڤه ئه‌ڤه گۆڤارا پێنگاڤ یا ب بزاڤ ل هه‌می ده‌م و گاڤان، ئه‌ڤه خۆ نویكره‌ڤه و چوو د ژماره‌یا خۆ یا 53 یێ دا، كو دكارین بێژین هه‌مان به‌رده‌وامیدانا بزاڤێن به‌رییا خۆییه مینا گۆڤاره‌كا به‌ری وه‌ختی كو ل سالێن 1994 و 1997 ل (ئوتاوا) و (كه‌ندا) كو ب ناڤێ (رۆژی نوێ) هاتبوو ده‌رخستن، هه‌ر ئه‌و كه‌س بوون یێن مینا هێژایان (جه‌لال قادر و ئارام دهۆكی و مه‌حموود سیامه‌نسۆری و كۆمه‌كا نڤیسه‌ر و ره‌وشه‌نبیرێن كورد تێدا كاردكرن، پڕ ب دلسۆزی و خه‌مخۆرییه‌كا خومالی خواستین كو ده‌ربرینه‌كا گرنگ هه‌بیت. ئارمانج ژێ گه‌له‌ك بوون، مینا لێخرڤه‌كرنا پارچه‌یێن بژاله ژ كوردان و چاندنا كوردی، ببیته زمان حالێ ئاواره‌یێ كورد نیمچه لۆبیه‌ك ژ ره‌ڤه‌ندا كوردی، وه‌كو ببیته ده‌نگه‌ك یانژی ره‌نگه هێزه‌ك بۆ پشته‌ڤانیكرنا ڤێ ره‌ڤه‌ندا بێ خودان ل سه‌رانسه‌ری جیهانێ، نه‌خاسمه كورد ب خۆ ل سه‌ر ئه‌رد و جه و مالێن خۆ د ته‌په‌رسه‌ركری بووینه، ته دڤێت ل كۆلانێن بیانییان چ هێز و سه‌میانه‌ك هه‌بیت؟!. ئه‌ڤجا دبیته پێنگاڤ هه‌ما گۆڤاره‌ك بیت، وه‌كو وه‌شانه‌كا رۆژنامه‌ڤانی، لێ بۆ چاندا كوردی ره‌هه‌ندێن خۆ یێن گه‌شبین پتر دێ هه‌بن. له‌ورا دبینم ده‌ركه‌فتنا گۆڤاره‌كا ب ڤی ره‌نگی ده‌ربرینێ ژ دیارده‌یه‌كا فه‌ر دكه‌ت، نه‌خاسمه بریارده‌ر و خواندنێن ڤێ گۆڤارێ د نێزیكن ژ ناڤه‌ندا بریارێ و میناكا دیمۆكراسیێ و سپۆنسه‌را مرۆڤاتیێ دكه‌ت كو ئه‌و ژی ئه‌مریكایه، دێ ده‌نگه‌كێ نێزیكی لایه‌نێن جێبه‌جێكار بیت، بۆ هه‌ر كاودانه‌كی یان حسێبه‌كێ.. هه‌لبه‌ت ئه‌ڤ كه‌سانێن ڤێ گۆڤارێ برێڤه‌دبه‌ن، وه‌كو ره‌وشه‌نبیر و ئه‌دیب و چالاكڤان، ب هه‌بوونا سه‌ربۆره‌كا دویر و درێژ و ل گه‌له‌ك وه‌لاتان ژیایین و ئه‌ڤ دوناییه ژ رۆژهه‌لات و رۆژئاڤا شه‌قاندی دێ زانن كه‌نگی، چاوا، چێ، كی و بۆچی خالان باشتر دانه سه‌ر پیتان، راسته بیاڤێ ته‌كنۆلۆژی ئه‌م هه‌می نێزیكی هه‌ڤ كرینه، به‌لێ بۆ گه‌له‌ك كریارێن چاره‌نڤیس، هه‌بوونا ده‌نگێ كوردی ل جه و مه‌حفه‌ل و سنوورێن ڤه‌كری دێ زویتر