ماڤێن محه‌مه‌د
ب شێوه‌كێ گشتی بكارئینانا ئنترنێتێ د ده‌ستێت زارۆكێن مه دا ل ناڤا جڤاكا نوكه دا ل هه‌ر ماله‌كی زێده یا به‌ربه‌لاڤه. دا كو تو بشێی زارۆكێن خۆ ب شێوه‌كێ جوان برێڤه‌ببه‌ی، پێدڤیه لسه‌ر ده‌یبابان ده‌مه‌كێ تایبه‌ت بۆ زارۆكێن خۆ ته‌رخان بكه‌ت، ئه‌و ده‌مێ بۆ زارۆكێن خۆ دیاركری ب تشتێن مفا ڤه بۆرینن، بۆ نموونه سه‌ره‌دانا په‌رتوكخانا یان مۆزه‌خانه‌یان یان جهێ یاریان و گه‌له‌ك جهێن دی ب مفا بكه‌ت، داكو تو بشێی بكارئینانا ئنترنێتێ د ده‌ستێن زارۆكێن خۆ دا كێم بكه‌ی، پێدڤیه ته ئه‌و ده‌مێ دیاركری هه‌بیت بۆ زارۆكێن خۆ، هه‌روه‌سا بلا رۆژانه ده‌مه‌كێ كێم یێ دیاركری بۆ بكارئینانا ئنترنێتێ ژی هه‌بیت، لێ شێوه‌كێ باش بهیته بكارئینان، بۆ نموونه فێربوونا قورئانێ، فێربوونا زمانان و گه‌له‌ك تشتێن دی ب مفا بهێته بكارئینان. هه‌روه‌سا پێكۆلان بكه زارۆكێن خۆ به‌خته‌وه‌ر بكه‌ی، ژبه‌ر كو ده‌ما هه‌ست دكه‌ن ته دڤێت وان به‌خته‌وه‌ر بكه‌ی، دێ گوهداریا ته كه‌ن و دێ ل ژێر فه‌رمانێن ته‌دا بن، بۆ هه‌ر كاره‌كێ باش یێ تو بۆ وان دبێژی گریدای چاوانیا بكارئینانا ئه‌نترنیتێ بیت یان هه‌ر كاره‌كێ دی، ئه‌ڤی كاری گه‌له‌ك دراڤ لێ ناچیت، به‌لكو تشته‌كێ ژ دراڤی گرنگتر پێ دڤێت، تو دشێی جه‌خت لسه‌ر حه‌زژێكرنا خۆ بۆ زارۆكێ خۆ بكه‌ی و ڤێ حه‌ژێكرنێ بسه‌لمینی ب رێكا سه‌لماندنا گرنگیه‌كا ته‌مام ب وی و گرنگیدان ئه‌و فاكته‌ره یێ زارۆك ب به‌رده‌وامیا ده‌می حه‌زژێ كه‌ت، به‌لێ پا مخابن كێم جاران زارۆك ڤێ گرنگیێ دبینن، له‌وما پتریا جاران زارۆك هه‌ست ب گرنگینه‌دانێ دكه‌ت، ڤێجا رادبیت ب سه‌لماندنا هه‌بوونا خۆ و سه‌رنجا ده‌یبابێن خۆ بۆ خۆ رادكێشیت ب رێكا شیماتیا مه‌دحكرن ژی باشترین رێكا سه‌لماندنێ یه بۆ مرۆڤی كو دیاره بكه‌ت كه‌سێ به‌رامبه‌ر گرنگیێ ب ڤی مرۆڤی دده‌ت، ئه‌ڤجا هه‌كه ته ڤییا زارۆكێ ته بكارئینانا ئه‌نترنیتێ رۆژانه ب شێوه‌كێ باش و ده‌مه‌كێ دیاركری بكاربینیت، پێدڤیه تو ده‌مێ خۆ و گرنگیه‌كا زۆر پێ بده‌ی. راسته پێدڤیه مرۆڤ هنده‌ك فه‌رمانان ل سه‌ر زارۆكێن خۆ بسه‌پینیت، به‌لێ پا د هه‌مان ده‌م دا یا فه‌ره ئه‌و فه‌رمانه ژی د به‌رئاقل و مه‌قبوول بن و ژ دلۆڤانی و ڤیانێ دبێ به‌هر نه‌بن و د خێزانێن به‌خته‌وه‌ر دا ڤێ چه‌ندێ پێدڤی ب سه‌پاندنا یاسایان نینه، به‌لكو ئه‌ندامێن خێزانێ ب خو، خۆ رێكدئێخن. له‌وما پێكۆلا بكه جه‌وه‌كێ به‌خته‌وه‌ر و خوشیێ بۆ زارۆكێن خۆ دابین بكه‌ی و مه‌دحێت كارێن وان یێن باش و وه‌ستیانا وان بكه‌ی ب په‌یڤێن دلۆڤان و یاریا دگه‌ل وانا بكه و وه‌ل وانا بكه هه‌ست ب پشكداریێ د پرۆژه‌یێن خێزانێ دا بكه‌ن و دێ پشتی هینگێ ب ته دیاربیت كو پێدڤییا ته ب سه‌پاندنا سیسته‌م و یاسایان كێم دبیت و كا تو چ ژ زارۆكێن خۆ دخوازی دێ بۆ ته جێبه جێ كه‌ن و ده‌ما تو ڤێ رێكێ جێبه جێ دكه‌ی، دێ تو خۆشیه‌كا ته‌مام دگه ل زارۆكێن خۆ به‌ی. ل دوماهیێ دی بێژم چاوانیا بكارئینانا ئه‌نترنیتێ د ده‌ستێ زارۆكان دا لسه‌ر دایبابان دمینت پێدڤیه لسه‌ر وان ب گرنگی وه‌رگرن ڤی بابه‌تی، ژبه‌ركو بكارئینانا ئنترنیتێ بوویه كاره‌كێ رۆژانه د ده‌ستێ مه‌زن و بچووكان دا، داخوازا ژیانه‌كا باش ورۆن و جوان بۆ هه‌ر زارۆكه‌كی دخوازم، ژبه‌ر كو زارۆك فێقیێ هه‌ر ماله‌كێ نه، چرایێن پاشه‌رۆژا وه‌لاتێ مه‌نه.