برینێن وان هێنه تیماركرن. چاوا مه گۆت رێیا هزار میل ب ئێك پێنگاڤ ده‌ست پێ دكه‌ت، هه‌روه‌سا ژی ئه‌ڤێ پێنگاڤێ ژی دبیت ژ ئێك كه‌سی ده‌ست پێ كربیت و ئیراده‌یه‌كا ب هێز ده‌ست پێ كریه، ئه‌ڤه ئیراده ژی تێكراییا پتر ژ كه‌سه‌كی یه، به‌لكو ده‌نگێ هه‌ر كورده‌كی یه كو ده‌رده‌سه‌ری ب چاڤێ سه‌رێ خۆ دیتین، ده‌نگێ برینداری یه، یێ ئاواره‌یی یه، یێ زولم دیتی یه، یێ شه‌هیدی یه، كو د ئارمانجه‌كا هه‌ڤپشك دا هه‌می دبنه ئێك و دگه‌هنه ئێك!.. هۆسا بوو و ب ڤی ره‌نگی پێنگاڤێ پێنگاڤا ئێكێ هاڤتبوو، لێ به‌رییا گه‌شه‌سه‌ندانا بیاڤێ ته‌كنۆلۆژی و شۆرشا ره‌قمی، لێ نها ئه‌ڤ هه‌ژمارا نڤیسه‌ران و ده‌سته‌كا نڤیسه‌ران ئێدی به‌رفره‌هتر لێهات و سنوور هاتنه به‌زاندن، ئه‌ڤه ئه‌م یێن ل كوردستانا ئازادكری و هه‌روه‌سا ره‌ڤه‌ندا مه یا ل دوورترین وه‌لاتێ جیهانێ، به‌لێ ئه‌م یێن د ژۆره‌ك و مه‌زه‌له‌كا بچویك دا دا كاردكه‌ین، مینا ب كۆلانگی دبێژن، ئه‌م یێن ل سه‌ر قانا پشتێ د پالداینه و كارێ رۆژنامه‌ڤانی برێڤه‌دبه‌ین، ل ده‌مه‌كی كو به‌ری وه‌ختی هه‌ر وه‌كو مه ئاماژه ب گۆڤارا ناڤهاتی دا، كانێ چه‌ند ب زه‌حمه‌ت دهاته وه‌شاندن و به‌لاڤه‌كرن و كاریگه‌ری ل سه‌ر ره‌ڤه‌ندا كوردی چه‌ند دكر! . ئه‌ڤه ژی نیعمه‌ته‌كه و مرۆڤایه‌تی یا به‌ره‌ف باشتر ڤه‌دچیت، هیڤی یه بۆ ده‌مێن پێش دا ژی ببیته هێڤێنێ دروستكرنا لۆبیه‌كێ كوردی یێ ب هێز و خوه‌دی بریار ژ ره‌ڤه‌ندا كوردی و ب رێكخستی كار و كریار و په‌یامێن وان ب سیسته‌مه‌كێ مۆدێرن رێك بێخیت.. نه بتنێ ل ده‌رڤه‌ی وه‌لاتی به‌لكو ل ناڤخوه‌یا وه‌لاتی و ل هه‌ر چار پارچه‌یێن كوردستانێ ژی زمانحاله‌ك هه‌بیت. نێزیكتری سه‌ربخوه‌یێ بیت، هه‌ر چو نه‌بیت ئه‌رشیفه‌ك بیت بۆ تۆماركرنا دیرۆكێ و هه‌لگرتنا به‌لگه‌نامه‌یێن گرنگ بۆ نفشێن بهێن، بزانن وان ئه‌رشیفه‌ك هه‌یه، ژێده‌ره‌كه بۆ نامه‌یێن وان لێكۆلین و باوه‌رنامه‌یێن وان یێن زانستی و ئه‌كادیمیك وه‌كو ڤێ دونیایێ هه‌میێ ب وێ هیڤیێ مه كو پێنگاڤ بگه‌هیته لۆتكه‌یا پێنگاڤا هزار میل…
